परेरीत 6 - सरगुजिया बाइबिल

सात सुनाव के सेवक मन कर चुनई

¹ ओ दिन मन मे जब चेला मन ढेरेच बड़हे लागिन, तब यूनानी भाषा बोले बाला मन इब्रानी मन पर कुड़कुड़ाए लागिन, कि रोज दिन कर सेवकाई मे हमर बिधवा मन कर सुईध नी लेहल जाथे।

² तब ओ बारह चेला मन कर मंडली ला अपन जग बुलाए के कहिस, “ये ठीक नी है कि हमन परमेश्वर कर बचन ला छोएड़ के खिलाए-पिलाए कर सेवा मे लगे रही।”

³ एकरे बर, हे भाई मन अपन मे ले सात झन सुनाव लोग मन ला जेमन मन पवित्र आत्मा अउ बुईध ले भरल है, चुईन लेवा कि हमन ओमन मन ला ये बुता बर ठहराए देहब।

⁴ “लेकिन हमन मन त प्रार्थना मे अउ बचन कर सेवा मे लगे रहब।”

⁵ ये गोएठ सबेच मण्डली ला ठीक लागिस अउ ओहर स्तिफनुस नाव कर एक आदमी ला जेहर बिश्वास मे अउ पवित्र आत्मा ले भरल रहिस, अउ फिलिप्पुस, अउ प्रुखुरुस, अउ नीकानोर, तीमोन, अउ परमिनास, अउ अन्ताकिया वासी नीकुलाउस जेहर यहूदी मत मे ले आए रहिस, चुईन लेहिन।

⁶ एमन मन ला प्रेरित मन कर आगू मे खड़ा करिन, अउ ओमन मन प्रार्थना कईर के ओमन मन के उपर मे हाथ रखिन।

⁷ अउ परमेश्वर कर बचन हर बगरत गईस अउ यरूशलेम शहर मे चेला मन कर गिनती ढेरेच बड़हत गईस, अउ याजक मन कर एक बड़खा समाज हर ये मत ला माने बाला होए गईन।

स्तिफनुस कर गिरफ्तारी

⁸ स्तिफनुस अनुग्रह अउ सामर्थ ले भईर के लोग मन मे बड़खा-बड़खा अदभुत बुता अउ चिन्हा दिखात रहिस।

⁹ तब ओ अराधनालय मे ले जेहर लिबिरतीनो कहलात रहिस, अउ कुरेनी अउ सिकन्दरिया अउ किलिकिया अउ एसिया देश कर लोग मन ला कोनो एक झन हर उईठ के स्तिफनुस ले बाद-बिवाद करे लागिस।

¹⁰ लेकिन ओ ज्ञान अउ ओ आत्मा कर जेकर ले ओहर गोठियात रहिस, ओमन मन हर सामना नी कईर सकिन।

¹¹ एमे ओमन मन कई लोग मन ला उकसईन जेमन मन कहे लागिन, “हमन मन एला मूसा अउ परमेश्वर कर बिरोध मे निन्दा कर गोएठ कहत सुने हन।”

¹² अउ लोग मन अउ पुरनिए अउ शास्त्री मन ला भड़काए के चईड़ अईन अउ ओला पकेड़ के महासभा मे ले अईन।

¹³ अउ झूठ कर गवाह खड़ा करिन, जेमन मन कहिन, “ये आदमी हर पवित्र शास्त्र अउ ब्यवस्था कर बिरोध मे गोठियाए ले नी छोड़े।

¹⁴ काबर कि हमन मन एला ये कहत सुने हन, कि एहिच यीशु नासरी हर ये जगहा ला गिराए देही, अउ ओ रीति मन ला बदेल देही जेला मूसा हर हमन मन ला देहिस है।”

¹⁵ त सबेच लोग जेमन मन महासभा मे बईठे रहिन, ओकर कती ताक के ओकर मुह ला स्वर्गदूत कर जईसन देखिन।