परेरीत 4 - सरगुजिया बाइबिलपतरस अउ यूहन्ना कर गिरफ्तारी 1 जब पतरस अउ यूहन्ना मैनसे मन ले एला कहत रहिन, त याजक अउ मन्दिर कर मुखिया अउ सदूकी मन ओमन कर उपर मे चईड़ अईन। 2 काबर कि ओमन मन ढेरेच गुस्सा होए के पतरस अउ यूहन्ना यीशु मसीह कर बिषय मे सिखात रहिन अउ यीशु के मरल मन ले जी उठे कर प्रचार करत रहिन। 3 अउ ओमन मन पतरस अउ यूहन्ना ला धईर के दूसर दिन तक जेल मे रखिन काबर कि सांझ होए गए रहिस। 4 लेकिन बचन कर सुने बाला मन ले ढेरेच झन मन बिश्वास करिन, अउ ओमन कर गिनती पाच हजार मैनसे मन के लगभग होए गिन। पतरस अउ यूहन्ना: यहूदी मन कर सभा के आगू मे 5 दूसर दिन एकस होईस कि ओमन कर सरदार अउ पुरनिए अउ शास्त्री। 6 अउ महायाजक हन्ना अउ कैफा अउ यूहन्ना अउ सिकन्दर अउ जेतेक महायाजक के घराना कर रहिन, सबेच झन यरूशलेम शहर मे जुटिन। 7 अउ पतरस अउ यूहन्ना ला मांझा मे ठड़होवाए के पूछे लागिन, “कि तुमन मन ये बुता ला कोन सामर्थ अउ कोन नाव ले करे हवा?” 8 तब पतरस हर पवित्र आत्मा ले भईर के ओमन मन ले कहिस, 9 “हे लोग मन कर मुखिया अउ पुरनिय मन, ये कमजोर मैनसे कर संग जे भलाई ला करल गईसे, अगर आएज हमर ले एकर बिषय मे पुछताछ करल जाथे, कि ओहर कईसन बड़िया होईस। 10 त तुमन सबेच झन अउ सबेच इस्राएली मन जाएन जावा कि यीशु मसीह नासरी कर नाव मे जेला तुमन क्रूस मे चढ़ाए देहा, अउ परमेश्वर हर मरल मन ले जीलईस, ये मैनसे हर तुमन कर आगू मे भलेच चंगा ठड़होईस है। 11 एहर ओहिच पखना है जेला तुमन राजमिस्त्री मन घिन जाने हा ओहर कोनहा कर मुख्य पखना होए गईस। 12 अउ कोनो दूसर कर द्वारा उद्धार नी है, काबर कि स्वर्ग कर खाल्हे अउ मैनसे मन कर मांझा मे अउ कोनो दूसर नाव नी देहल गईस है, जेकर द्वारा हमन मन उद्धार पाए सकब।” यीशु मसीह कर नाव बर चेला मन ला धमकी 13 जब ओमन मन पतरस अउ यूहन्ना कर हियाव ला देखिन, अउ एला जानिन कि एमन अनपड़ अउ सहज मैनसे मन है, त आश्चर्य करिन; फिर ओमन मन ला चिनहिन कि एमन यीशु कर संग मे रहिन है। 14 ओ मैनसे ला जेहर बड़िया होए रहिस, ओमन संग ठड़होल देख के, यहूदी ओमन कर बिरोध मे कुछ नी कहे सकिन। 15 लेकिन ओमन मन ला महासभा कर बाहर कती जाए बर हुकूम दे के, ओमन अपन मे सोचे लागिन, 16 “हमन ये मैनसे मन कर संग का करी? काबर कि यरूशलेम शहर कर सबेच रहे बाला मन पर परगट है, कि एमन कर द्वारा एक प्रसिद्ध चिन्हा देखाल गईस है; अउ हमन ओकर इनकार नी करे सकब। 17 लेकिन एकरे बर कि ये गोएठ हर मैनसे मन मे अउ बगरा झिन बगरे, हमन ओमन मन ला धमकाबो, कि तुमन ये नाव ले फिर कोनो मैनसे मन ले गोएठ झिन करा।” 18 तब ओमन मन ला बुलवईन अउ चेताए के ये कहिन, कि “यीशु कर नाव मे कुछ भी झिन गोठियईहा अउ न सिखईहा।” 19 लेकिन पतरस अउ यूहन्ना हर ओमन मन ला जवाब देहिन, “तुमन ही न्याय करा; का एहर परमेश्वर कर लिघे भला है कि हमन परमेश्वर कर गोएठ ले बईड़ के तुमन कर गोएठ ला मानी। 20 काबर कि एहर हमन ले नी होए पाही, कि जेला हमन देखे हन अउ सुने हन ओला नी कहबो।” 21 तब ओमन मन ओके ला अउ धमकाए के छोएड़ देहिन, काबर कि लोग मन कर कारन ओमन मन ला सजा देहे कर कोनो कारन नी मिलिस, एकरे बर कि जे घटना होए रहिस ओकर कारन सबेच लोग मन परमेश्वर कर बड़ाई करत रहिन। 22 काबर कि ओ मैनसे, जेमा ये चंगा करे कर चिन्हा देखल गए रहिस, चालीस बरस ले ज्यादा उमर कर रहिस। चेला मन कर प्रार्थना 23 पतरस अउ यूहन्ना छुईट के अपन संगता मन जग लिघे अईन, अउ जे कुछ महायाजक मन अउ पुरनिए मन ओमन मन ले कहे रहिन, ओमन मन ला सुनाए देहिन। 24 एला सुईन के, ओमन मन एक चित होए के जोर से किरलाए के परमेश्वर ले कहिन, “हे प्रभु, तय ओहिच हस जेहर स्वर्ग अउ पृथ्वी अउ समुन्दर अउ जे कुछ ओमे है बनाए हस। 25 तय हर पवित्र आत्मा कर द्वारा अपन सेवक हमर दाऊ दाऊद कर मुह ले कहे, ‘दूसर जाएत मन हल्ला काबर मचईन? अउ देश-देश कर लोग मन काबर बिन बुता कर गोएठ सोचिन? 26 प्रभु अउ ओकर मसीह कर बिरोध मे पृथ्वी कर राजा मन ठड़होईन है, अउ हाकिम मन एक संग होए के जुईट गईन है।’ 27 काबर कि सहिच मे तोर पवित्र सेवक यीशु कर बिरोध मे जेला तय अभिषेक करे हस, हेरोदेस अउ पुन्तियुस पिलातुस भी दूसर जाएत मन अउ इस्राएली मन कर संग ये नगर मे जुटिन, 28 कि जे कुछ आगू ले तोर सामर्थ अउ बुईध ले ठहरे रहिस ओहिच ला करा। 29 अब हे प्रभु, ओमन कर धमकी ला देख; अउ अपन कमिया मन ला ये बरदान दे दे कि तोर बचन बड़ हियाव ले सुनाल जाए। 30 चंगा करे बर तय अपन हाथ ला आगू कर, कि चिन्हा अउ आश्चर्य कर बुता तोर पवित्र सेवक यीशु कर नाव मे करल जाही।” 31 जब ओमन मन बिनती कईर दारिन, त ओ जगहा जहा ओमन मन जुटे रहिन हिल गईस, अउ सबेच झन मन पवित्र आत्मा ले भईर गिन, अउ परमेश्वर कर बचन ला हियाव ले सुनात रहिन। बिश्वासी मन कर सहयोग करे बाला 32 अउ बिश्वास करोईया मन कर कलीसिया एक चित अउ एक मन कर रहिन, हिया तक कि कोनो भी अपन धन-सम्पत्ति ला अपन नी कहत रहिन, लेकिन सबेच कुछ हर साझा कर रहिस। 33 अउ प्रेरित मन बड़ेच सामर्थ्य ले प्रभु यीशु के जी उठे कर गवाही देहत रहिन, अउ ओ सबेच झन पर बड़खा अनुग्रह रहिस। 34 अउ ओमन मन मे कोनो मन भी गरीब नी रहिन; काबर कि जेमन जग जमीन अउ घर रहिस, ओमन मन ओ जमीन मन ला बेच-बेच के, बेचल चीज मन कर दाम मन ला लानत रहिन, अउ ओला प्रेरित मन कर गोड़ मे रखत रहिन। 35 अउ जेकस जेला जरूरत होवत रहिस, ओकर अनुसार ओमन मन ला बाएट देहत रहिन। 36 यूसुफ नाव कर साइप्रस कर एक लेवी रहिस जेकर नाव प्रेरित मन बरनबास मने कि (शान्ति कर बेटा) रखे रहिन। 37 ओकर कुछ जमीन रहिस, जेला ओहर बेचे रहिस, अउ दाम कर रूपया ला लाएन के प्रेरित मन कर गोड़ मे रईख देहिस। |
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.
Beyond Translation