परेरीत 28 - सरगुजिया बाइबिल

माल्टा द्वीप मे पौलुस कर स्वागत

¹ जब हमन मन बईच हिकलेन, त पता चलिस कि ये द्वीप हर माल्टा कहलाथे।

² अउ हुवा कर निवासी मन हमर पर ढेरेच अनोखा कृपा करिन; काबर कि मेह बरसे कर कारन जाड़ रहिस, एकरे बर ओमन मन आगी सुलगाए के हमन मन ला ठहरईन।

³ जब पौलुस हर लकरी मन कर गठ्ठा मन ला बटोएर के आगी मे रखिस, त एक साप हर आच ला पाए के हिकलिस अउ ओकर हाथ ले लपटाए गईस।

⁴ जब हुवा कर रहोईया मन साप ला ओकर हाथ ले लटकल देखिन, त अपनेच मे कहे लागिन, “सहिच मे ये लोग हर हतियारा हे कि ये आदमी हर समुन्दर ले बईच हिकलिस, तबो ले न्याय हर जीवित रहे नी देहिस।”

⁵ तब ओहर साप ला आगी मे झटेक देहिस, अउ ओला कुछूच हानी नी पहुचिस।

⁶ लेकिन ओमन मन बाट जोहत रहिन कि ओहर सुन होए जाही या त अचानक गिर के मईर जाही, लेकिन ओमन मन ढेरेच समय ले देखतेच रहिन, अउ देखिन कि ओमन मन कर कुछ नी बिगड़िस, त अपन सोच ला बदेल के कहिन, “एहर त कोनो देवता है।”

⁷ ओ जगहा के आस-पास ओ टापू कर मुखिया पुबलियुस कर जमीन रहिस। ओहर हमन मन ला अपन घर मे ले जाए के तीन दिन संगता भाव ले पहुनाई करिस।

⁸ पुबलियुस कर दाऊ जर अउ दस्त ले बिमार मे पड़े रहिस। तब पौलुस हर ओकर लिघे घर मे जाए के बिनती करिस, अउ ओकर पर हाथ रईख के ओला चंगा करिस।

⁹ जब एकस होईस, त ओ टापू कर बाचल बिमरिहा मन अईन अउ चंगा करल गईन।

¹⁰ ओमन मन हर हमर ढेरेच आदर करिन, अउ जब हमन मन चले लागेन त जे कुछ हमर बर जरूरत रहिस, डोंगा मे कईर देहिन।

माल्टा द्वीप ले रोम कती

¹¹ तीन महिना कर बाद मे हमन मन सिकन्दरिया कर एक जहाज ले चईल हिकलेन, जेहर ओ टापू मे जाए के जाड़ भर रहेन, अउ जेकर चिन्ह दियुसकूरी रहिस।

¹² सुरकूसा मे लंगर डाएल के हमन मन तीन दिन टिके रहेन।

¹³ हुवा ले हमन मन घुईम के रेगियुम मे आएन; अउ एक दिन कर पीछू दक्खिन बईहर चलिस, तब हमन मन दूसर दिन पुतियुली मे आएन।

¹⁴ हुवा हमन मन ला कुछ भाई मन मिलिन, अउ ओमन मन कर कहे ले हमन मन ओमन मन के हिया सात दिन तक रहेन; अउ ये रीति ले हमन मन रोम कती गएन।

¹⁵ हुवा ले ओ भाई मन हमर समाचार सुईन के अप्पियुस कर चौक अउ तीन-सराए तक हमन मन ले भेंट करे बर हिकेल अईन, जेमन मन ला देख के पौलुस हर परमेश्वर कर धन्यवाद करिस, अउ हिम्मत बांधीस।

¹⁶ जब हमन मन रोम मे पहुचेन, त पौलुस ला एक सैनिक कर संग जेहर ओकर देखरेख करत रहिस, एक झन रहे कर हुकूम मिल गईस।

पौलुस रोम मे

¹⁷ तीन दिन कर पीछू ओहर यहूदी मन कर मुखिया मन ला बुलईस, अउ जब ओमन मन जुटिन त ओमन मन ले कहिस, “हे भाई मन, मैहर अपन लोग मन कर या दाऊ-ददा मन के स्वभाव कर बिरोध मे कुछ नी करे, तबो ले कैदी बनाए के यरूशलेम शहर ले रोमी मन कर हाथ मे सौपल गए।

¹⁸ ओमन मन मोला जाएच के छोएड़ देहे बर चाहिन, काबर कि मोर मे मृत्यु कर लाएक कोनोच दोष नी रहिस।

¹⁹ लेकिन जब यहूदी एकर बिरोध मे गोठियाए लागिन, त मोला कैसर कर दुहाई देहे बर पड़िस: ये नही कि मोला अपन लोग मन पर कोनो दोष लगाए बर रहिस।

²⁰ लेकिन एकरे बर कि मैहर तुमन मन ला बुलाए हो, कि तुमन मन ले भेटाओ, अउ गोएठ-बात करो; काबर कि इस्राएल कर आशा बर मैहर ये जंजीर ले जकड़ल हो।”

²¹ ओमन मन ओकर ले कहिन, “न हमन मन तोर बिषय मे यहूदी मन ले चिठ्ठी पाएन, अउ न भाई मन ले कोनो हर आए के तोर बिषय मे कुछ बतईस अउ न बुरा कहिन।

²² लेकिन तोर बिचार का है? ओहिच ला हमन मन तोर ले सुने बर चाहत हन, काबर कि हमन मन जानथन कि सबेच जगहा ये मत कर बिरोध मे गोठियाथे।

²³ तब ओमन मन ओकर बर एक दिन ठहरईन, अउ ओकर हिया ढेरेच झन लोग मन जुटिन, अउ ओहर परमेश्वर कर राएज के गवाही देहत, अउ मूसा कर ब्यवस्था अउ अगमजानी मन कर पुस्तक मन ले यीशु कर बारे मे समझाए-समझाए के भिनसरहा ले सांझ तक बखान करतेच रहिस।

²⁴ तब कुछ झन मन ओ गोएठ ला माएन लेहिन, अउ कुछ झन मन बिश्वास नी करिन।

²⁵ जब ओमन मन एक मत नी होईन, त पौलुस कर ये एक गोएठ ला सुईन के चईल देहिन, पवित्र आत्मा हर यशायाह अगमजानी मन कर द्वारा तुमन मन दाऊ-ददा मन ले ठिकेच कहिस है,

²⁶ ‘जाए के ये लोग मन ले कह, कि सुनत रईहा, लेकिन नी समझिहा, अउ देखत त रईहा, लेकिन नी जानिहा;

²⁷ काबर कि ये मैनसे मन कर मन हर मोटा अउ ओमन मन कर कान हर भारी होए गईस है, अउ ओमन मन अपन आएख ला बन्द करिन है, ये नियर नी होबे कि ओमन मन अझे आएख ले देखे, अउ कान ले सुने, अउ मन ले समझे अउ फिरे, अउ ओमन मन ला मय चंगा करहू।’”

²⁸ तले तुमन मन जाना कि परमेश्वर कर ये उद्धार कर कहानी दूसर जाएत मन कर लिघे भेजल गईस है, अउ ओमन मन सुनही।

²⁹ जब ओहर ये कहिस त यहूदी मन अपनेच मे गोएठ-बात करे लागिन अउ हुआ ले चईल देहिन।

³⁰ ओहर हुवा पूरा दुई साल तक अपन भाड़ा कर घर मे रहिस,

³¹ अउ जेमन मन ओकर लिघे आत रहिन, ओमन मन सबले मिलत रहिस, अउ बिन रोक-टोक ढेरेच निडर होए के परमेश्वर कर राएज के प्रचार करत अउ प्रभु यीशु मसीह कर गोएठ ला सिखात रहिस।