परेरीत 26 - सरगुजिया बाइबिल

अग्रिप्पा कर आगू मे उत्तर

¹ राजा अग्रिप्पा हर पौलुस ले कहिस, “तोला अपन बिषय मे बोले कर हुकूम है।” तब पौलुस हर हाथ ला बड़हाए के उत्तर देहे लागिस,

² “हे राजा अग्रिप्पा, जेतेक गोएठ कर यहूदी मन मोर पर दोष लगाथे, आएज तोर आगू मे ओमन मन कर उत्तर देहे मे मैहर अपन ला धन्य समझथो,

³ बिशेष कईर के एकरे बर कि तय यहूदी मन कर सबेच बेवहार अउ बिवाद मन ला जानथस। तले मैहर बिनती करथो, धीरज ले मोर सुईन ले।

⁴ मोर चाल-चलन शुरू ले ही अपन जाएत मन कर मांझा मे यरूशलेम शहर मे जईसन रहिस, ओला सबेच यहूदी मन जानथे।

⁵ अगर ओमन मन गवाही देहे बर चाही, त शुरू ले मोला पहिचानथे कि मैहर फरीसी होए के अपन धर्म कर सबले खरा झुन्ड कर नियर रेंगे।

⁶ अउ अब ले ओ प्रतिज्ञा मे आशा कर कारन जे परमेश्वर हर हमर दाऊ-ददा मन ले करे रहिस, मोर पर मुकदमा चलत आहे।

⁷ ओहिच प्रतिज्ञा कर पूरा होए कर आशा लगाए है, हमर बारह गोत्र मन अपन सबेच मन ले राएत-दिन परमेश्वर कर सेवा ला करत अईन है। हे राजा, एहिच आशा कर बिषय मे यहूदी मन मोर पर दोष लगाथे।

⁸ जब कि परमेश्वर मरल मन ला जीलाथे, त तुमन कर हिया ये गोएठ ला काबर बिश्वास कर लाएक नी समझल जाथे?

⁹ मैहर भी समझे रहे कि यीशु नासरी कर बिरोध मे मोला ढेरेच कुछ करे बर चाही।

¹⁰ अउ मैहर यरूशलेम शहर मे एहिच नियर करे भी; अउ प्रधान महायाजक मन ले हक ला पाए के ढेरेच पवित्र लोग मन ला भी जेलखाना मे डाले, अउ जब माएर देहल जात रहिन त मैहर भी ओमन मन कर बिरोध मे अपन सहमती देहत रहे।

¹¹ सबेच अराधनालय मे मैहर ओमन मन ला ताड़ना दिलाए-दिलाए के यीशु कर निन्दा करवात रहे, हिया तक कि गुस्सा कर मारे एसन पागल होए गए कि बाहर कर शहर मन मे भी जाए के ओमन मन ला सतात रहे।

¹² एहिच धुन मे जब मैहर प्रधान याजक मन ले अधिकार अउ हुकूम पत्र ला ले के दमिश्क नगर कती जात रहे;

¹³ त हे राजा, डगर मे दुईपहर के समय मैहर अकाश ले सूरज कर तेज ले भी बईढ़ के एक ज्योति, अपन अउ अपन संग रेंगे बाला कर चाएरो कती चमकत देखे।

¹⁴ अउ जब हमन मन सबेच झन जमीन मे गिर गएन, त मैहर इब्रानी भाषा मे, मोर ले ये कहत एक गोएठ सुने, ‘हे शाऊल, हे शाऊल, तय हर मोला काबर सताथस? पैना पर लात मारना तोर बर कठिन है।’

¹⁵ मैहर कहे, ‘हे प्रभु, तय कोन हस?’ प्रभु हर कहिस, ‘मैहर यीशु हो, जेला तय हर सताथस।

¹⁶ लेकिन तय उईठ के, अपन गोड़ मे ठड़हो; काबर कि मैहर तोला एकरे बर दर्शन देहे हो कि ओ गोएठ मन कर भी कमिया ठहराहू, जेला तय हर देखे अउ ओकर भी जेकर बर मैहर तोला दर्शन देहू।

¹⁷ अउ मैहर तोला तोर साथी अउ दूसर जाएत ले बचात रहू, जेकर लिघे मैहर तोला भेजथो।

¹⁸ काबर कि तय ओमन कर आएख ला खोले बर अउ अन्धार ले ज्योति मे अउ शैतान कर कब्जा ले परमेश्वर कती आए बर; कि पाप कर छमा अउ मैनसे मन कर संग जेहर बिश्वास करे ले पवित्र अउ मीरास पाही।’

¹⁹ अउ हे राजा अग्रिप्पा, मैहर ओ स्वर्ग कर दर्शन अउ गोएठ ला नी टाले,

²⁰ अउ पहिले दमिश्क नगर कर अउ यरूशलेम शहर कर अउ यहूदिया परदेस कर सबेच देश कर रहोईया अउ दूसर जाएत मन ला समझात रहे, कि मन फिरावा अउ परमेश्वर कर लिघे फिर के लाएक बुता ला करा।

²¹ ये गोएठ मन कर कारन यहूदी मन मोके मन्दिर मे धईर के मारे बर चाहत रहिन।

²² लेकिन परमेश्वर कर सहायता ले मैहर आएज तक बने हो अउ छोटे बड़े सबेच कर आगू मे गवाही देथो, अउ ओ गोएट ला छोएड़ के अउ कुछूच नी कहो जेला अगमजानी अउ मूसा हर भी कहिस है कि होही,

²³ कि मसीह ला दुख उठाए बर होही, अउ ओहिच हर सबले आगू मरल मन ले जी उईठ के, हमर लोग मन ले अउ दूसर जाएत मन मे ज्योति कर प्रचार करही।”

²⁴ जब ओहर ये नियर कर उत्तर देहत रहिस, त फेस्तुस हर किरलाए के कहिस, “हे पौलुस, तय पागल हस। ढेरेच ज्ञान हर तोला पागल कईर देहिस है।”

²⁵ लेकिन पौलुस हर कहिस, “हे महामहिम फेस्तुस, मैहर पागल नी हो, लेकिन सच्चाई अउ बुईध कर गोएठ कहथो।

²⁶ राजा हर भी जेकर आगू निडर होए के गोठियात हो, ये गोएठ मन ला जानथा; अउ मोला बिश्वास है कि ये गोएठ मन ले कोनोच हर ओकर ले छुपल नी है, काबर कि ये घटना कोनो कोनहा मे नी होईस है।

²⁷ हे राजा अग्रिप्पा, का तय अगमजानी मन पर बिश्वास करथस? हव, मैहर जानथो, कि तय बिश्वास करथस।”

²⁸ तब राजा अग्रिप्पा हर पौलुस ले कहिस, “तय तनिक ही समझाए ले मोला मसीह बनाएक बर चाहथस?”

²⁹ पौलुस हर कहिस, “परमेश्वर ले मोर प्रार्थना है कि का तनिक, मे का ढेरेच मे, केबल तय ही नही लेकिन जेतेक लोग मन मोर सुनथे, ये बंधन मे ले छोएड़ मोर नियर होए जाए।”

³⁰ तब राजा अउ हाकिम अउ बिरनीके अउ ओमन कर संग मे बईठे बाला मन उईठ ठड़होईन;

³¹ अउ अलगेच जाए के अपन मन कहे लागिन, “ये लोग हर एसन त कुछ नी करे, जे मुत्यु कर सजा या जेलखाना मे डाले लाएक हवे।”

³² राजा अग्रिप्पा हर फेस्तुस ले कहिस, “अगर ये लोग हर कैसर कर दुहाई नी देतिस, त छुईट सकत रहिस।”