परेरीत 2 - सरगुजिया बाइबिल

पवित्र आत्मा कर अवई

¹ जब पिन्तेकुस्त कर दिन अईस, त ओमन मन सबेच एक जगहा मे जुटे रहिन।

² एका-एक अकाश ले बड़खा आंधी जईसन सनसनाहट कर गोएठ होईस, अउ ओकर ले सबेच घर हर जहा ओमन मन बईठे रहिन, गुईज गईस।

³ अउ ओमन मन ला आगी जईसन जीभ फटत दिखाई देहिस अउ ओमन मन ले सबेच झन पर आए ठहरिस।

⁴ अउ ओ सबेच झन मन पवित्र आत्मा ले भईर गईन, अउ जे नियर पवित्र आत्मा हर गोठियाए कर सामर्थ्य देहिस, ओमन मन दूसर-दूसर भाषा मे गोठियाए लागिन।

⁵ अउ अकाश के खाल्हे कर हर एक जाएत मे ले भक्त यहूदी मन यरूशलेम शहर मे रहत रहिन।

⁶ जब ये शब्द होईस त भीड़ लईग गईस अउ लोग मन घबराए गईन, काबर कि सबेच झन मन ला एहिच सुनई देहत रहिस कि एमन मोरेच भाषा मे गोठियात है।

⁷ अउ ओ सबेच झन मन अकचकाए अउ अचम्भित होए के कहे लागिन, “देखा, एमन जेला गोठियात है का सबेच झन मन गलीली नी है?

⁸ त फिर काबर हमन मन ले एक झन अपन-अपन जनम-भूमी कर भाषा सुनत हन?

⁹ हमन जे पारथी अउ मेदी, एलाम लोग, मेसोपोटामिया, यहूदिया परदेस, कप्पदूकिया परदेस, पुन्तुस, एसिया देश,

¹⁰ अउ फ्रूगिया अउ पमफूलिया अउ मिस्र अउ लीबिया देश कर जे कुरेने कर आस-पास मन मे है, ये सबेच देश कर रहे बाला मन अउ रोमी कर रहे बाला मन,

¹¹ मने कि यहूदी अउ यहूदी मत कर धारन करे बाला मन, क्रेती अउ अरबी मन भी है, लेकिन अपन-अपन भाषा मे ओमन मन ले परमेश्वर कर बड़खा-बड़खा बुता के सामर्थ्य कर काम के चर्चा सुनत है।”

¹² अउ ओ सबेच झन मन चकित होईन अउ घबराए के एक दूसर ले कहे लागिन, “ये का होवथे?”

¹³ लेकिन दूसर मन ठठ्ठा कईर के कहे लागिन, “ओमन मन त नावा दारू कर नशा मे हे।”

पिन्तेकुस्त कर दिन परतस कर भाषन

¹⁴ तब पतरस ओ ग्यारह चेला मन कर संग मे ठड़होईस अउ किरलाए के गोठियाए लागिस, “हे यहूदिया परदेस, अउ हे यरूशलेम शहर कर सबेच रहे बाला मन, एला जाएन ला, अउ कान लगाए के मोर गोएठ ला सुना।

¹⁵ जईसन तुमन मन समझत हा, एमन नशा मे नी है, काबर कि अझे त पहर ही दिन चड़हिस है।

¹⁶ लेकिन एहर ओ गोएठ हर है, जेला योएल अगमजानी कर द्वारा कहल गईसे:

¹⁷ परमेश्वर हर कहथे, कि आखरी दिन मे एसन होही कि ‘मैहर अपन आत्मा ला सबेच मैनसे मन पर उडेलहू, अउ तुमन कर बेटा-बेटी मन भविष्यवानी करही, अउ तुमन कर जवान मन दर्शन देखही, अउ तुमन कर पुरनिए मन सपना देखही।

¹⁸ बरन मैहर अपन कमिया अउ अपन कमनिन मन पर भी ओ दिन मन मे अपन आत्मा मे ले उडेलहू अउ ओमन मन भविष्यवानी करही।

¹⁹ अउ मैहर उपर अकाश मे अदभुत बुता ला अउ खाल्हे धरती पर चिन्हा, मने कि लहू, अउ आगी अउ कूहिरा कर बदरी दिखाहू।

²⁰ प्रभु कर महान अउ तेजस्वी दिन कर आए कर आगू बेर हर अन्धार अउ जोन हर लहू नियर होए जाही।

²¹ अउ जे कोनो हर प्रभु कर नाव लेही, ओहिच हर उद्धार पाही।’

²² हे इस्राएली मन, ये गोएठ मन ला सुना कि यीशु नासरी एक मैनसे रहिस जेकर परमेश्वर कती ले होए कर प्रमान ओ सामर्थ्य कर बुता अउ आश्चर्य कर बुता अउ चिन्ह ले परगट है, जेला परमेश्वर हर तुमन मन कर मांझा मे ओकर द्वारा कईर के देखईस जेला तुमन अपन ही जानथा।

²³ ओहिच यीशु ला, जेला परमेश्वर कर ठहराल गईस मनसा अउ आगू के ज्ञान कर अनुसार पकड़वाल गईस, तुमन अधर्मी मन कर हाथ ले क्रूस पर चड़हाए के माएर देहा।

²⁴ लेकिन ओहिच यीशु ला परमेश्वर हर मृत्यु कर बंधन ले छोड़ाए के जीलईस, काबर कि ये होए नी सकत रहिस, कि ओहर ओमन कर बस मे रहतिस।

²⁵ काबर कि दाऊद ओकर बिषय मे कहथे, ‘मैहर प्रभु ला सर्वदा अपन आगू मे देखत रहे काबर कि ओहर मोर जेवनी कती है, तले मैहर डईर झिन जाहू।

²⁶ एहिच कारन मोर मन हर आनन्दित होईस, अउ मोर जीभ हर मगन होईस, बरन मोर देह हर भी आशा मे बने रही।

²⁷ काबर कि तय हर मोर प्रान ला नरक कर जगहा मे नी छोड़बे; अउ न अपन पवित्र मैनसे ला सरे बर देबे!

²⁸ तय हर मोला जीवन कर डगर ला बताए हस; तय मोला अपन दर्शन के द्वारा आनन्द ले भईर देबे।’

²⁹ हे भाई मन, मैहर कुलपति दाऊद कर बिषय मे तुमन के साहस कर संग मे कह सकथो, कि यीशु हर मईर गईस अउ गाड़ल भी गईस अउ ओकर कबर आएज तक ले हमर हिया आहे।

³⁰ यीशु हर अगमजानी रहिस, यीशु हर जानत रहिस कि परमेश्वर हर मोर ले कसम खईस है, कि मैहर तोर बंश मे ले एक मैनसे ला तोर सिंहासन मे बईठाहू।

³¹ ओहर होए बाला गोएठ ला आगू ही ले देख के मसीह कर जी उठे कर बिषय मे भविष्यवानी करिस, कि न ओकर प्रान ला नरक लोक मे नी छोड़िस अउ न ओकर देह ला सरे देहिस।

³² एहिच यीशु ला परमेश्वर हर जीलईस, जेकर हमन सबेच गवाह हन।

³³ ये नियर परमेश्वर के जेवनी हाथ ले सर्वोच्च पद ला पाए के, अउ दाऊ ले ओहर पवित्र आत्मा ले के जेकर प्रतिज्ञा करल गए रहिस, ओहर एला उझेल देहिस जेला तुमन मन देखत अउ सुनत हा।

³⁴ काबर कि दाऊद त स्वर्ग पर नी चड़हिस; लेकिन ओहर आप कहथे, प्रभु हर मोर प्रभु ले कहिस, मोर जेवनी मे बईठ,

³⁵ जब ले कि मैहर तोर बैरी मन ला तोर गोड़ कर खाल्हे के चवकी नी कईर देहू।

³⁶ तले अब इस्राएल कर सबेच घराना निश्चित रूप से जाएन लेही कि परमेश्वर हर ओहिच यीशु ला जेला तुमन मन क्रूस मे चड़हाए देहा, प्रभु ठहरईसे अउ मसीह भी।”

³⁷ तब सुने बाला मन कर हृदय बेधाए गईस, अउ ओमन पतरस अउ प्रेरित मन ले पूछे लागिन, “हे भाई मन, हमन का करी?”

³⁸ पतरस हर ओमन मन ले कहिस, “मन फिरावा, अउ तुमन मन ले हर एक झन अपन-अपन पाप कर छमा बर यीशु मसीह कर नाव मे बपतिस्मा लेहे; त तुमन मन पवित्र आत्मा कर दान पईहा।

³⁹ काबर कि ये प्रतिज्ञा ला तुमन कर, अउ तुमन कर संतान, अउ ओ सबेच दूर-दूर कर लोग मन बर भी है जेमन ला प्रभु हमर परमेश्वर अपन लिघे बुलाही।”

⁴⁰ ओहर अउ ढेरेच गोएठ मन ले गवाही दे दे के समझईस कि अपन आप ला ये टेड़हा जाएत ले बचाए रहा।

⁴¹ तले जेमन मन पतरस कर बचन ला गरहन करिन ओमन बपतिस्मा लेहिन; अउ ओहिच दिन तीन हजार मैनसे मन ओमे मिल गईन।

बिश्वासी मन के साझा कर जीवन

⁴² अउ ओमन मन प्रेरित मन ले शिक्षा लेहे बर, अउ संगति रखे मे, अउ रोटी तोड़े मे, अउ बिनती करे बर लवलीन रहिन।

⁴³ अउ सबेच लोग मन पर भय छाए गईस, अउ ढेरेच सामर्थ्य कर बुता अउ चिन्हा प्रेरित मन कर द्वारा परगट होत रहिस।

⁴⁴ अउ सबेच बिश्वास करे बाला मन जुटे रहिन, अउ ओमन कर सबेच चीज हर साझा कर रहिस।

⁴⁵ अउ ओमन मन अपन-अपन सम्पत्ति अउ चीज मन ला बेच-बेच के जईसन जेकर जरूरत होत रहिस बाएट देहत रहिन।

⁴⁶ ओमन रोज दिन एक मन होए के मन्दिर मे जुटत रहिन, अउ घर-घर रोटी तोड़त अउ आनन्द अउ मन कर सिधाई ले भात खात रहिन।

⁴⁷ अउ परमेश्वर कर स्तुति करत रहिन, अउ सबेच लोग मन ओमन ले खुश रहिन: अउ जेमन मन उद्धार पात रहिन, ओमन मन ला प्रभु हर रोज दिन ओमन मन मे मिलाए देहत रहिस।