परेरीत 11 - सरगुजिया बाइबिलपतरस यरूशलेम फिरिस 1 अउ प्रेरित मन अउ भाई मन जेमन यहूदिया परदेस मे रहिन सुनिन कि दूसर जाएत मन भी परमेश्वर कर बचन ला माएन लेहिन है। 2 अउ जब पतरस हर यरूशलेम शहर मे अईस, त खतना करल लोग मन ओकर ले बता-बाती करे लागिन, 3 “कि तय बिना खतना होवल लोग मन कर हिया जाए के ओमन कर संग मे खाए।” 4 त पतरस हर ओमन मन ला शुरू ले लाईने-लाईन कह सुनईस; 5 “मैहर याफा नगर मे प्रार्थना करत रहे, अउ बेसुध होए के एक दर्शन देखे, कि एक भाड़ा बड़खा चादर कसन चाएरो कोना ले लटकल, अकाश ले उतेर के मोर जग अईस। 6 जब मैहर ओमे ध्यान करे, त धरती कर चाएर गोड़ अउ जंगल कर जानवर अउ रेंगे बाला जीव अउ अकाश कर चरई देखे; 7 अउ ये शब्द भी सुने कि, हे पतरस उठ मार अउ खा। 8 मय हर कहे, नही प्रभु नही; काबर कि कोनो अपवित्र या अशुद्ध चीज मन मोर मुह मे कभो नी गईस है। 9 एकर उत्तर मे अकाश ले दूसर बार शब्द होईस, जे कुछ ला परमेश्वर हर शुद्ध ठहरईन है ओला अशुद्ध झिन कह। 10 तीन बार एहिच कस होईस; तब सबेच कुछ हर फिर ले अकाश मे खिच लेहल गईस। 11 अउ देखा, तुरतेच तीन लोग मन जेमन मन कैसरिया नगर ले मोर जग भेजल गए रहिन, ओ घर मे जेमा हमन मन रहेन, आए के ठड़होए गईन। 12 तब आत्मा हर मोर ले ओमन मन संग बेहिचक होए बर कहिस, अउ छव भाई मन भी मोर संग होए लेहिन, अउ हमन ओ मैनसे मन कर घर मे गएन। 13 अउ ओहर बतईस, कि मैहर एक स्वर्गदूत ला अपन घर मे ठड़होल देखे, जेहर मोर ले कहिस, याफा नगर मे लोग भेजे के शमौन ला जेहर पतरस कहलाथे, बुलाए ले। 14 ओहर तुमन मन ले एकस गोएठ करही, जेकर द्वारा तय अउ तोर सबेच घर कर उद्धार पाही। 15 जब मैहर बात करे लागे, त पवित्र आत्मा ओमन मन पर एहिच नियर उतरिस जेकस शुरू मे हमर उपर उतरे रहिस। 16 तब मोला प्रभु कर ओ बचन याद अईस; जेला यीशु हर कहे रहिस, यूहन्ना हर त पानी ले बपतिस्मा देहिस, लेकिन तुमन पवित्र आत्मा ले बपतिस्मा पईहा। 17 तेकर ले जब कि परमेश्वर हर ओमन मन ला भी दान देहिस, जेहर हमन मन ला प्रभु यीशु मसीह मे बिश्वास करे ले मिले रहिस; त मय कोन रहे जो परमेश्वर ला रोएक सकहू?” 18 एला सुईन के, ओमन मन चुप रहिन, अउ परमेश्वर कर महिमा कईर के कहे लागिन, “त परमेश्वर हर दूसर जाएत मन ला भी जीवन बर मन फिराए कर दान देहिस है।” अन्ताकिया मे शाऊल अउ बरनबास 19 जे लोग मन दुख कर मारे जेहर स्तिफनुस कर कारन पड़े रहिस, इते-उते होए गए रहिन, ओमन मन फिरत-फिरत फीनीके अउ साइप्रस अउ अन्ताकिया नगर मे पहुचिन; लेकिन यहूदी मन ला छोएड़ कोई अउ ला बचन नी सुनात रहिन। 20 लेकिन ओमन मन ले साइप्रस अउ कुरेनी रहिन, जेमन अन्ताकिया नगर मे आए के यूनानी मन ला भी प्रभु यीशु के सुसमाचार कर गोएठ सुनाए लागिन। 21 अउ प्रभु यीशु मसीह कर हाथ हर ओमन मन कर उपरे रहिस, अउ ढेरेच लोग मन बिश्वास कईर के प्रभु कती फिरिन। 22 त ओमन मन कर गोएठ बात यरूशलेम शहर के कलीसिया कर सुनई मे अईस, अउ ओमन मन बरनबास ला अन्ताकिया नगर भेजिन। 23 ओहर हुवा पहुच के, अउ परमेश्वर कर अनुग्रह ला देख के खुश होईस; अउ सबेच झन मन ला उपदेश देहिस कि तन अउ मन लगाए के प्रभु ले लिपटे रहा। 24 काबर कि बरनबास हर एक सुघर मैनसे रहिस, अउ पवित्र आत्मा अउ बिश्वास ले भरे रहिस; अउ ढेरेच मन प्रभु मे आए मिलिन। 25 त ओहर शाऊल ला खोजे बर तरसुस चईल देहिस। 26 अउ जब ओहर ओकर ले मिलिस त ओला अन्ताकिया नगर ले लानिस, अउ एकस होईस कि ओमन मन एक बरस तक कलीसिया ले मिलत अउ ढेरेच झन मन ला उपदेश देहत रहिन, अउ चेला मन सबले आगू अन्ताकिया नगर मे मसीही कहलईन। 27 ओहिच दिन मन मे कई झन अगमजानी यरूशलेम शहर ले अन्ताकिया नगर मे अईन। 28 ओमन मन ले अगबुस नाव कर एक झन ठड़होए के आत्मा कर प्रेरना ले ये बतईस, कि सबेच दुनिया मे अकाल पड़ही, अउ ओ अकाल क्लौदियुस कर समय मे पड़िस। 29 तब चेला मन ठहरईन, कि सबेच झन अपन-अपन पूंजी के हिसाब से यहूदिया परदेस कर रहोईया भाई मन कर सेवा बर कुछ भेजब। 30 अउ ओमन मन एहिच कस करिन; अउ बरनबास अउ शाऊल कर हाथ प्राचीन मन कर लिघे कुछ भेज देहिन। |
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.
Beyond Translation