परेरीत 10 - सरगुजिया बाइबिल

कुरनेलियुस कर दर्शन

¹ कैसरिया नगर मे कुरनेलियुस नाव कर एक मैनसे रहिस, जेहर इतालियानी नाव पलटन कर सूबेदार रहिस।

² ओहर भक्त रहिस, अउ अपन घर परिवार कर संग मे परमेश्वर ले डरत रहिस, अउ यहूदी मन ला ढेरेच दान देहत रहिस, अउ घरी-घरी परमेश्वर ले बिनती करत रहिस।

³ ओहर दिन के तीसर पहर कर लिघे दर्शन मे बड़िया साफ रूप मे देखिस, कि परमेश्वर कर एक स्वर्गदूत हर मोर लिघे भीतर आए के कहथे, “हे कुरनेलियुस।”

⁴ कुरनेलियुस हर स्वर्गदूत ला ध्यान से देखिस अउ डईर के कहिस, “हे प्रभु का है?” ओहर ओकर ले कहिस, “तोर बिनती अउ तोर दान स्मरन बर परमेश्वर कर आगू मे पहुचिस है।

⁵ अउ अब याफा नगर मे लोग भेज के, शमौन ला जेहर पतरस कहलाथे, ओला बुलवाए ले।

⁶ ओ शमौन हर, चमड़ा कर ब्यापार करे बाला के हिया पहुना है, जेकर घर समुन्दर कर धरी मे है।”

⁷ जब ओ स्वर्गदूत हर ओकर ले गोठियाए के चईल देहिस, तब ओहर दुई झन कमिया मन ला, अउ जेमन ओकर ठन रहत रहिन, ओमन मन ले एक भक्त सिपाही ला बुलवईस,

⁸ अउ ओमन मन ला सबेच गोएठ ला बताए के याफा नगर मे भेजिस।

पतरस कर दर्शन

⁹ दूसर दिन जब ओमन मन रेंगत-रेंगत नगर कर धरी मे पहुचिन, तब दुईपहर के लिघे पतरस हर छत मे प्रार्थना करे बर चड़हिस।

¹⁰ अउ ओला भूख लागिस, अउ कुछ खाए बर चाहत रहिस, लेकिन जब ओमन मन तियार करत रहिन, तब ओहर अपन ला बेसुध होए गईस।

¹¹ अउ ओहर देखिस कि अकाश हर खुईल गईस; अउ एक बर्तन के नियर बड़खा चादर चाएरो कोना ले लटकल, धरती कती उतरत रहिस।

¹² जेमे धरती कर सबेच नियर कर चाएर गोड़ दार अउ रेंगे बाला पशु अउ अकाश कर चरई मन रहिन।

¹³ अउ ओला एक एकस गोएठ सुनई देहिस, “हे पतरस उठ, मार अउ खा।”

¹⁴ लेकिन पतरस हर कहिस, “नही प्रभु, कभो नही; काबर कि मैहर कभो कोनो अपवित्र या अशुद्ध चीज मन ला नी खाए हो।”

¹⁵ फिर दूसर बार ओला गोएठ सुनई देहिस, “जे कुछ ला परमेश्वर हर शुद्ध ठहरईस है, ओला तय अशुद्ध झिन कह।”

¹⁶ तीन बार एहिच कस होईस; तब तुरतेच ओ भाड़ा हर अकाश कती उईठ गईस।

कुरनेलियुस कर घर मे पतरस

¹⁷ जब पतरस हर अपन मन मे दुबिधा मे रहिस, कि ये दर्शन जेला मैहर देखे हो ओहर का होए सकथे, त देखा, ओ लोग जेला कुरनेलियुस हर भेजे रहिस, शमौन कर घर ला खोजत दूरा मे आए के ठड़होए गईन।

¹⁸ अउ पुकाएर के पूछे लागिन, “का शमौन जेहर पतरस कहलाथे, हिया पहुना है का?”

¹⁹ पतरस हर ओ दर्शन पर सोचत ही रहिस कि, कि प्रभु कर आत्मा हर ओकर ले कहे लागिस, “देख तीन झन मन तोर खोज मे है।

²⁰ तले उईठ के खाल्हे जा, अउ निसंकोच ओमन मन कर संग मे होए ले काबर कि मैहर ही ओमन मन ला भेजे हो।”

²¹ तब पतरस उतेर के ओ मैनसे मन ले कहिस, देखा, “जेकर खोज, तुमन मन करथा, ओहर मैहिच हो; तुमन मन कर आए कर का कारन है?”

²² ओमन मन कहिन, “कुरनेलियुस सूबेदार जेहर धर्मी अउ परमेश्वर कर भय माने बाला अउ सबेच यहूदी जाएत मे सुनाम मैनसे है, ओहर एक पवित्र स्वर्गदूत ले ये हुकूम पईस है, कि तोला अपन घर बुलाए के तोर ले परमेश्वर कर बचन ला सुने।”

²³ तब ओहर ओमन मन ला भीतर कती बुलाए के ओमन मन ला रहे कर जगहा देहिस। अउ दूसर दिन, ओहर ओमन मन कर संग मे गईस; अउ याफा नगर कर भाई मन ले कुछ मन ओकर संग मे होए लेहिन।

²⁴ दूसर दिन ओमन मन कैसरिया मे पहुचिन, अउ कुरनेलियुस अपन रिस्तेदार मन संग अउ प्रिय संगता मन ला जुटाए के ओमन कर बाट जोहत रहिन।

²⁵ जब पतरस हर भीतर आत रहिस, त कुरनेलियुस हर ओकर ले भेटईस, अउ ओकर गोड़ मे गिर के ओला जोहारिस।

²⁶ लेकिन पतरस हर ओला उठाए के कहिस, “ठड़होए जा, मैहर भी त मैनसे हो।”

²⁷ अउ ओकर संग गोठियात भीतर गईस, अउ ढेरेच झन मन ला जुटल देख के

²⁸ ओमन मन ले कहिस, “तुमन मन जानथा कि दूसर जाएत मन कर संगति करब या ओमन मन के हिया जाए बर यहूदी मन बर अधर्म है, लेकिन परमेश्वर हर मोला बतईस है कि कोनो मैनसे मन ला अपवित्र या अशुद्ध नी कहो।

²⁹ एकरे बर मैहर जब बुलाल गए त बिन कुछ कहे चईल आए। अब मैहर पुछथो कि मोला कोन बुता बर बुलाल गईस है?”

³⁰ कुरनेलियुस हर कहिस, “ये घरी मे, पूरेच चाएर दिन ले आगू, मैहर अपन घर मे तीसर पहर मे प्रार्थना करत रहे; त देखा एक लोग हर चमकदार कपरा पहिनल, मोर लिघे आए ठड़होईस।

³¹ अउ कहे लागिस, ‘हे कुरनेलियुस तोर प्रार्थना हर सुईन लेहल गईस है अउ तोर दान हर परमेश्वर कर आगू मे स्मरन करल गईस है।

³² एकरे बर कोनो ला याफा नगर भेज के शमौन ला जेहर पतरस कहलाथे, बुलवाए ले। ओहर समुन्दर कर धरी मे शमौन, चमरा कर ब्यापार करे बाला के हिया घर मे पहुना है।’

³³ तब मैहर तुरतेच तोर लिघे मे मैनसे मन ला भेजे, अउ तय हर भला करे कि तय आए गए। अब हमन हिया परमेश्वर कर आगू मे हन, तले जे कुछ ला परमेश्वर हर तोर ले कहिस है ओला सुनब।”

कुरनेलियुस के घर मे पतरस कर सन्देश

³⁴ तब पतरस हर कहिस, अब मोला निश्चय होईस कि परमेश्वर हर काकरो पक्ष नी करे,

³⁵ बरन हरेक जाएत जेमन ओकर ले डरथे अउ धर्म कर बुता करथे, ओहर ओला भाथे।

³⁶ जे बचन ला ओहर इस्राएली मन कर लिघे भेजिस है, जब ओहर यीशु मसीह कर द्वारा शान्ति कर सुसमाचार सुनईस।

³⁷ ओ बचन ला तुमन मन जानथा, जेला यूहन्ना के बपतिस्मा कर प्रचार आगू गलील परदेस ले चालु होए के सबेच यहूदिया परदेस मे बगेर गईस:

³⁸ परमेश्वर हर कोन रीति ले यीशु नासरी ला पवित्र आत्मा ले अउ सामर्थ्य ले अभिषेक करिस; ओहर भलाई करत अउ सबेच झन ला जेमन शैतान कर सताल रहिन, बड़िया करत फिरिस, काबर कि परमेश्वर हर ओकर संग मे रहिस।

³⁹ हमन ओ सबेच बुता कर गवाह हन; जेला ओहर यहूदिया मन कर देश अउ यरूशलेम शहर मे भी करिस, अउ ओमन मन ओला लकरी कर क्रूस मे टाएंग के माएर देहिन।

⁴⁰ ओला परमेश्वर हर तीसर दिन मे जीलईस, अउ परगट भी कईर देहिस।

⁴¹ सबेच मैनसे मन पर नही बरन ओ गवाह मन पर जेमन मन ला परमेश्वर हर आगू ले चुईन लेहे रहिस, मने कि हमन मन पर जेमन मन ओकर मरल मन ले जी उठे कर आगू ओकर संग मे खाएन-पीएन;

⁴² अउ ओहर हमन मन ला हुकूम देहिस कि मैनसे मन मे प्रचार करा अउ गवाही दा, कि ओहर ओहिच हर है जेला परमेश्वर हर जीवित अउ मरल मन कर न्यायी ठहरईस है।

⁴³ ओकर सबेच अगमजानी मन गवाही देथे, कि जे कोनो मन ओकर पर बिश्वास करही, ओके ला ओकर नाव कर द्वारा पाप कर छमा मिलही।

गैर-यहूदी मन पर पवित्र आत्मा कर उतरई

⁴⁴ पतरस हर ये गोएठ ला कहतेच रहिस कि पवित्र आत्मा हर बचन कर सबेच सुने बाला मन पर उतेर अईस।

⁴⁵ अउ जेतेक खतना करल बिश्वासी मन पतरस कर संग आए रहिन, ओमन मन सबेच झन अकचकाए गईन कि दूसर जाएत मन पर भी पवित्र आत्मा कर दान हर उझलल गईस है।

⁴⁶ काबर कि ओमन मन ओमन मन ला भाति-भाति कर भाषा बोलत अउ परमेश्वर कर बड़ाई करत सुनिन। एमे पतरस हर कहिस,

⁴⁷ “का अब कोनो हर पानी ला रोएक सकत है, कि एमन बपतिस्मा झिन पाए, जेमन मन हमर जईसन पवित्र आत्मा ला पईन है?”

⁴⁸ अउ ओहर हुकूम देहिस कि ओमन मन ला यीशु मसीह कर नाव मे बपतिस्मा देहल जाए। तब ओमन मन ओकर ले बिनती करिन, कि ओ कुछ दिन अउ ओमन मन कर संग मे रहे।