2 तीमुथियुस 4 - सरगुजिया बाइबिलबचन के प्रचार कर 1 परमेश्वर अउ मसीह यीशु ला गवाह कईर के, जेहर जीवित मन ले अउ मरल मन कर न्याय करही, अउ ओकर परगट होए कर, अउ राएज कर सुधि दिलाए के मैहर तोला आदेश देहथो। 2 कि तय बचन के प्रचार कर; समय अउ असमय तियार रह, सबेच नियर कर सहनशीलता अउ शिक्षा कर संग उलाहना दे अउ डाट अउ समझा। 3 काबर कि एसन समय आही, जब लोग मन खरा उपदेश ला नी सहे सकही, पर कान के खुजली कर कारन अपन अभिलाषा मन कर अनुसार अपन बर ढेरेच अकुन उपदेशक सकेल लेही। 4 अउ अपन कान ला सत्य ले फिर के कथा-कहानी मन मे लगाही। 5 पर तय सबेच गोएठ मन मे सावधान रह, दुख उठा, सुसमाचार प्रचार कर बुता कर, अउ अपन सेवा ला पूरा कर। 6 काबर कि मैहर अर्घ कर नियर उड़ेलत जात हो, अउ मोर जाए कर समय आए पहुचिस आहे। 7 मैहर बड़िया कुश्ती लईड़ दारे हो, मैहर अपन दौड़ ला पूरा कईर दारे हो, मैहर बिश्वास कर रखबाली करे हो। 8 भविष्य मे मोर बर धार्मिकता कर ओ मुकूट हर रखल आहे, जेला प्रभु हर, जेहर धर्मी अउ न्यायी है, मोला ओ दिन देही, अउ मोला ही नही बरन ओ सबेच झन मन ला देही जेमन ओकर परगट होए ला प्रिय जानथा। अपन खुद बर सन्देश 9 मोर जग जलदिच आए के प्रयास कर। 10 काबर कि देमास हर ये संसार ला प्रिय जाएन के मोला छोएड़ देहिस है अउ थिस्सलुनीके नगर मे रेंग देहिस। क्रेसकेस गलातिया परदेस ला अउ तीतुस दलमतिया नगर कती रेंग देहिस है। 11 केबल लूका हर मोर संग मे है। मरकुस ला ले के चईल आव; काबर कि सेवा बर ओहर मोर ढेरेच बुता कर है। 12 तुखिकुस ला मैहर इफिसुस नगर भेजे हो। 13 जे बागा ला मैहर त्रोआस शहर मे करपुस कर हिया छोड़ आए हो, जब तय आबे त ओला अउ पुस्तक मन ला बिशेष कईर के चर्म पत्र मन ला लेते आबे। 14 सिकन्दर ठठेर हर मोर ले ढेरेच बुराई करिस आहे; प्रभु हर ओला ओकर बुता मन कर अनुसार बदला देही। 15 तय भी ओकर ले सावधान रहबे, काबर कि ओहर हमर गोएठ मन कर ढेरेच बिरोध करिस है। 16 मोर आगू कर प्रतिवाद कर समय कोनोच हर भी मोर साथ नी देहिस, बरन सबेच झन मोला छोएड़ देहे रहिन। भला होतीस, कि एकर ले ओके ला लेखा देहे बर झिन पड़े। 17 लेकिन प्रभु मोर सहाएक रहिस, अउ मोला सामर्थ्य देहिस; ताकि मोर द्वारा पुरा-पूरा प्रचार होए, अउ सबेच दूसर जाएत मन सुईन लेहे; मैहर सिंह कर मुह ले छोड़ाल गए हो। 18 अउ प्रभु हर मोला हर एक बुरा बुता ले छुड़ाही, अउ अपन स्वर्गीय राएज मे सुरक्षित पहुचाही। ओकरे महिमा हमेसेच होवत रहे। आमीन। आखरी नमस्कार 19 प्रिस्किल्ला अउ अक्विला ला, अउ उनेसिफुरुस कर घराना मन ला नमस्कार। 20 इरास्तुस अउ कुरिन्थुस शहर मे रह गईस, अउ त्रुफिमुस ला मैहर मीलेतुस शहर मे बिमार छोड़े हो। 21 जाड़ ले आगू चईल आए कर प्रयास करबे: यूबूलुस, अउ पूदेस, अउ लीनुस अउ क्लौदिया, अउ सबेच भाई मन कर तोला नमस्कार। 22 प्रभु हर तोर आत्मा कर संग मे रहे, तुमन पर अनुग्रह होवत रहे। |
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.
Beyond Translation