2 तीमुथियुस 2 - सरगुजिया बाइबिलउत्तम लड़ाई करे बाला 1 एकरे बर हे मोर बेटा, तय ओ अनुग्रह ले जेहर मसीह यीशु मे है, बलवन्त होए जा। 2 अउ जे गोएठ ला तय हर ढेरेच गवाह मन कर आगू मोर ले सुने हस, ओला बिश्वासी मैनसे मन ला सौप दे; जेहर दूसर मन ला भी सिखाए कर लाएक है। 3 मसीह यीशु कर बड़िया योध्दा कर नियर मोर संग मे दुख उठा। 4 जब कोनो योध्दा हर लड़ाई मे जाथे, त एकरे बर कि अपन भरती करे बाला मन ला खुश करे, अपन आप ला संसार कर बुता मन मे नी फसाए। 5 फिर अखाड़ा मे लड़े बाला अगर बिधी कर अनुसार नी लड़ही त मुकूट ला नी पाही। 6 जे किसान हर मेहनत करथे, फर कर हिस्सा आगू ओके ला मिले बर चाही। 7 जेला मैहर कहथो ओकर पर ध्यान दे, अउ प्रभु तोला सबेच गोएठ मे समझ देही। 8 यीशु मसीह ला याद रख, जेहर दाऊद कर बंश ले होईस अउ मरल मन ले जी उठिस, अउ एहर मोर सुसमाचार कर अनुसार है। 9 जेकर बर मैहर अपराधी कर नियर दुख उठात हो, हिया तक कि कैद भी हो; लेकिन परमेश्वर कर बचन कैद नी है। 10 ये कारन मैहर चुनल लोग मन बर सबेच कुछ सहथो, कि ओमन भी ओ उद्धार ला जेहर मसीह यीशु मे है अनन्त महिमा कर संग मे पाए। 11 ये गोएठ सहिच है, कि अगर हमर ओकर संग मईर गए हन, त ओकर संग जीयब भी; 12 अगर हमन धीरज ले सहत रहब, त ओकर संग मे राएज भी करब; अगर हमन मन ओकर इंकार करब, त ओहर भी हमर इनकार करही; 13 अगर हमन अबिश्वासी भी होए, तबो ले ओहर बिश्वास योग्य बने रहथे, काबर कि ओहर अपन आप इंकार नी करे सकही। उत्तम कारीगरी करे बाला 14 ये गोएठ मन कर सुधि दिलाए, अउ प्रभु कर आगू मे चिताए दे, कि शब्द मन पर तर्क-बितर्क झिन करे, जेकर ले कोनोच लाभ नी होए; बरन सुने बाला मन बिगेड़ जाथे। 15 अपन आप ला परमेश्वर कर गरहन लाएक अउ एकस बुता करे बाला ठहराए कर प्रयत्न कर, जेहर लजाए झिन पाए, अउ जेहर सत्य कर बचन ला ठीक रीति ले बुता मे लानत रहे। 16 पर अशुद्ध बकवास ले बचे रह; काबर कि एसन लोग मन अउ भी अभक्ति मे बड़हत जाही। 17 अउ ओमन मन कर बचन सड़ल घाव नियर बगरत जाही: हुमिनयुस अउ फिलेतुस ओहिच मन ले है, 18 जे ये कही के कि पुनरुत्थान होए गिस है सत्य ले भटेक गईन है, अउ केतेक झन मन कर बिश्वास ला उलट-पुलट कईर देथे। 19 तबो ले परमेश्वर कर पक्का नींव बने रहथे, अउ ओकर पर ये छाप लगिस है, “प्रभु हर अपन मन ला चीनथे,” अउ “जे कोनो हर प्रभु कर नाव लेथे, ओहर अधर्म ले बाचल रहथे।” 20 बड़खा घर मन मे केबल सोना-चांदी ही कर भाड़ा नही, पर लकरी अउ माटी कर भाड़ा भी होथे; कोनो-कोनो हर आदर बर, अउ कोनो-कोनो अनादर बर। 21 अगर कोनो अपन आप ला एकर ले शुद्ध करही, त ओहर आदर कर भाड़ा अउ पवित्र ठहरही; अउ मालिक कर काम आही, अउ हर भला बुता बर तियार होही। 22 जवानी कर अभिलाषा मन ले भाग; अउ जेमन शुद्ध मन ले प्रभु कर नाव लेथे ओमन कर संग मे धार्मिकता, अउ बिश्वास, अउ प्रेम, अउ मेल-मिलाप कर पीछा कर। 23 पर मूर्खता अउ अबिद्धा कर बिवाद ले अलगेच रह; काबर कि तय जानथस कि एमन ले झगरा होथे। 24 प्रभु कर कमिया ला झगरा करे बाला नी होए बर चाही, पर ओहर सबेच कर संग कोमलता अउ शिक्षा मे निपूरन अउ शहनशील हो। 25 ओहर बिरोधी मन ला नम्रता ले समझाए, का जाने परमेश्वर ओमन ला मन फिराव कर मन दे देहे कि ओमन भी सत्य ला पहिचाने। 26 अउ एकर द्वारा ओकर इक्छा पूरा करे बर सचेत होए के शैतान कर फन्दा ले छुईट जाही। |
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.
Beyond Translation