2 थिस्सलुनी 3 - सरगुजिया बाइबिल

प्रार्थना करे कर निवेदन

¹ आखरी मे, हे भाई मन, हमर बर प्रार्थना करल करा, कि प्रभु कर बचन एसन जल्दी ले बगरे अउ महिमा पाए, जईसन तुमन मे होईस।

² अउ हमन टेड़हा अउ दुष्ट लोग मन ले बचे रही काबर कि हर एक मे बिश्वास नी है।

³ लेकिन प्रभु हर सच्चा है; ओहर तुमन मन ला मजबूत ले स्थिर करही अउ ओ दुष्ट ले सुरक्षित रखही।

⁴ हमन ला प्रभु मे तुमन उपर भरोसा है, कि जे-जे हुकूम हमन तुमन मन ला देहत आहन, ओमन ला तुमन हर मानत हा, अउ मानत भी रईहा।

⁵ परमेश्वर कर प्रेम अउ मसीह कर धीरज कती ले प्रभु तुमन मन कर अगुवाई करे।

आलस कर बिरोध मे चेतई

⁶ हे भाई मन, हमन अपन प्रभु यीशु मसीह कर नाव ले हुकूम देहथी; कि तुमन मन हर एक एसन भाई ले अलगेच रहा, जेहर अनुचित चाल चलथे, अउ जे शिक्षा ओहर हमन ले पईस, ओकर अनुसार नी करही।

⁷ काबर कि तुमन हर आप जानथा, कि कोन रीति ले हमन जईसन चाल चले बर चाही; काबर कि हमन तुमन मन कर मांझा मे अनुचित चाल झिन चलिहा।

⁸ अउ कोनोच कर रोटी मुफ्त मे नी खाए हन; पर मेहनत अउ कष्ट ले राएत दिन बुता धन्धा करत रहेन, कि तुमन मन कोनोच पर भार नी होई।

⁹ ये नही, कि हमन ला अधिकार नी है; पर एकरे बर कि अपन आप ला तुमन बर आदर्श ठहरईन, कि तुमन हमर नियर चाल चला।

¹⁰ काबर कि जब हमन तुमन कर हिया रहेन, तब भी ये हुकूम तुमन ला देहत रहेन, कि अगर कोनो हर बुता करे बर नी चाही, त खाए भी नी पाही।

¹¹ हमन सुनथन, कि कुछ लोग मन तुमन मन कर मांझा मे अनुचित चाल चलथे; अउ कुछ बुता नी करे, पर दूसर मन कर बुता मन मे हाथ डालथे।

¹² एसन मन ला हमन प्रभु यीशु मसीह मे हुकूम देहथी अउ समझाथन, कि चुप चाप बुता कईर के अपनेच ही रोटी खात रहा।

¹³ तुमन, हे भाई मन, भलाई करे मे साहस झिन छोड़ा।

¹⁴ अगर कोनोच हर हमर ये पत्री कर गोएठ ला नी मानही, त ओकर पर नजर रखा, अउ ओकर संगति झिन करा, जेकर ले ओहर लज्जित होही।

¹⁵ तबो ले ओला बैरी झिन समझा, पर भाई जाएन के चेतावा।

आखरी आशीर्वाद

¹⁶ जब प्रभु जेहर शान्ति कर सोता है अपन ही ओमन ला हमेसेच बर अउ हर नियर कर शान्ति देहे: प्रभु हमर सबेच कर संग मे रहे।

¹⁷ मै पौलुस अपन हाथ ले नमस्कार लिखथो। सबेच पत्री मे मोर एहिच चिन्हा है: कि मैहर एहिच नियर लिखथो।

¹⁸ हमर प्रभु यीशु मसीह कर अनुग्रह तुमन मन सबेच झन पर होवत रहे।