2 थिस्सलुनी 2 - सरगुजिया बाइबिल

पाप कर मैनसे मने की बिनाश कर बेटा

¹ हे भाई मन, अब हमन अपन प्रभु यीशु मसीह कर आए कर, अउ ओकर लिघे अपन जमा होए कर बिषय मे तुमन ले बिनती करथी।

² कि कोनो आत्मा, या बचन, या पत्री कर द्वारा, जेहर कि माना हमर कती होही, ये समेझ के कि प्रभु कर दिन हर आए पहुचिस है, तुमन कर मन अचानक अस्थिर न होए जाए अउ न तुमन मन घबरावा।

³ कोनोच रीति ले काकरो धोखा मे झिन अईहा, काबर कि ओ दिन नी आही, जब तक धर्म ला नी छोड़ही, अउ ओ पाप कर आदमी मने कि बिनाश कर बेटा परगट नी होही।

⁴ जेहर बिरोध करथे, अउ हर एक जे ईश्वर या पुज्य कहलाथे, अपन आप ला बड़खा ठहराथे, हिया तक कि ओहर परमेश्वर कर मन्दिर मे बईठ के अपन आप ला परमेश्वर ठहराथे।

⁵ का तुमन मन ला याद नी है, कि जब मैहर तुमन मन कर हिया रहे, त तुमन ले ये गोएठ मन ला कहत रहिस?

⁶ तुमन ओ चीज मन ला जानथा, जेहर ओला अभी रोकत आहे, कि ओ अपन ही समय मे परगट होए।

⁷ काबर कि अधर्म कर भेद हर अब ले भी बुता करत जाथे, पर अभी एक रोके बाला है, अउ जब तक ले ओहर दुरिहा नी होए जाही ओहर रोके रही।

⁸ जब ओ अधर्मी परगट होही, जेला प्रभु यीशु अपन मुंह कर फूक ले माएर डालही, अउ अपन आए कर तेज ले भष्म करही।

⁹ ओ अधर्मी कर आए बर शैतान कर बुता कर अनुसार सबेच नियर कर झूठा सामर्थ्य, अउ चिन्हा, अउ अदभुत बुता कर संग।

¹⁰ अउ नाएस होए बाला मन बर अधर्म कर सबेच नियर कर धोखा कर संग मे होही; काबर कि ओमन सत्य ले प्रेम नी करिन जेकर ले कि ओमन मन कर उद्धार होतीस।

¹¹ एहिच कारन परमेश्वर ओमन मन ले एक ला भटकाए देहे बाला सामर्थ्य ला भेजही कि ओमन झूठ कर बिश्वास करे।

¹² ताकि जेमन सत्य कर बिश्वास नी करथे, बरन अधर्म ले खुश होथे, ओमन सबेच दण्ड पाही।

मजबूत बने रहा

¹³ हे भाई मन, अउ प्रभु कर प्रिय लोग मन, चाही कि तुमन कर बिषय मे हमेसेच परमेश्वर कर धन्यवाद करत रहा, काबर कि परमेश्वर हर आदि ले तुमन मन ला चुईन लेहिस है; कि आत्मा कर द्वारा पवित्र बईन के, अउ सत्य कर बिश्वास कईर के उद्धार पावा।

¹⁴ जेकर बर ओहर तुमन हमर बर सुसमाचार कर द्वारा बुलईस, कि तुमन मन हमर प्रभु यीशु मसीह कर महिमा ला हासिल करा।

¹⁵ एकरे बर हे भाई मन, जमे रहा; अउ जे-जे गोएठ मन ला तुमन हर चाहे बचन या पत्री कर द्वारा हमन ले सिखे हा, ओमन ला थामे रहा।

¹⁶ हमर प्रभु यीशु मसीह अपन ही, अउ हमर दाऊ परमेश्वर, जेहर हमर ले प्रेम रखिस, अउ अनुग्रह ले अनन्त शान्ति अउ उत्तम आसरा देहिस आहे।

¹⁷ तुमन मन कर मन मे शान्ति देहे, अउ तुमन मन ला हर एक बड़िया बुता, अउ बचन मे मजबूत करे।