2 पतरस 2 - सरगुजिया बाइबिलबिनाशकारी नियम 1 जे नियर ओ लोग मन मे झूठ कर अगमजानी रहिन, ओहिच नियर तुमन मे भी झूठ कर उपदेशक होही, जेमन नाएस करे बाला पाखण्ड कर उदघाटन छिप-छिप के करही, अउ ओ प्रभु कर जेमन ला ओहर खरीदिस है इनकार करही, अउ अपन आप ला जलदिच बिनाश मे डाएल देही। 2 ढेरेच झन ओमन कर नियर लुचपन करही, जेकर कारन सत्य के डगर कर निन्दा करल जाही। 3 ओमन मन लोभ बर गोएठ बनाए के तुमन ला अपन लाभ कर कारन बनाही, अउ जे सजा कर आदेस ओमन पर आगू ले होए दारिस है, ओकर आए मे कुछ भी देरी नी है, अउ ओमन कर बिनाश हर भी नी उगे। झूठा गुरू जी मन कर न्याय 4 काबर कि जब परमेश्वर हर ओ दूत मन ला जेमन मन पाप करे ले नी छोड़िस नरक भेज के अन्धार कुण्ड मे डाएल देहिस, ताकि न्याय कर दिन तक ले बनधाए रहे। 5 अउ प्राचीन युग कर जगत ला भी नी छोड़िस बरन भक्तिहीन जगत पर महा जल प्रलय भेजिस, पर धार्मिकता कर प्रचारक नूह समेत आठ प्रानी मन ला बचाए लेहिस; 6 अउ सदोम अउ अमोरा कर नगर मन ला बिनाश कर एसन सजा देहिस कि ओमन ला भष्म कईर के राख मे मिलाए देहिस ताकि ओमन मन आए बाला भक्तिहीन लोग मन बर एक कहानी बने; 7 अउ धर्मी लूत ला जेहर अधर्मी मन कर अशुद्ध चाल चलन ले ढेरेच दुखी रहिस छुटकारा देहिस। 8 (काबर कि ओहर धर्मी ओमन कर मांझा मे रहत, अउ ओमन के अधर्म कर बुता ला देख, अउ सुईन के, सबेच दिन अपन सच्चा मन ला दुख देहत रहिस)। 9 त प्रभु हर भक्त मन ला परीक्षा ले हिकाएल लेहिस अउ अधर्मी मन ला न्याय कर दिन तक ले सजा कर दशा मे रखे बर भी जानथे। 10 बिशेष कईर के ओमन ला जेमन अशुद्ध अभिलाषा मन कर पाछू मे देह कर अनुसार रेंगथे, अउ प्रभुता ला तुच्छ जानथा। ओमन ढीठ, अउ हठी है, अउ ऊचा पद बाला मन ला बुरा भला कहे ले नी डरे। 11 तबो ले स्वर्गदूत जेहर शक्ति अउ सामर्थ्य मे ओमन ले बड़खा है, प्रभु कर आगू ओमन ला बुरा भला कही के दोष नी लगाथे। झूठा गुरू जी मन के भ्रष्ट काम 12 पर ये लोग मन बिन बुईध के पशु मन कर नियर है, जेमन धरे जाए बर अउ बिनाश होए बर उत्पन्न होईन है; अउ गोएठ मन ला नीच जाने ओमन मन कर बिषय मे दूसर झन मन ला बुरा भला कहथे, ओमन अपन सड़ाहट मे अपन ही सईर जाही। 13 दूसर कर बुराई करे कर बदला मे ओमन कर बुरा होही; ओमन ला दिन दुपहरी मे भोग बिलास करे बर भला लगथे; ये कलंक अउ दोष है; जब ओमन तुमन कर संग मे खाथे-पीथे, त अपन कती ले प्रेम भोज कईर के भोग-बिलास करथे। 14 ओमन कर आएख मे ब्यभिचार बसल आहे, अउ ओमन पाप करे बिन नी रुईक सके; ओमन चंचल मन बाला मन ला फुसलाए लेथे; ओमन कर मन ला लोभ करे कर अभ्यास होए गईस है; ओमन संताप कर संतान है। 15 ओमन सीधा डगर ला छोएड़ के भटेक गईन है, अउ अब ओकर बेटा बिलाम कर डगर पर होए लेहिन है; जेहर अधर्म कर मजदूरी ला प्रिय जानिन; 16 पर ओमन कर अपराध कर बिषय मे उलाहना देहल गईस है, हिया तक कि अबोल गदही हर लोग मन कर गोएठ ले ओ अगमजानी ला ओकर बावलापन ले रोकिस। 17 ये लोग मन सुखल कुआ, अउ आंधी बईहर कर उड़ाल बदरी है, ओमन बर अनन्त अन्धार ठहराल गईस है। झूठा गुरू जी मन कर धोखा 18 ओमन मन ब्यर्थ के घमण्ड कर गोएठ कईर के लुचपन कर बुता के द्वारा, ओ लोग मन ला शाररिक अभिलाषा मे फसाए लेथे, जेमन भटकल मन ले अभी हिकलत है। 19 ओहर ओमन ला स्वतंत्र करे कर प्रतिज्ञा त करथे, पर अपन मन ही सड़ाहट कर कमिया है; काबर कि जेहर ओकर ले हाएर गईस है, ओहर ओकर कमिया बईन जाथे। 20 जब ओमन प्रभु अउ उद्धारकर्ता यीशु मसीह कर पहिचान कर द्वारा संसार कर कई नियर कर अशुद्ध ले बईच हिकलिन, अउ फिर ओमे फईस के हाएर गईन, त ओमन कर पाछू कर दशा आगू ले भी बुरा होए जाथे। 21 काबर कि धार्मिकता कर डगर ला नी जाना भी ओमन बर एकर ले भला होतीस कि ओला जाएन के, ओ पवित्र आदेस ले फिर जाथे, जेला ओमन मन ला सौपल गए रहिस। 22 ओमन पर ये कहावत ठीक बईठथे, कि कूकुर हर भी अपन छाट कती अउ नहलाल बरहा हर चिखला मे लेटे बर फिर चईल जाथे। |
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.
Beyond Translation