2 कुरिन्थी 9 - सरगुजिया बाइबिलमदत करे बर उत्साहित करई 1 अब ओ सेवा कर बिषय मे जेहर पवित्र मैनसे मन बर करल जाथे, मोला तुमन मन ला लिखे बर जरूरेच नी है। 2 काबर कि मैहर तुमन मन कर मन के तियारी ला जानथो, जेकर कारन मैहर तुमन मन कर बिषय मे मकिदुनिया नगर कर निवासी मन कर आगू मे घमण्ड दिखाथो कि अखाया परदेस कर लोग मन एक बरस ले तियार है, अउ तुमन मन कर उत्साह हर अउ ढेरेच झन मन ला उभारिस आहे। 3 लेकिन मैहर भाई मन ला एकरे बर भेजे हो, कि हमन मन जे घमण्ड ला तुमन मन कर बिषय मे दिखाए, ओहर ये गोएठ हर ब्यर्थ झिन ठहरे; लेकिन जईसन मैहर कहे; ओहिच कस तुमन मन भी तियार रहा। 4 एसन झिन होए कि अगर कोनो हर मकिदुनिया नगर कर निवासी मोर संग मे आए, अउ तुमन मन ला तियार नी पाही, त का जाने, ये भरोसा कर कारन हमन मन (ये नी कहथन कि तुमन मन) लजाए। 5 एकरे बर मैहर भाई मन ले ये बिनती करे बर जरूरेच समझे कि ओहर आगू ले तुमन मन कर लिघे जाए, अउ तुमन मन कर उदारता कर फर जेकर बिषय मे आगू ले बचन देहल गए रहिस, तियार कईर के रखे, कि ये दबाव ले नही लेकिन उदारता कर फर नियर तियार होए। बड़िया दान देहे बाला मन 6 लेकिन ये गोएठ त ये है, जेहर तनिक बुनथे, ओहर तनिक काटथे भी; अउ जेहर बगरा बुनथे, ओहर बगरा काटही। 7 हर एक जन जईसन मन मे ठाने ओहिच कस दान करे; न कुड़कुड़ाए के अउ न दबाव ले, काबर कि परमेश्वर हर हर्ष ले देहे बाला ले प्रेम रखथे। 8 परमेश्वर सबेच नियर कर अनुग्रह तुमन मन ला बहुताएत ले दे सकथे जेकर ले हर गोएठ मे अउ हर समय, सबेच कुछ, जेकर तुमन मन ला जरूरत होही, तुमन मन कर लिघे रहे; अउ हर एक भला बुता बर तुमन मन कर लिघे ढेरेच कुछ होए। 9 जईसन लिखल आहे, “ओहर बगरईस, ओहर कंगाल मन ला दान देहिस, ओकर धार्मिकता हमेसेच बने रही।” 10 तले जे बुने बाला ला बिहन अउ खाना बर रोटी देथे, ओहर तुमन मन ला बिहन देही, अउ ओला फर दार बनाही; अउ तुमन मन कर धर्म कर फर ला बड़हाही। 11 तुमन मन हर गोएठ मे सबेच नियर कर उदारता बर जेहर हमर द्वारा परमेश्वर कर धन्यवाद करवाथे, धनवान करल जईहा। 12 काबर कि ये सेवा कर पूरा करे ले न केबल पवित्र लोग मन कर जरूरत पूरा होथे, लेकिन लोग मन कती ले परमेश्वर कर भी ढेरेच धन्यवाद होथे। 13 काबर कि ये सेवा ला प्रमान स्वीकार कईर के ओमन मन परमेश्वर कर महिमा परगट करथे कि तुमन मसीह कर सुसमाचार ला माएन के ओकर अधीन रहथा, अउ ओमन मन अउ सबेच कर सहायता करे मे उदारता परगट करथा। 14 अउ ओमन मन तुमन मन बर प्रार्थना करथे; अउ एकरे बर कि तुमन मन पर परमेश्वर कर बड़ा ही अनुग्रह है, तुमन मन कर लालसा करथे। 15 परमेश्वर कर, ओकर ओ दान बर जेहर बखान ले बाहर है, धन्यवाद होए। |
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.
Beyond Translation