2 कुरिन्थी 6 - सरगुजिया बाइबिल

सेवकाई कर अनुभव

¹ हमन मन परमेश्वर कर सहकर्मी हन ये भी समझथन, कि ओकर अनुग्रह जेहर तुमन मन पर होईस, ओला ब्यर्थ झिन जाए दा।

² काबर कि ओहर त कहथे, “अपन प्रसन्ता कर घरी मे मैहर तोर ला सुईन लेहे, अउ उद्धार कर दिन मैहर तोर सहायता करे।” देखा, अझे ओ प्रसन्ता कर घरी है; देखा, अझे ओ उद्धार कर दिन है।

पौलुस कर कठिनाई मन

³ हमन मन कोनो गोएठ मे ठोकर खाए कर कोनो भी मौका नी देथे, ताकि हमर सेवा पर कोनो दोष झिन आए।

⁴ लेकिन हर गोएठ ले परमेश्वर कर सेवक मन नियर अपन सदगुन ला परगट करथे, बड़खा हिम्मत ले, क्लेश मन ले, दरिद्रता ले, संकट मन ले,

⁵ कोड़ा खाए ले, कैद होए ले, हुल्लड़ मन ले, मेहनत ले, जागत रहे ले, उपवास करे ले,

⁶ पवित्रता ले, ज्ञान ले, धीरज ले, कृपालु ले, पवित्र आत्मा ले,

⁷ सहिच कर प्रेम ले, सत्य कर बचन ले, परमेश्वर कर सामर्थ्य ले, धार्मिकता कर हथियार मन ले, जेहर जेवनी-डेरी हाथ मन मे है,

⁸ आदर अउ निरादर ले, दुरनाव अउ सुनाव ले। मने कि भरमाए बाला जईसन पता चलथे तबो ले सच्चा है।

⁹ अनजान मन जईसन है, तबो ले नामी हन; मरल मन कर नियर है अउ देखा जीवित है; मार खाए बाला मन जईसन है लेकिन प्रान ले मारे नी जाथे।

¹⁰ दुख करे बाला कर जईसन है, लेकिन हमेसेच आनन्द करथे, कंगाल मन कर जईसन है, लेकिन ढेरेच झन मन ला धनवान बनाए देथे; एसन है जईसन हमर जग कुछ नी है, तबो ले सबेच रखथे।

¹¹ हे कुरिन्थ के लोग मन, हमन मन खुईल के तुमन मन ले गोठियाए हो, हमर हृदय तुमन कती बर खुलल आहे।

¹² तुमन मन बर हमर मन मे कोनोच संकोच नी है, पर तुमन मन कर मन मे संकोच है।

¹³ पर अपन लईका जाएन के तुमन मन ले कहथो कि तुमन मन भी ओकर बदला मे अपन हृदय ला खोएल दा।

हमन मन परमेश्वर कर मन्दिर हन

¹⁴ अबिश्वासी मन कर संग असमान जूवा मे झिन जोता, काबर कि धार्मिकता अउ अधर्म कर का मेल-जोल? या ज्योति अउ अन्धार कर का संगति?

¹⁵ अउ मसीह कर बलियार कर संग का लगाव? या बिश्वासी कर संग अबिश्वासी कर का नाता?

¹⁶ अउ मूरती कर संग परमेश्वर कर मन्दिर कर का सम्बन्ध? काबर कि हमन मन त जीवित परमेश्वर कर मन्दिर हन; जईसन परमेश्वर हर कहिस है, “मैहर ओमन मन मे बसहू अउ ओमन मन मे चलहू फिरहू; अउ मैहर ओकर परमेश्वर होहू, अउ ओमन मन मोर लोग होही।”

¹⁷ एकरे बर प्रभु हर कहथे, “ओमन मन कर मांझा मे ले हिकला अउ अलगेच रहा; अउ अशुद्ध चीज मन ला मत छुवा, त मैहर तुमन मन ला गरहन करहू;

¹⁸ अउ मैहर तुमन मन कर परमेश्वर दाऊ होहू, अउ तुमन मन मोर बेटा अउ बेटी होईहा। ये सर्वशक्तिमान प्रभु परमेश्वर कर बचन है।”