2 कुरिन्थी 2 - सरगुजिया बाइबिलअपन प्रेम के साबित करई 1 मैहर अपन मन मे एहिच ठाएन लेहे हो कि फिर तुमन मन जग उदास करे बर नी आहू। 2 काबर कि अगर मैहर तुमन मन ला उदास करहू, त मोला आनन्द देहे बाला कोन होही, केबल ओहिच जे के ला मैहर उदास करे रहे? 3 अउ मैहर एहिच गोएठ तुमन मन ला एकरे बर लिखे कि कहो एसन झिन होए कि मोर आए पर, जेमन ले मोला आनन्द मिले बर रहिस, मैहर ओमन मन ले उदास हो; काबर कि मोला तुमन मन सबेच झन पर ये गोएठ कर भरोसा है कि जेहर मोर आनन्द है, ओहिच हर तुमन मन कर भी है। 4 बड़खा क्लेश अउ मन कर कष्ट ले मैहर ढेरेच आसू बहाए-बहाए के तुमन मन ला लिखे रहे, एकरे बर नही कि तुमन मन उदास हा, लेकिन एकरे बर कि तुमन मन ओ बड़खा प्रेम ला जाएन ला, जेहर मोला तुमन मन ले है। पापी मन ला माफ करई 5 अगर कोनो हर उदास करिस है, त मोला ही नही बरन (कि ओकर संग मे ढेरेच कड़ाई झिन करा) कुछ-कुछ तुमन मन सबेच झन ला उदास करिस। 6 एसन लोग मन बर ये सजा जेहर भाई मन ले ढेरेच झन मन देहिन, ढेरेच है। 7 एकरे बर एकर ले भला ये है कि ओकर अपराध ला छमा करा अउ शान्ति दा, न हो कि एसन मैनसे ढेरेच उदासी मे डूईब जाही। 8 ये कारन मैहर तुमन मन ले बिनती करथो कि मोला अपन प्रेम कर प्रमान दा। 9 काबर कि मैहर एकरे बर लिखे रहे, कि तुमन मन ला परख लो, कि तुमन मन मोर सबेच गोएठ के माने बर तियार हा, कि नही। 10 जे के ला तुमन मन छमा करथा ओला मैहर भी छमा करथो, काबर कि मैहर भी जेला छमा करे हो, अगर करे हा, त तुमन मन के कारन मसीह कर जगहा मे होए के छमा करे हो। 11 कि शैतान कर दाव हमर पर झिन चले, काबर कि हमन मन ओकर चाल मन ले अनजान नी हन। मकिदुनिया बर सफर 12 जब मैहर मसीह कर सुसमाचार, सुनाए बर त्रोआस शहर आए, अउ प्रभु हर मोर बर एक दूरा ला खोएल देहिस। 13 त मोर मन मे चैन नी मिलिस, एकरे बर कि मैहर अपन भाई तीतुस ला नी पाए; एकरे बर ओमन मन ले बिदा होए के मैहर मकिदुनिया नगर मे चईल गए। मसीही सेवक-जीवन कर सुगन्ध 14 लेकिन परमेश्वर कर धन्यवाद हो, जेहर मसीह मे हमेसेच हमन मन ला जय कर उत्सव मे ले के फिरथे, अउ अपन ज्ञान कर सुगन्ध ला हमर द्वारा सबेच जगहा मे फईलाथे। 15 काबर कि हमन मन परमेश्वर कर लिघे उद्धार पाए बाला मन बर अउ नाएस होए बाला दोनोच बर मसीह कर सुगन्ध हन। 16 कुछ मन बर त मरे कर निमित मृत्यु कर गन्ध, अउ केतेक झन बर जीवन कर निमित जीवन कर सुगन्ध। भला ये गोएठ कर लाएक कोन है? 17 काबर कि हमन मन ओ ढेरेच झन मन कर नियर नही जेमन हर परमेश्वर कर बचन मे मिलावट करथे; लेकिन मन कर सच्चाई ले अउ परमेश्वर कती ले परमेश्वर ला उपस्थित जाएन के मसीह मे बोलथन। |
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.
Beyond Translation