2 कुरिन्थी 13 - सरगुजिया बाइबिलआखरी चेतई 1 अब तीसर तोर तुमन मन कर लिघे आत हो: दूई या तीन गवाह मन कर मुह ले हर एक गोएठ हर ठहराल जाही। 2 जईसन मैहर जब दूसर तोर तुमन मन कर संग रहे, ओहिच कस अब दुरिहा रहत ओ लोग मन ले जेमन मन आगू पाप करिन, अउ दूसर सबेच लोग मन ले अब आगू ले कह देहथो कि अगर मैहर फिर आहू त नी छोड़हू, 3 काबर कि तुमन मन त एकर प्रमान चाहथा कि मसीह हर मोर मे गोठियाथे, जेहर तुमन मन बर कमजोर नही लेकिन तुमन मन मे सामर्थी है। 4 ओहर कमजोरी कर कारन क्रूस पर चड़हाल त गईस, तबो ले परमेश्वर कर सामर्थ्य ले जीवित है। हमन मन भी ओमे कमजोर हन, लेकिन परमेश्वर कर सामर्थ्य ले जेहर तुमन मन बर है, ओकर संग मे जीयब। 5 अपन आप ला परखा कि बिश्वास मे हा कि नही। अपन आप ला जांचा। का तुमन मन हर अपन बिषय मे ये नी जाना कि यीशु मसीह हर तुमन मन मे है? नही त तुमन मन कर जांच मे निकम्मा हिकले हा। 6 पर मोर आसरा है, कि तुमन मन जाएन लेईहा, कि हमन मन निकम्मा नी हन। 7 हमन मन अपन परमेश्वर ले ये प्रार्थना करथी कि तुमन मन कोनोच बुराई झिन करा एकरे बर नही कि हमन मन खरा दिखब, पर एकरे बर कि तुमन मन भलाई करा, चाहे हमन मन निकम्मा ही ठहरब। 8 काबर कि हमन मन सत्य कर बिरोध मे कुछ नी कईर सकब, पर सत्य बर कईर सकथी। 9 जब हमन मन कमजोर हन अउ तुमन मन बलवन्त हा, त हमन मन खुश होथन, अउ ये प्रार्थना भी करथी कि तुमन मन सिद्ध होए जावा। 10 ये कारन मैहर तुमन मन कर पीठ पीछू ये गोएठ मन ला लिखथो, कि उपस्थित होए के मोला ओ अधिकार कर अनुसार जेला प्रभु हर बिगाड़े बर नही पर बनाए बर मोला देहिस आहे, कड़ाई ले कुछ भी करे बर झिन पड़े। आशीर्वाद सबेच झन बर 11 तले हे भाई मन, खुश रहा; सिद्ध बनत जावा; ढाढ़स रखा; एक ही मन रखा; मेल ले रहा। अउ प्रेम अउ शान्ति कर दाता परमेश्वर तुमन मन कर संग मे रहे। 12 एक दूसर ला पवित्र चुम्बन ले नमस्कार करा। 13 सबेच पवित्र लोग मन तुमन मन ला नमस्कार करथे। 14 प्रभु यीशु मसीह कर अनुग्रह अउ परमेश्वर कर प्रेम अउ पवित्र आत्मा कर सभागिता तुमन मन सबेच झन कर संग मे होवत रहे। |
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.
Beyond Translation