2 कुरिन्थी 11 - सरगुजिया बाइबिलबिश्वासी मन कर बिश्वास योग्यता बर चिन्ता 1 अगर तुमन मन मोर तनिक अकुन मूर्खता सह लेता त का ही बड़िया होतीस; हा, मोर ला भी सह ला। 2 काबर कि मैहर तुमन मन कर बिषय मे ईश्वरीय धुन लगाए रहथो, एकरे बर कि मैहर एक ही आदमी ले तुमन मन कर गोएठ लगाए हो कि तुमन ला पवित्र कुवारी कर नियर मसीह ला सौप देहू। 3 लेकिन मैहर डरथो कि जईसन साप हर अपन चतुराई ले हव्वा ला बहकईस, ओहिच कस तुमन कर मन ओ सिधाई अउ पवित्रता ले जेहर मसीह कर संग होए बर चाही, कहो खराब झिन होए जाए। 4 अगर कोनो हर तुमन मन जग आए के कोनो दूसर यीशु कर प्रचार करही, जेकर प्रचार हमन मन नी करे ही; या कोनो अउ आत्मा तुमन मन ला मिलल है, जेहर आगू नी मिले रहिस; या अउ कोनो सुसमाचार सुनाए जेला तुमन मन आगू ले नी माने रहा, त तुमन मन ओला सह लेथा। पौलुस अउ झूठ कर प्रेरित मन 5 मैहर त समझथो कि मैहर कोनो गोएठ मे बड़ा ले बड़ा प्रेरित मन ले कम नी हो। 6 अगर मैहर भाषन मे अनाड़ी हो, तबो ले ज्ञान मे नही। हमन मन एमन मन ला हर गोएठ मे सबेच नियर कर तुमन हर परगट करे हा। 7 का एमे मैहर कुछ पाप करे कि मैहर तुमन मन ला परमेश्वर कर सुसमाचार सेत-मेत सुनाए; अउ अपन आप ला खाल्हे करे कि तुमन मन उपर होए जाओ? 8 मैहर दूसर कलीसिया मन ला लुटे, मने कि मैहर ओमन मन ले मजदूरी लेहे ताकि तुमन मन कर सेवा करो। 9 अउ जब मैहर तुमन मन कर संग मे रहे अउ मोला घटी होईस, त मैहर कोनो पर भार ला नी डाले, काबर कि भाई मन मकिदुनिया नगर ले आए के मोर घटी ला पूरा करिन; अउ मैहर हर एक गोएठ मे अपन आप ला तुमन मन पर भार बने ले रोके रहे, अउ रोके भी रहू। 10 अगर मसीह कर सच्चाई मोर मे है, त अखाया परदेस मे कोनो हर मोला ये घमण्ड ले झिन रोके। 11 काबर? एकरे बर कि मैहर तुमन मन ले प्रेम नी रखा? परमेश्वर ये जानथे कि मैहर प्रेम रखथो। 12 लेकिन जेला मैहर करथो, ओहिच ला करत रहू कि जे लोग मन दाव खोजथे ओमन मन ला मैहर दाव पाए ले नी देहू, ताकि जे गोएठ मे ओमन मन घमण्ड करथे, ओमे ओमन मन हमर जईसन ही ठहरे। 13 काबर कि एसन लोग मन झूठ कर प्रेरित, अउ छल कर बुता करे बाला, अउ मसीह कर प्रेरित मन कर रूप धरे बाला है। 14 ये कुछ अचम्भा कर गोएठ नी है काबर कि शैतान अपन ही ज्योर्तिमय स्वर्गदूत कर रूप ला धरथे। 15 एकरे बर अगर ओकर सेवक भी धर्म कर सेवक मन जईसन रूप ला धरही, त कोनो बड़खा गोएठ नी है, लेकिन ओमन मन कर अन्त ओमन कर बुता मन के अनुसार होही। मसीह बर दुख उठई 16 मैहर फिर कहथो, कोनो हर मोला मूर्ख झिन समझे; नही त मूर्ख ही समेझ के मोर सह ला, ताकि तनिक अकुन मैहर भी घमण्ड कईर सको। 17 ये बेधड़क घमण्ड मे जे कुछ मैहर कहथो, ओहर प्रभु कर हुकूम कर अनुसार नी है पर माना मूर्खता ले ही कहथो। 18 जब कि ढेरेच झन मन देह कर अनुसार घमण्ड करथे, त मैहर भी घमण्ड करहू। 19 तुमन मन त सझदार होए के आनन्द ले मूर्ख मन कर सह लेथा। 20 काबर कि जब तुमन मन ला कोनो हर कमिया बनाए लेथे, या खाए जाथे, या फसाए लेथे या अपन आप ला बड़खा बनाथे, या तुमन मन कर मुह पर झापड़ मारथे, त तुमन मन सह लेथा। 21 मोर गोठियाए से अनादर ही कर रीति पर है, माना हमन मन एकरे बर कमजोर रहेन। लेकिन जे कोनो गोएठ मे कोनोच साहस करथे मैहर मूर्खता ले कहथो त मैहर भी साहस करथो। 22 का ओमन मन ही इब्रानी है? मैहर भी हो। का ओमन मन ही इस्राएली है? मैहर भी हो। का ओमन मन ही अब्राहम कर बंश ले है? मैहर भी हो। 23 का ओमन मन ही मसीह कर सेवक है मैहर पागल जईसन कहथो मैहर ओमन मन ले बईढ़ के हो! ज्यादा मेहनत करे मे; बार-बार कैद होए मे; कोड़ा खाए मे; बार-बार मृत्यु कर जोखिम मन मे। 24 पाच बार मैहर यहूदी मन कर हाथ ले उन्तालीस-उन्तालीस कोड़ा खाए। 25 तीन बार मैहर बेत खाए; एक बार मोर पर पखना मन ले मारिन; तीन बार जहाज, जेमन पर मैहर चड़हे रहे टुईट गईस; एक राएत-दिन मैहर समुन्दर मे काटे। 26 मैहर बार-बार सफर मन मे; नदी मन कर जोखिम मे; डाकू मन कर जोखिम मन मे; अपन जाएत बाला मन कर जोखिम मन मे; दूसर जाएत मन कर जोखिम मन मे; शहर मन कर जोखिम मन मे; जंगल कर जोखिम मन मे; समुन्दर कर जोखिम मन मे; झूठा भाई मन कर मांझा मे रहे। 27 मेहनत अउ कष्ट मे; बार-बार जागत रहे मे; भूख-प्यास मे; बार-बार उपवास करे मे; जाड़ मे; उघाड़े रहे मे; 28 अउ दूसर गोएठ ला छोएड़ जेकर बखान मैहर नी करथो, सबेच कलीसिया मन कर चिन्ता हर दिन मोला दबाथे। 29 काकर कमजोरी ले मैहर कमजोर नी होथो? काकर ठोकर खाए ले मोर जीव हर नी दुखे? 30 अगर घमण्ड करे बर जरूरेच है, त मैहर अपन कमजोर कर गोएठ पर घमण्ड करहू। 31 प्रभु यीशु कर परमेश्वर अउ दाऊ कर जे हमेसेच धन्य है, जानथा कि मैहर झूठ नी बोलो। 32 दमिश्क नगर मे अरितास राजा कती ले जेहर हाकिम रहिस, ओहर मोला पकड़े बर दमिश्किय मन कर नगर पर पहिरा बईठाए रखे रहिस, 33 अउ मैहर पथिया मे खिड़की ले होए के दीवार पर ले उतारल गए, अउ ओकर हाथ ले बईच हिकले। |
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.
Beyond Translation