1 तीमुथियुस 1 - सरगुजिया बाइबिलनमस्कार 1 पौलुस कती ले जेहर तुमन कर उद्धारकर्ता परमेश्वर, अउ हमर आसरा कर अधार मसीह यीशु कर आदेस ले मसीह यीशु कर प्रेरित है, 2 तीमुथियुस कर नाव जेहर बिश्वास मे मोर सच्चा बेटा है: दाऊ परमेश्वर, अउ हमर प्रभु मसीह यीशु कती ले तोला अनुग्रह, अउ दया अउ शान्ति मिलत रहे। झूठ के शिक्षा कर बिरोध मे चेतई 3 जईसन मैहर मकिदुनिया नगर जात घनी तोला समझाए रहे, कि इफिसुस नगर मे रह के कुछ लोग मन ला आदेस दे कि दूसर नियर कर शिक्षा झिन देहे, 4 अउ ओ कहानी मन अउ अनन्त बंशावली मन पर मन झिन लगाए, जेकर ले बिवाद होथे; अउ परमेश्वर के ओ प्रबन्ध कर अनुसार नही, जेहर बिश्वास पर आधारित है; ओहिच कस फिर भी कहथो। 5 आदेस कर साराश ये है कि शुद्ध मन अउ बड़िया बिवेक, अउ कपट रहित बिश्वास ले प्रेम उत्पन्न होए। 6 एमन ला छोएड़ के केतेक लोग मन बकवास कती फिर गईन है, 7 अउ ब्यवस्थापक त होए बर चाहथे, पर जे गोएठ कहथे अउ जेला मजबूती ले गोठियाथे, ओमन मन ला समझथे भी नही। 8 पर हमन मन जानथन कि अगर कोनोच हर ब्यवस्था ला ब्यवस्था कर उचित रीति ले बुता मे लाही त ओहर भला है। 9 ये जाएन के कि ब्यवस्था धर्मी जन बर नही पर अधर्मी मन बर, निरंकुश, भक्तिहीन, पापी, अपवित्र अउ अशुद्ध लोग मन, दाऊ दाई मन कर मारे बाला, हत्यारा, 10 ब्यभिचारी, पुरूषगामी, लोग मन के बेचे बाला, झूठ बोले बाला, अउ झूठ कर कसम खाए बाला, अउ एमन कर अउ दूसरा खरा उपदेश के सबेच बिरोधी मन बर ठहराल गईस है। 11 एहिच हर परम धन्य परमेश्वर के महिमा कर ओ सुसमाचार के अनुसार है, जेला मोला सौपल गईस है। पौलुस कर गवाही 12 मैहर अपन प्रभु मसीह यीशु कर जेहर मोला सामर्थ्य देहिस आहे, धन्यवाद करथो; कि ओहर मोला बिश्वास योग्य समेझ के अपन सेवा बर ठहरईस। 13 मैहर त आगू ले निन्दा करे बाला, अउ सताए बाला, अउ अन्धेर करे बाला रहे; तबो ले मोर पर दया होईस, काबर कि मैहर अबिश्वास कर दसा मे बिन समझे बुझे ये बुता ला करे रहे। 14 अउ हमर प्रभु कर अनुग्रह ओ बिश्वास अउ प्रेम कर संग जेहर मसीह यीशु मे है, बहुताएत ले होईस। 15 ये गोएठ सहिच अउ हर प्रकार ले माने कर लाएक है कि मसीह यीशु पापी मन कर उद्धार करे बर जगत मे अईस, जेमे सबले बड़खा मैहर हो। 16 पर मोर पर एकरे बर दया होईस कि मोर सबले बड़खा पापी मे यीशु मसीह अपन पूरा सहनशीलता दिखाए, कि जे लोग मन ओकर पर अनन्त जीवन बर बिश्वास करही ओमन बर मैहर एक नमूना बनो। 17 अब सनातन राजा मने कि अबिनाशी, अनदेखल, एकेच ठे परमेश्वर कर आदर अउ महिमा हमेसेच होवत रहे। आमीन। तीमुथियुस कर जिम्मेदारी 18 हे बेटा तीमुथियुस, ओ भविष्यवानी मन कर अनुसार जेला आगू तोर बिषय मे करल गए रहिस, मैहर ये आदेस सौपथो, कि तय ओमन कर अनुसार बड़िया लड़ाई ला लड़त रह, 19 अउ बिश्वास अउ बड़िया बिवेक ला थामे रह, जेला दुरिहा करे कर कारन केतेक झन मन कर बिश्वास रूपी डोंगा डूईब गईस। 20 ओहिच मन ले हुमिनयुस अउ सिकन्दर है, जेमन ला मैहर शैतान ला सौप देहे हो कि ओहर परमेश्वर कर निन्दा करे बर झिन सिखे। |
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.
Beyond Translation