1 थिस्सलुनी 5 - सरगुजिया बाइबिलफिर ले आए बर तियार रईहा 1 पर हे भाई मन, एकर योजना नी है कि समय अउ काल मन कर बिषय मे तुमन मन कर लिघे कुछ लिखल जाए। 2 काबर कि तुमन अपन ही बड़िया जानथा कि जईसन राएत मे चोरहा हर आथे, ओहिच कस ही प्रभु कर दिन भी आए बाला है। 3 जब लोग मन कहत रही, “कुशल है, अउ कुछ भी भय नी है,” त ओमन पर एका-एक बिनाश हर आए पड़ही, जे नियर गर्भवती पर दर्द; अउ ओमन कोनोच रीति ले नी बचही। 4 पर हे भाई मन, तुमन त अन्धार मे नी हा कि ओ दिन हर तुमन पर चोरहा नियर आए पड़ही। 5 काबर कि तुमन सबेच ज्योति कर संतान, अउ दिन कर संतान हा, हमन न राएत कर हन, न अन्धार कर हन। 6 एकरे बर हमन दूसर मन कर नियर सूतत नी रहब, पर जागत अउ सावधान रहब। 7 काबर कि जेमन मन सोथे, ओमन राएत ही मे सूतथे, अउ जेहर मतवार होथे, ओमन राएत ही मे मतवार होथे। 8 पर हमन दिन कर हन, बिश्वास अउ प्रेम कर झिलम पहिन के अउ उद्धार कर आसरा कर टोपी ला पहिन के सावधान रहब। 9 काबर कि परमेश्वर हर हमन ला गुस्सा बर नही, लेकिन एकरे बर ठहरईस कि हमन अपन प्रभु यीशु मसीह कर द्वारा उद्धार ला पाबो। 10 ओहर हमर बर ये कारन मरिस, कि हमन चाहे जागत रही, चाहे सोवत रही, सबेच ला मिलाए के ओकरेच संग जीएब। 11 ये कारन एक दूसर ला शान्ति देवा, अउ एक दूसर कर उन्नति कर कारन बना, जईसन कि तुमन मन करथा भी। कलीसिया ला उपदेश 12 हे भाई मन, हमन मन तुमन ले बिनती करथन, कि जेमन मन तुमन मे मेहनत करथन, अउ प्रभु मे तुमन कर अगुवा है, अउ तुमन मन ला शिक्षा देथन, ओमन मन ला माना। 13 अउ ओकर बुता मन कर कारन प्रेम कर संग ओमन ला ढेरेच ही आदर कर लाएक समझा। अपन मे मेल-मिलाप ले रहा। 14 हे भाई मन, हमन तुमन ला समझात हन कि जेमन मन ठीक चाल नी चलथे, ओमन मन ला समझावा, काएर मन ला ढाढ़स दा, निर्बल मन ला सम्भाला, सबेच कती ले सहनशीलता ला दिखावा। 15 सावधान रहा! कोनो हर कोई बुराई कर बदला मे बुराई झिन करा; पर हमेसेच भलाई करे बर तत्पर रहा, अपन मे अउ सबले भी भलाई कर ही चेष्टा करा। 16 हमेसेच आनन्दित रहा। 17 लगातार प्रार्थना मे लगे रहा। 18 हर गोएठ मे धन्यवाद करा: काबर कि तुमन बर मसीह यीशु मे परमेश्वर कर एहिच इक्छा है। 19 आत्मा ला झिन बुझावा। 20 भविष्यवानी मन ला तुच्छ झिन जानिहा। 21 सबेच गोएठ मन ला परखा; जेहर बड़िया है ओला धरे रहा। 22 सबेच नियर कर बुराई मन ले बचे रहा। आशीर्वाद 23 शान्ति कर परमेश्वर हर अपन ही तुमन ला पूरेच रीति ले पवित्र करे; अउ तुमन कर आत्मा, प्रान, अउ देह हमर प्रभु यीशु मसीह कर आए तक पूरा पूरा अउ बिन दोष कर सुरक्षित रखे। 24 तुमन कर बुलाए बाला बिश्वास योग्य है, अउ ओहर एहिच कस करही। 25 हे भाई मन, हमर बर प्रार्थना करा। 26 सबेच भाई मन ला पवित्र चुम्बन ले नमस्कार करा। 27 मैहर तुमन ला प्रभु कर कसम देहथो, कि ये पत्री ला सबेच भाई मन ला पईढ़ के सुनाल जाए। 28 हमर प्रभु यीशु मसीह कर अनुग्रह तुमन मन मे होवत रहे। |
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.
Beyond Translation