1 थिस्सलुनी 3 - सरगुजिया बाइबिलबिश्वास बर चिन्ता 1 एकरे बर जब हमन मन ले अउ नी रहल गईस, त हमन मन हर ये ठहराएन कि एथेन्स शहर मे अकेलेच रह जई। 2 अउ हमन मन तीमुथियुस ला, जेहर मसीह कर सुसमाचार मे हमर भाई, अउ परमेश्वर कर सेवक है, एकरे बर भेजेन, कि ओहर तुमन मन ला जमाही; अउ तुमन मन कर बिश्वास कर बिषय मे तुमन मन ला समझाए। 3 कि कोनो झन मन ये क्लेश मन कर कारन डगमगाए झिन जाए; काबर कि तुमन अपनेच ही जानथा, कि हमन हर एकरेच बर ठहराल गए हन। 4 काबर कि अगुच ले ही, जब हमन मन तुमन हिया रहेन, त तुमन ले कहत रहेन कि हमन ला क्लेश उठाए बर पड़ही, अउ ओहिच कस होईस है, जईसन कि तुमन मन हर जानत भी हा। 5 ये कारन जब मोर ले अउ नी रहल गईस, त तुमन कर बिश्वास कर हाल ला जाने बर भेजे, कि कही एसन झिन होए, कि परीक्षा करे बाला हर तुमन कर परीक्षा करिस होही, अउ हमर मेहनत ब्यर्थ होए गईस होही। तीमुथियुस कर द्वारा उत्साहित 6 पर अझे तीमुथियुस हर, जेहर तुमन मन जग ले हमर हिया अईस है, तुमन कर बिश्वास अउ प्रेम कर सुसमाचार सुनईस, अउ ये गोएठ ला भी सुनईस, कि तुमन मन हमेसेच प्रेम के संग मे हमन मन ला याद करथा, अउ हमन मन ला देखे कर लालसा रखथा, जेकस कि हमन मन भी तुमन मन ला देखे कर। 7 एकरे बर हे भाई मन, हमन हर अपन सबेच दुख अउ क्लेश मे तुमन कर बिश्वास ले तुमन कर बारे मे शान्ति पाएन। 8 काबर कि अगर तुमन मन प्रभु मे जमे रईहा त हमन मन जीवित हन। 9 अउ जेकस आनन्द हमन ला तुमन कर कारन अपन परमेश्वर कर आगू है, ओकर बदला मे तुमन कर बिषय मे हमन कोन रीति ले परमेश्वर कर धन्यवाद करब? 10 हमन राएत-दिन ढेरेच ही प्रार्थना करत रहथन, कि तुमन कर मुह ला देखी, अउ तुमन के बिश्वास कर घटी ला पूरा करब। कलीसिया बर प्रार्थना 11 अब हमर परमेश्वर अउ दाऊ अपन ही अउ हमर प्रभु यीशु, तुमन कर हिया आए बर हमर अगुवाई करही। 12 अउ प्रभु एसन करही कि जईसन हमन मन तुमन ले प्रेम रखथी; ओहिच कस तुमन कर प्रेम हर भी अपन मे अउ सबेच आदमी मन कर संग बड़हत, अउ बड़हत जाए, 13 ताकि ओहर तुमन मन कर मन ला एसन जमाही, कि जब हमर प्रभु यीशु अपन सबेच पवित्र आदमी मन कर संग मे आही, त ओहर हमर परमेश्वर अउ दाऊ कर आगू पवित्रता मे बिन दोष कर ठहरही। |
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.
Beyond Translation