1 थिस्सलुनी 2 - सरगुजिया बाइबिलपौलुस कर स्वभाव 1 हे भाई मन, तुमन अपन ही जानत हा कि हमन तुमन कर लिघे आए ले ब्यर्थ नी होईस। 2 बरन तुमन मन अपन ही जानथा कि आगू फिलिप्पी मे दुख उठाए के अउ उपद्रव सह के भी हमर परमेश्वर हर हमन मन ला एसन साहस देहिस, कि हमन परमेश्वर कर सुसमाचार ला ढेरेच बिरोध होए कर बावजूद भी तुमन मन ला सुनाएन। 3 काबर कि हमर उपदेश मे न भ्रम है अउ न अशुद्ध है, अउ न छल कर संग है। 4 पर जईसन परमेश्वर हर हमन मन ला योग्य ठहराए के सुसमाचार ला सौपिस, हमन ओहिच कस बखान करथी अउ एकरे मे मैनसे मन ला नही, लेकिन परमेश्वर ला, जेहर हमन मन ला जाचथे, खुश करथी। 5 काबर कि तुमन मन जानत हा, कि हमन त कभो चापलूसी कर गोएठ नी करत रहेन, अउ न लोभ बर बहाना करत रहेन, परमेश्वर हर गवाह है। 6 अउ अगर हमन मन मसीह कर प्रेरित होए के कारन तुमन मे बोझ डाएल सकत रहेन तबो ले हमन आदमी मन ले आदर नी चाहथी, अउ तुमन ले, न अउ कोनो ले। 7 लेकिन जेकस दाई हर अपन लईका मन कर पालन-पोसन करथे, ओहिच कस हमन भी तुमन मन कर मांझा मे रह के कोमलता दिखाईस। 8 अउ ओहिच कस हमन तुमन बर लालसा करत, न केबल परमेश्वर कर सुसमाचार मे अपन-अपन प्रान भी तुमन ला देहे बर तियार रहिन, एकरे बर कि हमर प्रिय होए गए रहा। 9 काबर कि, हे भाई मन, तुमन हमर मेहनत अउ कष्ट ला याद रखथा, हमन मन एकरे बर राएत-दिन काम बुता करत तुमन मे परमेश्वर कर सुसमाचार प्रचार करे हन, कि तुमन मे ले कोनो ला भार नी होई। 10 तुमन अपन ही गवाह हा, अउ परमेश्वर हर भी गवाह है कि तुमन बिश्वासी मन कर मांझा मे हमर ब्यवहार कईसन पवित्र अउ धार्मिक अउ निर्दोष रहिस। 11 तुमन हर जानथा कि जईसन दाऊ अपन लईका मन कर संग ब्यवहार करथे ओहिच कस हमन भी तुमन मन ले हरेक झन ला उपदेश करथी, अउ शान्ति देहत, अउ समझात रहेन। 12 कि तुमन कर चाल-चलन परमेश्वर कर योग्य होए, जेहर तुमन ला अपन राएज अउ महिमा मे बलाथे। थिस्सलुनिकिय लोग मन कर बदलाव 13 एकरे बर कि हमन भी परमेश्वर कर धन्यवाद लगातार करथी; कि जब हमर द्वारा परमेश्वर कर सुसमाचार कर बचन तुमन कर लिघे पहुचिस, त तुमन हर ओला आदमी मन कर नही लेकिन परमेश्वर कर बचन समेझ कर (अउ सचमुच एहर एहिच कस है) गरहन करिस, अउ ओहर तुमन बिश्वासी मन मे जेमन बिश्वास रखथा, बुता करथे। 14 एकरे बर कि तुमन, हे भाई मन, परमेश्वर कर ओ कलीसिया मन कस चाल चले बर लगे हा, जेहर यहूदिया परदेस मे मसीह यीशु मे हे काबर कि तुमन हर भी अपन आदमी मन ले ओहिच कस दुख पईहा जेकस ओमन मन यहूदी मन ले पाए रहा। 15 जेमन हर प्रभु यीशु ला भी अउ अगमजानी मन ला भी माएर डालिन अउ हमन मन ला सतईन, अउ परमेश्वर हर ओमन मन ले खुश नी रहिस, अउ ओ सबेच आदमी मन कर बिरोध करथे। 16 अउ ओमन मन जाएत-जाएत मन ले ओमन कर उद्धार बर गोएठ करे बर हमन मन ला रोखथे, कि हमेसेच अपन पाप कर नपुआ भरत रहब, पर ओमन मन पर परमेश्वर कर भयानक प्रकोप आए पहुचिस है। कलीसिया ले भेटाए कर लालसा 17 हे भाई मन, जब हमन तनिक देर बर तुमन मन मे नही बरन परगट मे, तुमन ले अलगेच होए गए रहेन, त हमन मन ढेरेच लालसा कर संग तुमन कर मुह देखे बर अउ भी बगरा यत्न करेन। 18 एकरे बर हमन मन (मने कि मोला पौलुस हर) एक तोर नही बरन दुई तोर तुमन जग आए बर चाहे लेकिन शैतान हर हमन मन ला रोके रहिस। 19 भला हमर आसरा या आनन्द या बड़ाई, कर मुकूट का है? का हमर प्रभु यीशु कर आगू ओकर आए कर समय मे तुमन मन ही नी होईहा? 20 हमर बड़ाई अउ आनन्द तुमन मन ही हा। |
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.
Beyond Translation