1 पतरस 5 - सरगुजिया बाइबिलप्राचीन अउ जवान मन ला सन्देश 1 तुमन मे जेमन प्राचीन है, मैहर ओमन कर नियर प्राचीन अउ मसीह कर दुख मन कर गवाह अउ परगट होए बाला महिमा मे सहभागी होए के ओमन ला ये समझात रहा। 2 कि परमेश्वर कर ओ झुन्ड कर, जेहर तुमन मन कर मांझा मे है रखबाली करा; अउ ये दबाव ले नही लेकिन परमेश्वर के इक्छा कर अनुसार आनन्द ले, अउ नीच कमाई बर नही, पर मन लगाए के। 3 जे लोग मन तुमन ला सौपल गईस है, ओमन मन पर अधिकार झिन जतावा, बरन झुन्ड बर आदर्श बना। 4 जब प्रधान रख बाला हर परगट होही, त तुमन ला महिमा कर मुकूट देहल जाही, जेहर मुरझाए बाला नी है। परमेश्वर ला देहई अउ शैतान कर बिरोध करई 5 एहिच नियर हे जवान मन, तुमन भी प्राचीन मन कर अधीन मे रहा, बरन तुमन सबेच कर सबेच एक दूसर कर सेवा बर दीनता ले कनिहा बांधे रहा, काबर कि “परमेश्वर हर अभिमानी मन कर बिरोध करथे, लेकिन दीन मन पर अनुग्रह करथे।” 6 एकरे बर परमेश्वर कर बलवन्त हाथ कर खाल्हे दीनता ले रहा, जेकर ले तुमन मन ला उचित समय मे बड़हाही। 7 अपन सबेच चिन्ता मन ला ओकरेच मे डाएल देवा, काबर कि ओला तुमन मन कर ध्यान है। 8 सचेत रहा, अउ जागत रहा; काबर कि तुमन कर बिरोधी शैतान हर गरजे बाला सिंह कर नियर ये खोज मे रथे, कि कोनो ला फाएड़ खाए। 9 बिश्वास मे मजबूत होए के, अउ ये जाएन के ओकर सामना करा, कि तुमन कर भाई जेहर संसार मे है, एसन ही दुख सहत है। 10 अब परमेश्वर जेहर सबेच अनुग्रह कर दाता है, जेहर तुमन ला मसीह यीशु मे अपन अनन्त महिमा बर बुलईस है, तुमन मन कर तनिक समय कर दुख उठाए कर बाद अपन ही तुमन ला सिद्ध अउ स्थिर अउ बलवन्त करही। 11 ओकरेच राज्य हमेसेच रहे। आमीन। आखरी नमस्कार 12 मैहर सिलवानुस कर हाथ, जेला मैहर बिश्वास योग्य भाई समझथो, तनिक अकुन लिख के तुमन ला समझाए हो, अउ ये गवाही देहे हो कि परमेश्वर कर सच्चा अनुग्रह एहिच हर है, एहिच मे जमे रहा। 13 जे बेबीलोन शहर मे तुमन कर नियर चुनल गए लोग मन है, ओहर अउ मोर बेटा मरकुस तुमन मन ला नमस्कार कहथे। 14 प्रेम कर चुम्बन ले एक दूसर ला नमस्कार करा। तुमन सबेच झन ला, जेहर मसीह मे है, शान्ति मिलत रहे। |
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.
Beyond Translation