1 पतरस 1 - सरगुजिया बाइबिलनमस्कार 1 पतरस कती ले जेहर यीशु मसीह कर प्रेरित है, ओ परदेसी मन कर नाव, जेमन मन पुन्तुस, गलातिया, कप्पदूकिया, एसिया अउ बितुनिया देश मे छितिर-बितिर होए के रहथे। 2 अउ परमेश्वर दाऊ के भविष्य ज्ञान कर अनुसार, आत्मा के पवित्र करे कर द्वारा हुकूम माने, अउ यीशु मसीह के लहू कर छिड़के जाए बर चुनल गईस है। तुमन ला अनुग्रह अउ शान्ति बहुतायत ले मिलत रहे। एक स्वर्ग कर बिरासत 3 हमर प्रभु यीशु मसीह कर परमेश्वर अउ दाऊ कर धन्यवाद होए, जेहर यीशु मसीह के मरल मन ले जी उठे कर द्वारा अपन बड़खा दया ले हमन ला जीवित आसरा बर नावा जनम देहिस, 4 मने कि एक अबिनाशी, अउ निर्मल, अउ अनन्त मीरास बर जेहर तुमन बर स्वर्ग मे रखल आहे, 5 जेमन कर रक्षा परमेश्वर कर सामर्थ्य ले बिश्वास कर द्वारा ओ उद्धार बर, जेहर आए बाला समय मे परगट होए बर है, करल जाथे। 6 ये कारन तुमन मन मगन होथा, माने कि जरूरेच है कि अभी कुछ दिन बर कई मंधे कर परीक्षा के कारन दुख मे हा, 7 अउ ये एकरे बर है कि तुमन कर परखल बिश्वास, जेला आगी ले ताल सोना ले भी कहो अधिक बहुमूल्य है, यीशु मसीह कर परगट होए पर प्रशंसा, अउ महिमा, अउ आदर कर कारन ठहरही। 8 ओला तुमन हर बिन देखल प्रेम रखथा, अउ अब त ओकर पर बिन देखल भी बिश्वास कईर के एसन खुशी अउ मगन होवत हा जेहर बखान ले बाहर अउ महिमा ले भरल है, 9 अउ अपन बिश्वास कर प्रतिफर मने कि आत्मा मन कर उद्धार पाथा। अगमजानी मन कर गवाही 10 एहिच उद्धार कर बिषय मे ओ अगमजानी मन हर ढेरेच खोजबीन अउ जांच-पड़ताल करिन, जेमन हर ओकर अनुग्रह कर बिषय मे जे तुमन पर होए बर रहिस, भविष्यवानी करे रहिस। 11 ओमन हर ये गोएठ कर खोज करिन कि मसीह कर आत्मा जेहर ओमन मे रहिस, अउ आगू ले ही महिमा कर दुख मन कर अउ ओकर पाछू मे होए बाला महिमा कर गवाही देहत रहिस, ओहर कोन कती ले अउ कईसन समय कर संकेत करत रहिस। 12 ओमन पर ये परगट करल गईस कि ओमन अपन नही बरन तुमन कर सेवा बर ये गोएठ ला कहत रहिन, जेमन कर समाचार अब तुमन हर ओमन कर द्वारा मिलिस जेमन हर पवित्र आत्मा कर द्वारा, जेहर स्वर्ग ले भेजिस हे, तुमन ला सुसमाचार सुनईस, अउ ये गोएठ मन ला स्वर्गदूत भी ध्यान ले देखे कर लालसा रखथे। पवित्र जीवन जीए बर बुलई 13 ये कारन अपन-अपन बुईध कर कनिहा ला बाध के, अउ सचेत रह के ओ अनुग्रह कर पूरा आसरा रखा, जेहर यीशु मसीह कर परगट होए बर समय हर तुमन ला मिले बाला है। 14 अउ आदेस माने बर लईका मन जईसन अपन अज्ञानता के समय कर पुराना अभिलाषा मन कर नियर झिन बना। 15 पर जेकस तुमन कर बुलाए बाला हर पवित्र है, ओहिच कस तुमन भी अपन सबेच चाल-चालन मे पवित्र बना। 16 काबर कि लिखल हे, “पवित्र बना, काबर कि मैहर पवित्र हो।” 17 अउ जब कि तुमन हर “हे दाऊ” कईह के ओकर ले प्रार्थना करथा, जेहर बिन पक्छपात कर एक-एक झन के बुता कर अनुसार न्याय करथे, त अपन परदेसी होए कर समय मे भय ले बितावा। 18 काबर कि तुमन हर जानत हा कि तुमन कर निकम्मा चाल-चलन जेहर दाऊ-दादा मन ले चलत आत है, ओकर ले तुमन कर छुटकारा सोना-चांदी मने कि नाशवान चीज मन कर द्वारा नी होईस, 19 पर बिन दोष अउ निष्कलंक मेमना, मने कि मसीह कर बहुमूल्य लहू कर द्वारा होईस। 20 ओकर ज्ञान त जगत के उत्पत्ति कर आगू ले ही जानल गए रहिस, पर अब ये आखरी युग मे तुमन बर परगट होईस। 21 ओकर द्वारा तुमन हर ओ परमेश्वर पर बिश्वास करत हा, जेहर ओला मरल मन ले जीलईस अउ महिमा देहिस कि तुमन कर बिश्वास अउ आसरा हर परमेश्वर पर होए। 22 तले जब कि तुमन हर भाई चारा कर निष्कपट प्रीति कर निमित सत्य कर माने ले अपन दिल मन ला पवित्र करे हा, त तन-मन लगाए के एक दूसर ले बगरा प्रेम रखा। 23 काबर कि तुमन मन हर नाशवान नही पर अबिनाशी बीज ले, परमेश्वर कर जीवन अउ हमेसेच ठहरे बाला बचन कर द्वारा नावा जनम पाए हा। 24 काबर कि “हर एक प्रानी हर घास कर नियर हे, अउ ओकर सबेच शोभा हर घास कर फूल के नियर है: घास हर सुईख जाथे, अउ फूल हर झईर जाथे। 25 लेकिन प्रभु कर बचन हर युगानुयुग जमे रही।” अउ एहिच सुसमाचार कर बचन हे जेहर तुमन मन ला सुनाल गए रहिस। |
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.
Beyond Translation