1 यूहन्ना 1 - सरगुजिया बाइबिलजीवन के बचन कर घोषना 1 ओ जीवन के बचन कर बिषय मे जेहर शुरू ले रहिस, जेला हमन हर सुनेन, अउ जेला अपन आएख ले देखेन, बरन जेला हमन हर ध्यान ले देखेन अउ हाथ ले छुएन। 2 (ये जीवन हर परगट होईस, अउ हमन मन ओला देखेन, अउ ओकर गवाही देथन, अउ तुमन ला ओ अनन्त जीवन कर सुसमाचार देथन, जेहर दाऊ कर संग मे रहिस, अउ हमन पर परगट होईस)। 3 जे कुछ ला हमन देखेन अउ सुनेन ओकर सुसमाचार तुमन ला भी देहत हन, एकरे बर कि तुमन भी हमर संग सहभागी हा; अउ हमर सहभागिता दाऊ कर संग, अउ ओकर बेटा यीशु मसीह कर संग है। 4 अउ ये गोएठ हमन एकरे बर लिखत हन, कि हमर आनन्द हर पूरा होए जाए। परमेश्वर के संग मे हमर साझी 5 जे सुसमाचार ला हमन हर ओकर ले सुनेन, अउ तुमन ला भी सुनात हन, ओहर ये है, कि परमेश्वर ज्योति है, अउ ओमे कुछ भी अन्धकार नी है। 6 अगर हमन कहब कि ओकर संग मे हमर सहभागिता है, अउ फिर अन्धार मे चलब, त हमन मन झूठा हन, अउ सत्य पर नी चलन; 7 पर अगर जईसन ओहर ज्योति मे है, ओहिच कस हमन भी ज्योति मे चलब, त एक दूसर ले सहभागिता रखथन, अउ ओकर बेटा यीशु कर लहू हमन ला सबेच पाप मन ले शुद्ध करथे। 8 अगर हमन कहब, कि हमन मे कुछ भी पाप नी है, त अपन आप ला धोखा देथन, अउ हमन मे सत्य नी है। 9 अगर हमन अपन पाप मन ला माएन लेथन, त ओहर हमर पाप मन ला छमा करे बर, अउ हमन ला सबेच अधर्म ले शुद्ध करे मे बिश्वास योग्य अउ धर्मी है। 10 अगर हमन कहब कि हमन मन पाप नी करे ही, त ओला झूठा ठहराथन, अउ ओकर बचन हर हमर मे नी है। |
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.
Beyond Translation