1 कुरिन्थी 8 - सरगुजिया बाइबिलचड़हावा कर भात 1 अब मूरती मन कर आगू मे बलि चड़हाल चीज मन कर बारे मे हमन मन जानथन कि हमन मन सबेच झन ला ज्ञान है। ज्ञान हर घमण्ड ला जनमाथे, लेकिन प्रेम ले बढ़ोतरी होथे। 2 अगर कोनो हर समझथे कि मैहर कुछ जानथो, त जईसन जाने बर चाही ओकस अब तक ले नी जाने। 3 लेकिन अगर कोनो हर परमेश्वर ले प्रेम रखथे, त परमेश्वर हर ओला चीनथे। 4 तले मूरती मन कर आगू मे बलि करल चीज मन के खाए कर बिषय मे हमन मन जानथन कि मूरती मन जगत मे कोनो चीज नी है, अउ एक ला छोएड़ अउ कोनो परमेश्वर नी है। 5 अगर स्वर्ग अउ धरती पर ढेरेच झन ईश्वर कहलाथे, (जईसन कि ढेरेच झन ईश्वर अउ ढेरेच झन प्रभु है)। 6 तबो ले हमर बर त एकेच ठे परमेश्वर है: मने कि दाऊ जेकर कती ले सबेच चीज मन है, अउ हमन मन ओकरे बर हन। अउ एकेच ठे प्रभु है, मने कि प्रभु यीशु मसीह जेकर द्वारा सबेच चीज मन होईन, अउ हमन मन भी ओकरे द्वारा हन। 7 पर सबेच झन ला ये ज्ञान नी है, लेकिन कुछ त अब तक ले मूरती ला कुछ समझे कर कारन मूरती मन कर आगू बलि करल चीज मन ला कुछ समेझ के खाथे, अउ ओमन मन कर बिवेक कमजोर होए के कारन अशुद्ध होए जाथे। 8 भात हर हमन मन ला परमेश्वर कर लिघे नी पहुचाए। अगर हमन मन नी खाबो त हमर कुछ हानी नी हे, अउ अगर खाबो त कोनो लाभ नी हे। 9 लेकिन सावधान! एसन झिन होए कि तुमन मन कर ये स्वतंत्रता कहो कमजोर मन बर ठोकर कर कारन होए जाए। 10 काबर कि अगर कोनो तोर ज्ञानी ला मूरती मन कर मन्दिर मे भात खाए के देखे अउ ओहर कमजोर जन होही, त का ओकर बिवेक ला मूरती मन कर आगू बलि करल चीज ला खाए कर साहस नी होए जाही। 11 ये रीति ले तोर ज्ञान कर कारन ओ कमजोर भाई जेकर बर मसीह हर मरिस, नाश होए जाही। 12 ये नियर भाई मन कर बिरोध अपराध करे ले अउ ओमन मन कर कमजोर बिवेक ला चोट पहुचाए ले, तुमन मन मसीह कर बिरोध मे अपराध करथा। 13 ये कारन अगर भात मोर भाई ला ठेस खिलाही, त मैहर कभो कोनो रीति ले मांस नी खाहु, झिन होए कि मैहर अपन भाई बर ठोकर कर कारन बनो। |
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.
Beyond Translation