1 कुरिन्थी 5 - सरगुजिया बाइबिलकलीसिया मे बिन काम कर लोग मन 1 हिया तक ले सुने मे आथे कि तुमन मन मे ब्यभिचार होथे, बरन एसन ब्यभिचार जेला दूसर जाएत मन मे भी नी होए कि एक मैनसे हर अपन दाऊ कर घरदारिन ला रखथे। 2 अउ तुमन मन शोक त नी करा, जेकर कारन एसन बुता करे बाला तुमन मन कर मांझा मे ले हिकेल जाथे, लेकिन घमण्ड करथा। 3 मैहर त देह कर भाव ले दुरिहा रहे, लेकिन आत्मा कर भाव ले तुमन मन कर संग होए के माना हुवा रहे कर दशा मे एसन बुता करे बाला कर बिषय मे ये हुकूम दे दारे हो 4 कि जब तुमन मन अउ मोर आत्मा, हमर प्रभु यीशु कर सामर्थ्य कर संग जुटे हा, त एसन मैनसे हमर प्रभु यीशु कर नाव ले 5 देह कर बिनाश बर शैतान ला सौपल जाही, ताकि ओकर आत्मा प्रभु यीशु कर दिन मे उद्धार ला पाए। 6 तुमन मन कर घमण्ड करई ठीक नी हे; का तुमन मन नी जाना कि तनिक अकुन खमीर हर पूरेच सानल आटा ला खमीर कईर देथे। 7 जुनहा खमीर ला हिकाएल के अपन आप ला शुद्ध करा कि नावा सानल आटा बईन जावा; तले तुमन मन अखमीरी होवा। काबर कि हमर भी फसह, जेहर मसीह हे, बलिदान होईस। 8 एकरे बर आवा, हमन मन तिवहार मे आनन्द मनई, न त जुनहा खमीर ले अउ न बुराई अउ दुष्टता कर खमीर ले, लेकिन सीधा अउ सच्चाई कर अखमीरी रोटी ले। सही नी है तेकर बर न्याय 9 मैहर अपन पत्री मे तुमन मन ला लिखे हो कि ब्यभिचारी मन कर संगति झिन करिहा। 10 ये नही कि तुमन मन एकदमेच ये संसार कर ब्यभिचारी मन, या लोभी मन, या अन्धेर करे बाला मन, या मूरती मन कर पूजा करे बाला मन कर संगति झिन करा; काबर कि ये दशा मे त तुमन मन ला संसार मे ले हिकेल जाएक पड़तिस। 11 पर मोर कहई ये हे कि अगर कोनो हर भाई कहलाए के, ब्यभिचारी, या लोभी, या मूरती मन कर पूजे बाला, या गाली देहे बाला, या पियक्कड़, या अन्धेर करे बाला होही, त ओकर संगति मत करिहा; बरन एसन मैनसे मन कर संग भात भी झिन खईहा। 12 काबर कि मोला बाहर कती मन कर न्याय करे कर का बुता? का तुमन मन भीतर बाला मन कर न्याय नी करा? 13 लेकिन बाहर कती मन कर न्याय परमेश्वर हर करथे: एकरे बर ओ कुकरमी ला अपन मांझा मे ले हिकाएल दा। |
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.
Beyond Translation