1 कुरिन्थी 10 - सरगुजिया बाइबिलइस्राएल कर इतिहास ले चेतावनी 1 हे भाई मन, मैहर नी चाहु कि तुमन मन ये गोएठ ले अनजान रहा कि हमर सबेच दाऊ-ददा मन बदरी कर खाल्हे रहिन, अउ सबेच कर सबेच समुन्दर कर मांझा ले पार होईन, 2 अउ सबेच झन मन बदरी अउ समुन्दर मे, मूसा कर बपतिस्मा लेहिन, 3 अउ सबेच झन मन एकेच आत्मिक भात ला खईन, 4 अउ सबेच झन मन एकेच आत्मिक पानी ला पीन, काबर कि ओमन मन ओ आत्मिक चट्टाएन ले पीएत रहेन जेहर ओमन मन कर संग-संग रेंगत रहिन, अउ ओ चट्टान मसीह रहिस। 5 लेकिन परमेश्वर हर ओमन मन ले ढेरेच झन मन ले खुश नी होईस, एकरे बर ओमन मन जंगल मे ढेर होए गिन। 6 ये गोएठ मन हमर बर कहानी कर रूप मे ठहरिस आहे, कि जईसन ओमन मन लालच करिन, ओहिच कस हमन मन बुरा चीज मन कर लालच नी करी; 7 अउ ना तुमन मन मूरती पूजक बनिहा, जईसन कि ओमन मन ले केतेक झन बईन गए रहिन, जईसन लिखल आहे, “लोग मन खाए पीए बर बईठिन, अउ खेले-कूदे बर उठिन।” 8 अउ ना हमन मन ब्यभिचार करी जईसन ओमन मन ले केतेक झन मन करिन; अउ एक दिन मे तेईस हजार मन मईर गिन। 9 अउ ना हमन मन प्रभु मसीह ला परखब, जईसन ओमे ले केतेक झन मन करिन, अउ साप मन कर द्वारा नाश करल गईन। 10 अउ ना तुमन मन कुड़कुड़ावा, जे रीति ले ओमन मन ले केतेक झन मन कुड़कुड़ाए अउ नाश करे बाला कर द्वारा नाश करल गईन। 11 लेकिन ये सबेच गोएठ मन, जेहर ओमन मन पर पड़िस, कहानी कर रीति पर रहिस; अउ ओहर हमर चेतावनी बर जेहर जगत कर आखरी समय मे रहथन लिखल गईस है। 12 एकरे बर जेहर समझाथे, “मैहर जमे हो,” ओहर चवकन्ना रहे कि कहो गिर झिन जाए। 13 तुमन मन कोनो एसन परीक्षा मे नी पड़े हा, जेहर मैनसे मन कर सहे ले बाहर होए। परमेश्वर हर सच्चा हे अउ ओहर तुमन मन ला सामर्थ्य ले बाहर परीक्षा मे नी पड़े देही, बरन परीक्षा कर संग मे निकासी भी करही कि तुमन मन सह सका। मूरती पूजा ला मना करई 14 ये कारन, हे मोर प्रिय, मूरती पूजा ले बचे रहा। 15 मैहर बुईधमान जाएन के तुमन मन ले कहथो: जेला मैहर कहथो, ओला तुमन मन परखा। 16 ओहर धन्यवाद कर कटोरा, जेकर बर हमन मन धन्यवाद करथी; का मसीह कर लहू कर सहभागिता नही? ओ रोटी जेला हमन मन तोड़थन, का ओहर मसीह कर देह कर सहभागिता नही? 17 एकरे बर कि एकेच ठे रोटी है त हमन मन भी जेहर ढेरेच झन हन, एक देह हन: काबर कि हमन मन सबेच ओहिच एक रोटी कर भागी होथन। 18 जेहर देह कर भाव ले इस्राएली है, ओमन मन ला देखा: का बलिदान मन कर खाए बाला बेदी कर सहभागी नही। 19 फिर मैहर का कहथो? का मूरती मे चड़हाल गईस बलिदान कुछ है, या मूरती कुछ है? 20 नी है, बरन ये कि दूसर जाएत जेमन मन बलिदान करथे; ओमन मन परमेश्वर बर नी करे लेकिन प्रेत आत्मा बर बलिदान करथे अउ मैहर नी चाहथो कि तुमन मन प्रेत आत्मा मन कर सहभागी होवा। 21 तुमन मन प्रभु कर कटोरा अउ प्रेत आत्मा मन कर कटोरा दोनोच मे ले नी पी सकथा। तुमन मन प्रभु कर मेज अउ प्रेत आत्मा मन कर मेज दोनोच मे साझी नी होए सकथा। 22 का हमन मन प्रभु ला रिस दिलाथन? का हमन मन ओकर ले शक्तिमान हन? मसीह मे स्वत्रंत्र 23 सबेच चीज मन हर उचित त है, लेकिन सबेच हर लाभ कर नी है: सबेच चीज मन हर मोर बर उचित त है, लेकिन सबेच चीज मन ले उन्नति नी है। 24 कोनो हर अपनेच भलाई बर नही, बरन दूसर कर भी भलाई ला खोजे। 25 जे कुछ कसाई मन कर हिया बिकथे, ओला खावा अउ बिवेक कर कारन कुछ झिन पूछा? 26 “काबर कि पृथ्वी अउ ओमे कर भरपूरी प्रभु कर है।” 27 अगर अबिश्वासी मन ले तुमन मन ला कोनो हर नेवता देही, अउ तुमन मन जाए बर चईहा, त जे कुछ तुमन मन कर आगू मे रखल जाही ओहिच ला खावा; अउ बिवेक कर कारन कुछ झिन पुछिहा। 28 लेकिन अगर कोनो हर तुमन मन ले कही, “एहर त मूरती ला बलि करल चीज है,” त ओहिच बताए बाला कर कारन अउ बिवेक कर कारन झिन खावा। 29 मोर मतलब तोर बिवेक नही, लेकिन ओ दूसर कर। भला, मोर स्वतंत्रता दूसर कर बिचार ले काबर परखल जाही? 30 अगर मैहर धन्यवाद कईर के साझी होत हो, त जेमा मैहर धन्यवाद करथो ओकर कारन मोर बदनामी काबर होथे? 31 एकरे बर तुमन मन चईहा त खावा, अउ चईहा त पीया, चाहे जे कुछ करा, सबेच कुछ परमेश्वर कर महिमा बर करा। 32 तुमन मन न यहूदी मन बर, न यूनानी मन बर, अउ न परमेश्वर कर कलीसिया बर ठोकर कर कारन बना। 33 जईसन मैहर भी सबेच गोएठ मन मे सबेच झन ला खुश रखथो, अउ अपन नही लेकिन ढेरेच झन मन कर लाभ ला खोजत हो कि ओमन मन उद्धार पाए जाए। |
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.
Beyond Translation