तीतुस 3 - Surgujia Bible

अबिस्वासी मन कर मझारे बिस्वासी मन कर चाल-सहूर

¹ सब झन ला सुरता देवा कि ओमन हाकीम अऊ अधिकारी मन कर अधीन में रहें अऊ ओमन कर अगींया मानें अऊ सबेच बढ़िहां काम-बूता करे बर तियार रहें।

² ओमन ला बतावा कि ओमन ककरो बईदनामी झईन करें, झगराहा झईन रहें, बकिन लूरलगहा रहें अऊ सब मईनसे मन कर संगे पूरा नरम सुभाव ले रहें।

³ काबरकि हमू मन आगू बोया रहेन अऊ परमेस्वर कर अगींया ला नई मनोईया रहेन। हमरे संसार कर भरम में भुलाए रहेन अऊ दूसर-दूसर मधे कर रिझ-रंग कर गुलामी में रहेन। हमरे इसगापारी अऊ जलन में जिनगी बितात रहेन अऊ हमके कोनोच नई पतियात रहीन अऊ हमरे एक दूसर जग बैर करत रहेन।

⁴ बकिन जब हमर उद्धार करोईया परमेस्वर कर दया अऊ मईनसे मन बरीक ओकर मया हर परगट होईस,

⁵ तब ओहर हमर उद्धार करीस। एहर हमर कोनो बढ़िहां करम कर चलते नई होईस, बकिन एहर परमेस्वर कर दया कर चलते होईस। ओहर हमर पाप ला धोए के, पबितर आत्मा कर जरिये नांवा जनम अऊ नांवा जिनगी देहीस अऊ हमर उद्धार करीस।

⁶ परमेस्वर हर ए पबितर आत्मा ला हमर उद्धार करोईया ईसू मसीह कर चलते, हमके ला हरक दिल ले देहीस।

⁷ तेमेकि हमरे ओकर किरपा ले परमेस्वर कर देख में बढ़िहां बएन के, अमर जिनगी कर पका असरा में ओकर वारिस बनी।

⁸ ए बात हर सही हवे। मंए चाहथों कि तंए ए बात मन कर बारे में जोर देके गोठियाओ। तेकर ले कि जेमन परमेस्वर कर ऊपरे बिस्वास करीन हवें, ओमन भलाई करे में लगे रहे बर उत्सुक रहें। ए बात मन ढेरेच बढ़िहां अऊ मईनसे मन कर फयदा बर हवे।

⁹ मूसा कर कानहूंन कर बारे में बोया घींचा-तानी अऊ पीढ़ी कर पूरखानी बात, बिरोध अऊ झगरा ले तंए दुरीहां रहबे, एमन बिगर फयदा कर अऊ फालतू हवें।

¹⁰ मईनसे मन कर मझारे फूट करोईया ला, एक दुई दाएर समूझाए-बुझाए दे, तेकर ओकर जग ले दुरीहां रह।

¹¹ तंए ए जाएन ले कि एकस मईनसे हर बिस्वास ले भटेक गईस हवे अऊ ओहर पाप करतेच रथे अऊ अपन-आप ला दोसी ठहराथे।

ए चिट्ठी कर आखरी बात

¹² जे घनी मंए अरतिमिस आखिर तुखिकुस ला तोर जग भेजहूं, त तंए मोर जग निकुपुलिस सहर में आए कर कोसिस करबे, काबरकि असों कर जड़हा ला मंए उहें बिताए कर बिचार करे हों।

¹³ जेनास वकील अऊ अपुलोस ला, तंए बढ़िहां ले आगू कर जवाई बर मदेत कर अऊ देख लेबे कि ओमन ला कोनो जाएत कर कमी घटी झईन होए पाए।

¹⁴ हमर बिस्वासी मन भलाई करे में लगे रहे बर सीखें कि जेमन ला मदेत कर जरूरत हवे, ओमन कर मदेत कएर सकें, तेमेकि ओमन कर जिनगी हर बेकार झईन होए।

¹⁵ जेतना झेमन मोर संगे अझेर हवें, ओमन कती ले तोके जोहार अऊ सब बिस्वासी जेमन मोके मया करथें, ओहू मन ला जोहार। तुमन सबेच झन कर ऊपरे परमेस्वर कर किरपा होवत रहे।