तीतुस 2 - Surgujia Bible

मसीह जिनगी बरीक सही सिक्छा

¹ बकिन तंए अईसना बात मन ला सीखाओ, जेहर सही सिक्छा कर लाएक हवे।

² सियान मन ला अपन हाथ गोड़ ला, सकेल के रहे कर सिक्छा दे। ओमन माएन-मरजाद कर लाएक अऊ माढ़ल जीव कर रहें। ओमन बिस्वास में बजर होए जाएं अऊ ओमन मया अऊ धीरज में बड़हत जाएं।

³ अईसनेच सियानीन मन कर चाल-सहूर हर, परमेस्वर ला मरजाद करे कर लाएक रहे, ओमन लाई-चुगली करोईया अऊ मतवारीन झईन रहें, बकिन बढ़िहां गोएठ बात मन कर सिखोईया रहें।

⁴ तेमेकि ओमन जवान सवांगीन मन ला एकस सिखाए सकें कि ओमन अपन-अपन घरदार अऊ अपन लईका-छऊआ मन ला ढेरेच मया करत रहें।

⁵ ओमन समझदार, पबितरता, घर कर काम-बूता करोईया, दयालू अऊ अपन-अपन घरदार कर काबू में रहोईया रहें, तेमेकि परमेस्वर कर बचन कर निंदा झईन होए।

⁶ अईसनेच जवान सवांग मन ला समझाए दे कि ओहू मन माढ़ल जीव कर रहें।

⁷ सब बात में अपन-आप ला, बढ़िहां काम करे कर नमूना बनाओ। तोर सिक्छा हर सफा-सफा अऊ आदर कर लाएक रहे।

⁸ अऊ ओके ला कोनो हर झईन कहे कि एकर गोएठ हर गलत हवे। तेमेकि बिरोध करोईया मन हमर ऊपर कोनो दोस लगाए झईन पाएं अऊ ओमन झट के लजाए जाएं।

⁹ गुलाम मन ला समझा कि ओमन सब बात में अपन-अपन मालिक मन कर काबू में रहें अऊ ओमन ला खुस राखें अऊ ओमन जग मूंह झईन लड़ाएं।

¹⁰ ओमन अपन मालिक जग चोरी-लूका झईन करें, बलकि सबेच बात में बिस्वास लाएक अऊ बढ़िहां बएन के देखाएं। तेमेकि सब कती ले हमर उद्धार करोईया परमेस्वर कर सिक्छा हर फभत रहे।

¹¹ सबेच मईनसे मन ला उद्धार देहे बरीक, परमेस्वर कर किरपा हर परगट होईसे।

¹² सबले महान परमेस्वर अऊ हमर उद्धार करोईया ईसू मसीह हर, एक दिन राजा बएन के परगट होए जाही। ओ जुआर ला हमरे बढ़िहां असरा कर संगे अगुरत रथी।

¹³ एला अगुरे कर घनी में जे इछा हर, परमेस्वर ला फुरमा नई करे अऊ हमके ला पाप करुवाथे, ओ इछा ला छोंएड़ के एही जुग में माढ़ल जीव अऊ परमेस्वर कर देख में बढ़िहां जिनगी अऊ भक्ति कर जिनगी जीए बर, ए किरपा हर हमके ला सिखाथे।

¹⁴ एही ईसू मसीह हर हमके सब बुराई ले छोंड़ाए बर, अपन परान ला हमर बर दे देहीस अऊ सुद्ध कएर के हमन ला अपन मईनसे बनाए लेहीस, जेमन सुघर-सुघर काम-बूता करे में उत्सुक रहीं।

¹⁵ तंए ए सब बात मन ला पूरा अधिकार कर संगे, मईनसे मन ला समझाओ अऊ सिखात रह। कोनो तोके ला फालतू झईन समझें।