रोमियो 9 - Surgujia Bible

परमेस्वर अऊ इसराएली मन

¹ मंए मसीह ला हाजीर जाएन के सच कहत हों, झूठ नई बोलत हों। मोर बिवेकोच हर पबितर आत्मा में एकर गवाही देहत हे

² कि मोके बड़ा दुख हवे अऊ मोर हिरदय हर हमेसा मोर इसराएली भाई-बहिन मन बर दुख ले भरीस हवे।

³ मंए चाहथों कि ए भाई-बहिन मन, जेमन मोर खुद कर बंस कर लागें, ओमन कर भलाई बर, मंए खुद सरारिपत होए जातें अऊ मसीह ले अलग होए जातें।

⁴ ओमन इसराएली लागें अऊ परमेस्वर हर गोद लेके, ओमन ला अपन लईका बनाईस, ओमन कर उपरे महिमा परगट करीस, ओमन कर संगे करार करीस, ओमन ला अपन कानहूंन देहीस। ओमन ला मंदिर में परमेस्वर कर अराधना करे बर चुनीस अऊ ओहर ओमन जग बात जबान करीस।

⁵ हमर पूरखा मन एमने कर रहीन अऊ मसीह जेहर सब कर ऊपरे परमेस्वर लागे, मईनसे कर रूप में एमनेच कर बंस ले आईस। ओकर बड़ाई जुग-जुग ले होवत रहे। आमीन।

⁶ बकिन अईसना नईए कि परमेस्वर कर बचन हर अनभनिया होए गईस, काबरकि ओ सब झन, जेमन इसराएल कर बंस में जनम लेहींन हवें, ओ सब झेमन सचा इसराएली ना लागें।

⁷ अऊ अबराहम कर बंस में जनम लेहे कर चलते, सब झेमन ओकर सचा संतान नई बएन जाहीं, काबरकि पबितर किताब हर कथे, “जेमन इसहाक कर बंस में जनम लेथें, ओही मन तोर बंस मानल जाहीं।”

⁸ एकर मतलब ए हवे कि मईनसे कर ईछा कर अनुसार, जनमल लईका मन परमेस्वर कर संतान ना लागें, बकिन बात जबान कर अनुसार जनमल लईका मन, अबराहम कर बंस समझल जाथें।

⁹ काबरकि बात जबान कर बचन ए रहीस, “मंए अगले साल एही समय में फेर आहूं अऊ सारा कर एगोट बेटा होही।”

¹⁰ एही बेटा हर हमर पूरखा इसहाक लागे, एही इसहाक ले रिबका कर जांवा लईका मन कर जनम होईस।

¹¹ अऊ ओ जांवा लईका मन कर जनमे ले आगू, ओमन तो कांहीच भला बुरा नई करे रहीन, तब रिबका ला ए कहल गईस, “बड़े बेटा हर छोटे बेटा कर सेवा करही।” एहर एकर बर होईस कि परमेस्वर कर चुनाव कर उदेस हर बनल रहे,

¹² अऊ परमेस्वर कर ए चुनाव हर करम कर चलते नहीं, बलकि परमेस्वर कर बलाए कर अनुसार होईस।

¹³ जेकस कि पबितर किताब में लिखल हवे, परमेस्वर हर कथे, “मंए याकूब ले मया करें अऊ एसाव ला नई पतियाएं।”

¹⁴ तब हमरे का कही? का परमेस्वर हर अनियाए करथे? कभों नहीं।

¹⁵ काबरकि परमेस्वर हर अगमजानी मूसा जग कहीस, “जेकर ऊपरे मंए दया करे बर चाहूं, ओकर ऊपरे दया करहूं, अऊ जेकर ऊपरे सोगे होए बर चाहूं, ओकर ऊपरे सोगे होहुं।”

¹⁶ तेकर ले ए बात हर कोई मईनसे कर ईछा, चाहे ओकर कोसिस ले नई होए, बकिन दया करोईया परमेस्वर ले होथे।

¹⁷ काबरकि पबितर किताब में परमेस्वर हर फिरोन राजा ला कहीस, “मंए तोके एकर बर राजा बनाए हों कि मंए तोर ऊपरे अपन सक्ति ला देखाओं, ताकि मोर नांव कर परचार पूरा धरती में होए।”

¹⁸ तेकर ले परमेस्वर हर जेकर ऊपरे दया करे बर चाहथे, ओकर ऊपरे दया करथे, अऊ जेकर हिरदय ला कठोर करे बर चाहथे, ओके कठोर कएर देथे।

¹⁹ तुमन मोके कईहा, “त फेर परमेस्वर हर मईनसे कर ऊपरे काबर दोस लगाथे? परमेस्वर कर ईछा कर बिरोध कोन कएर सकथे?”

²⁰ ए मईनसे! तंए कोन लागस, कि परमेस्वर कर सामना करथस? का गढ़ल चीज हर अपन गढ़ोईया ला कईह सकथे, “तंए मोके अईसना काबर बनाए?”

²¹ का कुमहार ला माटी कर ऊपरे ए अधिकार नईए कि ओहर माटी कर एकेच लोंदी ले ओहर एगोट भांड़ा ला, खास काम बरीक अऊ दूसर भांड़ा ला सहज काम बरीक बनाए?

²² एमें कोई अचमहों कर बात तो नईए कि परमेस्वर जग अपन कोरोध अऊ सामर्थ देखाए कर अधिकार हवे, बकिन बड़ा धीरज धएर के ओमन ला सहथे, जेमन कर ऊपरे ओकर कोरोध आथे अऊ जेमन बिनास बरीक बनाल रहीन।

²³ परमेस्वर हर अईसना एकर बर करीस कि अपन बड़खा महिमा कर धन ला, ओमन के देखाए सके, जेमन कर ऊपरे ओकर दया रहीस अऊ महिमा बरीक पहिले ले तियार रहीन।

²⁴ हमूच मन ला ओहर बलाईसे, सिरीप यहूदी जाति में ले नहीं, बकिन गैर यहूदीयोच मन ले बलाईसे।

²⁵ जेकस ओहर होसे अगमजानी कर किताब में कथे, “जेमन मोर परजा नई रहीन, ओमन ला मंए अपन परजा कहूं, अऊ जेमन मोर मयारू नई रहीन ओमन ला मंए अपन मयारू कहूं,”

²⁶ अऊ “जे जघा में ओमन ला, ए कहल गए रहीस, तुमन मोर परजा ना लागा, ओही जघा में ओमन जीयत परमेस्वर कर संतान कहाहीं।”

²⁷ अऊ यसायाह अगमजानी हर इसराएली मन कर बारे में चिकेर के कथे, “चाहे इसराएल कर संतान मन कर गिनती, समुंदर कर बालू कस होए जाही, तबो ले ओमें ले बांचल मईनसे मन ही बचाल जाहीं।

²⁸ काबरकि परभू हर ए धरती कर ऊपरे, अपन नियाओ कर काम ला, पूरा तरह ले हालू पूरा करही।”

²⁹ जेकस कि यसायाह अगमजानी हर आगूवेच कहे रहीस, “अगर सेना मन कर परभू हर, हमर बर संतान मन ला नई छोंड़े रतीस, त हमरे सदोम अऊ अमोरा सहर मन सहींक पूरा तरह ले नास होए गए रहतेन।”

इसराएली अऊ सुघर खभेर

³⁰ तब हमरे का कही? कि गैर यहूदी मन, परमेस्वर कर आगू में पूरा तरह ले, बेकसूर बने कर खोज नई करत रहीन, तबो ले ओमन बिस्वास कर जरिए, ओकर आगू में बेकसूर बएन गईन।

³¹ बकिन इसराएली मन, मूसा कर कानहूंन ला पूरा तरह ले पालन करके, परमेस्वर कर आगू में बेकसूर बने कर खोज करत रहीन। बकिन ओमन तो बेकसूर नई बएन पाईन।

³² ओमन काबर बेकसूर नई बने पाईन? काबरकि ओमन परमेस्वर कर आगू में बिस्वास कर जरिए, बेकसूर बने कर खोज नई करीन, बकिन अपन करम कर आधार में करीन। ओमन “ठोकर कर पखना में” अफेट के गिरीन।

³³ जेकस कि पबितर किताब में लिखल हवे, “देखा, मंए सियोन में एगोट पखना मड़हात हों, जेहर मईनसे मन कर ठोकर खाए कर अऊ अफटे कर कारन होही। बकिन जेहर ओकर ऊपरे बिस्वास करथे, ओहर कभों लज्जित नई होही।”