रोमियो 8 - Surgujia Bible

पबितर आत्मा कर जरिए जिनगी

¹ तेकर ले अब जेमन मसीह ईसू कर अपन लागें, ओमन ऊपरे दंड कर अगियां नईए। [काबरकि ओमन देंह कर बुरा ईछा कर अनुसार नई चलें, बलकि पबितर आत्मा कर अनुसार चलथें।]

² काबरकि जीवन देवईया आत्मा कर कानहूंन हर, मसीह ईसू कर जरिए मोके, पाप अऊ मिरतु कर कानहूंन ले आजादी देहीस।

³ ए आजादी तो, मूसा कर कानहूंन हर नई दे सकीस, काबरकि हमर देंह कर बुरा ईछा कर चलते, ए कानहूंन हर कमजोर होए गए रहीस, एही कस जेला कानहूंन हर नई करे पाईस, ओला परमेस्वर हर करीस, मनेकि परमेस्वर हर अपन खुद कर बेटा ला, पापी मईनसे कर देंह कर रूप में, संसार में भेजीस। अऊ ओके हमर पाप बरीक बली देके, ओकर देंह में पाप ला सजा देहीस।

⁴ ताकि कानहूंन हर जेला चाहथे, ओला हमरे पूरा तरह ले पालन करबो। काबरकि हमरे अपन देंह कर बुरा ईछा कर अनुसार नहीं, बलकि पबितर आत्मा कर अगियां ला, माएन के जिनगी बिताथी।

⁵ काबरकि जेमन देंह कर बुरा ईछा कर अनुसार जिनगी बिताथें, ओमन देंह कर बुरा ईछा मन में मन ला लगाथें, बकिन जेमन पबितर आत्मा कर अगुवाई में चलथें, ओमन पबितर आत्मा कर बात मन में मन ला लगाथें।

⁶ देंह कर बुरा ईछा में मन लगाए ले तो मिरतु मिलथे, बकिन पबितर आत्मा कर बात मन में, अपन मन ला लगाए ले जीवन अऊ सांती मिलथे।

⁷ काबरकि देंह कर बुरा ईछा में मन लगाई तो, परमेस्वर ले बएर रखाई लागे, ओहर परमेस्वर कर कानहूंन ला नई माने, अऊ फुरोंच में ओहर अईसना नई कएर सके।

⁸ अऊ जेमन अपन देंह कर बुरा ईछा कर अनुसार चलथें, ओमन परमेस्वर ला फुरमा करे बर नई सकहीं।

⁹ बकिन जब परमेस्वर कर आत्मा, फुरोंच में तुमन में बसथे, त तुमन अपन देंह कर बुरा ईछा कर बस में नई हवा। बलकि तुमन पबितर आत्मा कर बस में हवा। अगर ककरो में मसीह कर आत्मा नईए, त ओहर मसीह कर जन ना लागे।

¹⁰ अगर मसीह तुमन में बसीस हवे, त भले तुमन कर देंह हर पाप कर चलते मएर गईसे, तबो ले पबितर आत्मा हर, तुमन के जीयाही, काबरकि तुमन परमेस्वर कर आगू में बेकसूर बने हवा।

¹¹ परमेस्वर कर आत्मा, जेहर ईसू ला मरल में ले जियाईस, अगर ओकर आत्मा हर तुमन में बसीस हवे, त जेकस परमेस्वर हर मसीह ला मरल में ले जीयाईस, ओहीच कस ओहर तुमन कर नासमान देंहोंच ला, अपन आत्मा कर जरिए जियाही, जेहर तुमन में बसीस हवे।

ईसू कर संगे हमू मन हकदार लागी

¹² तेकर ले ए भाई-बहिन मन! हमरे अपन देंह कर बुरा ईछा कर, करजा नई खाए हन कि ओकर अनुसार जिनगी बिताई।

¹³ काबरकि अगर तुमन देंह कर बुरा ईछा कर, अधीन में रहिके जिनगी बितईहा, त जरूर मरिहा, बकिन अगर पबितर आत्मा कर द्वारा, तुमन देंह कर बुरा ईछा कर काम मन ला, हरुवाए देईहा, त जीयत रईहा।

¹⁴ जेमन परमेस्वर कर आत्मा कर अगुवाई में चलथें, ओमन परमेस्वर कर लईका लागें।

¹⁵ काबरकि तुमन ला गुलामी कर आत्मा नई मिलीसे, जेहर तुमन में डर लानथे, बकिन तुमन ला गोद लेहल लईका बने कर आत्मा मिलीसे। अऊ जेकर चलते, हमरे परमेस्वर ला चिकेर के कथन, “ए अब्बा, ए मोर दाऊ!”

¹⁶ ओ पबितर आत्मा हर खुदेच हमर आत्मा कर संगे, गवाही देथे कि हमरे परमेस्वर कर लईका लागी।

¹⁷ अऊ अगर हमरे परमेस्वर कर लईका लागी, त हमरे परमेस्वर कर वारिस अऊ मसीह कर संगी वारिस लागी, अगर हमरे ओकर संगे दुख सहबो, त फुरोंच में ओकर संगे महिमा भी पाबो।

¹⁸ मंए समझथों कि जे महिमा हर, हमर ऊपरे परगट होवईया हवे, ओकर तुलना में हमर, ए समय कर दुख तकलीफ हर कांहीच नईए।

¹⁹ काबरकि सिरिस्टी हर ढेरेच आसा भरल नजर ले, ओ समय कर डगर देखत रथे, जब परमेस्वर हर परगट करही कि ओकर लईका मन कोन लागें।

²⁰ काबरकि ए सिरिस्टी हर पाप कर कारन, बेकार होए गईसे, अऊ एहर एकर खुद कर ईछा ले नई होईसे, बकिन परमेस्वर कर ईछा ले, ए आसा में करल गईसे,

²¹ कि सिरिस्टी हर एक दिन खुद बिनास कर, अपन गुलामी ले छुटकारा पाही अऊ परमेस्वर कर लईका मन कर, महिमा ले भरल आजादी पाही।

²² हमरे जानथी कि जमो सिरिस्टी हर, ए आजादी ला पाए बर अजहर ले लईका हलुकाए कर, पीरा नियर कलपत हवे।

²³ बकिन सिरीप ए सिरिस्टी हर, एके झन नई कलपत हवे, ओकर संगे हमूच मन कलपत हवन, जेमन ला पहिला फल पबितर आत्मा कर रूप में मिलीसे, अऊ हमरे ढेरेच आसा भरल नजर ले ए बात कर डगर देखथी, कि परमेस्वर हर हमके अपन लईका कर रूप में गोद लेही, मनेकि हमर देंह ला छुटकारा देही।

²⁴ काबरकि ए पका आसा कर द्वारा हमर उद्धार होईसे, बकिन जे चीज कर हमरे आसा करथी, अगर ओला हमरे पाए गए हवन, त फेर का चीज कर आसा करबो? कोई मईनसे हर ओ चीज कर आसा काबर करही, जेला ओ पहिले ले पाए गईस हवे?

²⁵ बकिन अगर हमरे ओ चीज कर आसा करथी, जेला हमरे अजहर ले नई पाए हवन, त धीरज धएर के ओकर डगर देखत रथी।

²⁶ एही कस पबितर आत्मा हर भी, हमर कमजोरी में हमर मदेत करथे, काबरकि हमरे नई जानी कि हमके कईसे पराथना करे बर चाही, बकिन पबितर आत्मा हर खुद, कलेप-कलेप के जेला हमरे गोएठ में बताए बर नई सकी हमर बर बिनती करथे।

²⁷ परमेस्वर हर हमर हिरदय कर भेद ला जानथे। ओहर समझथे कि पबितर आत्मा कर ईछा का हवे? काबरकि पबितर आत्मा हर परमेस्वर कर ईछा कर अनुसार, पबितर मईनसे मन बर बिनती करथे।

²⁸ हमरे जानथी कि जेमन परमेस्वर ले मया करथें अऊ ओकर ईछा कर अनुसार बलाल गईन हवें, ओमन बर परमेस्वर हर सबो बात में भलाई ही पैदा करथे।

²⁹ काबरकि जेमन ला परमेस्वर हर पहिले ले जान गईसे, अऊ ओमन ला ठहराए भी लेहीस हवे, कि ओमन ओकर बेटा कर सवरूप में होएं, ताकि ओकर बेटा हर नगदेच भाई-बहिन मन में पहिलोठा ठहरे।

³⁰ अऊ जेमन ला परमेस्वर हर ठहराईस, ओमन ला बलाबो करीस अऊ जेमन ला बलाईस, ओमन ला अपन नजर में बेकसूरोच ठहराईस, अऊ जेमन ला बेकसूर ठहराईस, ओमन ला महिमोच देहीस।

³¹ तब हमरे ए बात मन कर बारे में का कही? अगर परमेस्वर हमर कती हवे, त हमर बिरोधी कोन होए सकथे?

³² ओ परमेस्वर हर, अपन खुद कर बेटोच ला नई राएख छोंड़ीस, बकिन हमर सबो झन बर ओके दे देहीस, त ओहर हमके मन ला अपन बेटा कर संगे, सब जाएत ला हरक दिल ले काबर नई देही?

³³ ओमन ऊपरे दोस कोन लगाही, जेमन ला परमेस्वर हर चुनीसे? एहर परमेस्वर लागे, जेहर अपन नजर में ओमन ला बेकसूर ठहराथे।

³⁴ ओहर कोन लागे, जेहर ओमन ला दोसी ठहराथे? एहर मसीह ईसू लागे, जेहर मएर गईस अऊ मरल में ले जी उठीस अऊ ओहर परमेस्वर कर जवनी कती हवे, अऊ हमर बर बिनतीयोच करत हवे।

³⁵ त कोन चीज हर हमके मसीह कर मया ले, अलगे कएर सकथे? का संकट, चाहे बिपेत, चाहे सताओ, चाहे अकाल, चाहे गरीबी, चाहे जोखीम, चाहे तलवार कर डर, का हमके मसीह कर मया ले अलग कएर सकही?

³⁶ जेकस कि पबितर किताब में लिखल हवे, “तोर बर हमरे दिन भर मरवाए जाथन, हमरे ओ भेंड़ मन नियर समझल जाथन, जेमन ला पूजे बर ले जाथें।”

³⁷ बकिन मसीह ईसू, जेहर हमर जग मया करीस, ओकर जरिए, ए सब बात में हमरे पूरा जीत पाथी।

³⁸ काबरकि मोके पूरा भरोसा हवे कि न तो मिरतु, न जीवन, न सरगदूत मन, न नरकदूत, न तो वर्तमान कर कोई चीज, न तो अवईया दिन कर कोई चीज, न तो कोई सामर्थ,

³⁹ न तो अगास में चाहे पताल में कोई सक्ति अऊ जमो सिरिस्टी में कोई आने चीज हर, हमके ला परमेस्वर कर ओ मया ले, अलग नई कएर सके, जेहर हमके हमर परभू ईसू मसीह कर जरिए मिलीस हवे।