रोमियो 7 - Surgujia Bible

कानहूंन ले छुटकारा

¹ ए भाई-बहिन मन, का तुमन नई जाना कि जब तक कोई मईनसे हर जीयत रहथे, तब तक ओकर ऊपरे कानहूंन कर अधिकार रहथे? (मंए ओमन ला कहत हों, जेमन मूसा कर कानहूंन ला जानथें)

² एला एक उदाहरन कर रूप में मंए बताथों कि एगोट सवांगीन, जेकर बिहाओ होईसे, ओहर कानहूंन कर अनुसार अपन घरदार कर अधीन में रथे, जब तक ओकर घरदार हर जीयत रथे। बकिन अगर ओकर घरदार हर मएर जाथे, त ओ सवांगीन हर बिहाओ कर कानहूंन ले छुट जाथे।

³ अगर ओ सवांगीन हर अपन घरदार कर जीयत कोई दूसर मईनसे जग सबंध बनाए लेथे, त ओहर छिनार कहाथे, बकिन अगर ओकर घरदार हर मएर जाथे, त ओ सवांगीन हर कानहूंन कर बंधन ले छुट जाथे। तब अगर ओहर कोई दूसर आदमी जग बिहाओ कएर लेथे, त ओहर छिनार नई कहाए।

⁴ ओही कस ए मोर भाई-बहिन मन! तुहूंच मन मसीह कर देंह कर अंग होए कर चलते, कानहूंन कती ले तो मएर गए हवा, कि मसीह जेहर मरल में ले जी उठीस, ओकर संगे नाता जुड़े ताकि हमरे, परमेस्वर बर फर लाएन सकी।

⁵ जब हमरे देंह कर बुरा ईछा कर अधीन में जीयत रहेन, त ए कानहूंन हर पापमय लालसा ला, उतेजित करत रहीस अऊ हमर देंह कर अंग मन में काम करत रहीस। अऊ जे जाएत हमरे करत रहेन ओकर फल मिरतु रहीस।

⁶ बकिन हमरे जे कानहूंन कर बंधन में रहेन अऊ ओकर कती ले मएर गए हवन, एकरे ले अब हमरे ओ कानहूंन ले छुट गए हन, ताकि हमरे लिखीत कानहूंन कर पुराना रीती में नहीं, बलकि पबितर आत्मा कर नांवा रीती कर अनुसार, परमेस्वर कर सेवा करथी।

कानहूंन ले पाप कर चिन्हारी

⁷ त हमरे का कही? का मूसा कर कानहूंन हर पाप लागे? कभों नहीं! बलकि अगर कानहूंन नई रतीस, त पाप का हवे ओला मंए नई चीनतें। अगर कानहूंन नई कहतीस, “लालच झईन कर,” त लालच का हवे, मंए नई जानतें।

⁸ बकिन पाप हर मोका पाए के अगियां कर द्वारा, मोर में सब मधे कर लालच पैदा करीस, काबरकि अगर कानहूंन नईए, त पाप कर कोई सक्ति नईए।

⁹ एक समय रहीस, जब कानहूंन नई रहीस अऊ मंए जीयत रहें, बकिन जब अगियां आईस, त पाप हर जी गईस अऊ मंए मएर गएं।

¹⁰ अऊ ओही अगियां, जेहर जिनगी देहे बर रहीस, मोर मिरतु कर कारन बनीस।

¹¹ काबरकि पाप हर अगियां कर द्वारा, मोका कर फयदा उठाके, मोके धोखा देहीस अऊ ओ अगियां कर जरिए मोके माएर देहीस।

¹² तेकर ले कानहूंन हर पबितर हवे अऊ अगींयोंच हर पबितर, सही अऊ बढ़िहां हवे।

¹³ जे कानहूंन हर बढ़िहां रहीस, का ओहर मोर बर मिरतु कर कारन बनीस? कभों नहीं? बकिन ओ कानहूंन जेहर बढियां रहीस, ओकर चलते ए पाप हर, मोर मिरतु कर कारन बनीस, ताकि हमरे पहिचान सकी कि सच में ए पाप हर का हवे। अऊ अगियां कर जरिए, ए पता चलीस कि पाप हर केतना मान खतरनाक हवे!

¹⁴ हमरे जानथी कि मूसा कर कानहूंन हर तो आत्मिक हवे, बकिन मंए तो पापी सुभाव कर मईनसे लागों, अऊ गुलाम कर रूप में पाप कर हाथ में बेंचल गए हवों।

¹⁵ जेला मंए करथों ओला मंए नई समझों, काबरकि जेला मंए करे बर चाहथों ओला नई करों, बकिन जे चीज ले मोके घिन आथे, ओहीच ला करथों।

¹⁶ अऊ अगर मंए जेला नई चाहों, ओहीच ला करथों, त मंए ए बात ला माएन लेथों कि मूसा कर कानहूंन हर सही हवे।

¹⁷ एकरले ओ घिनक काम कर करोईया मंए ना लागों, बलकि पाप लागे जेहर मोर में बसीस हवे।

¹⁸ मंए जानथों कि मोर में, मनेकि मोर पापी देंह में एको ठन बढ़िहां चीज नई बसे, काबरकि जेहर ठीक हवे, ओला करे कर ईछा तो मोर में हवे, बकिन मंए ओला नई कएर सकों।

¹⁹ काबरकि जे भलाई करे कर मंए ईछा करथों, ओला तो नई करों, बकिन जे बुराई कर ईछा मंए नई करों, ओहीच ला करथों।

²⁰ तेकर ले अगर मंए ओही काम ला करथों, जेला मंए नई चाहों, त ओकर करोईया मंए ना लागों, बकिन ओकर करोईया ओ पाप लागे, जेहर मोर में बसीस हवे।

²¹ एही कस मंए एगोट आने कानहूंन ला, मोर में काम करत पाथों कि जब मंए भलाई करे बर चाहथों, त भलाई करे ले रोकोईया बुरा ईछा हर मोर में बसीस हवे।

²² काबरकि मंए अंतरात्मा में परमेस्वर कर, कानहूंन ले ढेरेच खुस रथों।

²³ बकिन मंए अपन देंह कर अंग मन में, एगोट दूसर कानहूंन ला देखथों, जेहर मोर मन कर कानहूंन ले लड़थे। ए कानहूंन हर मोके पाप कर बंधन में डालथे, जेहर मोर देंह में हवे।

²⁴ मंए कईसना अभागा मईनसे लागों! मोके मिरतु कर अधीन में रहोईया, ए देंह ले कोन छोंड़ाही?

²⁵ परमेस्वर कर धनबाद होए, जेहर मोके परभू ईसू मसीह कर द्वारा छोंड़ाथे। एकरे चाड़हे मंए खुद अपन मन में, परमेस्वर कर कानहूंन कर गुलाम लागों, बकिन मोर देंह कर बुरा ईछा कर कारन, मंए पाप कर गुलाम लागों।