रोमियो 6 - Surgujia Bible

मसीह कर संगे नांवा जिनगी

¹ त हमरे का कही? का हमरे पाप करतेच रही, ताकि परमेस्वर कर किरपा हर हमर बर बढ़त रहे?

² कभों नहीं! हमरे पाप कती ले मएर चुके हन, त फेर हमरे पाप में कईसे जिनगी बिताबो?

³ का तुमन नई जाना कि हमरे सब झन, जेमन मसीह ईसू में बतिस्मा ले चुके हन, त हमरे ओकर मिरतु में बतिस्मा लेहे हन?

⁴ तेकर ले बतिस्मा कर चलते हमरे मसीह कर संगे मएर गए हन अऊ गाड़ल गए हन, ताकि जेकस मसीह हर दाऊ कर महिमा कर चलते मरल में ले जी उठीस, ओही कस हमू मन एगोट नांवा जिनगी जीबो।

⁵ अगर हमरे मसीह कर मिरतु में ओकर संगे मेराए गए हन, त फुरोंच में ओकर जी उठोच में ओकर संगे मेराए जाबो।

⁶ हमरे जानथी कि हमर पुराना सुभाव हर, मसीह कर संगे कुरूस में चघाल गईसे, ताकि पाप कर देंह हर निरबल होए जाए, अऊ फेर हमरे पाप कर गुलाम झईन बनी।

⁷ काबरकि जेहर मएर गईस, ओहर पाप कर गुलामी ले छुट गईस।

⁸ हमर ए बिस्वास हवे कि अगर हमरे मसीह कर संगे मएर गए हन, त ओकर संगे जीबोच करब।

⁹ काबरकि हमरे जानथी कि मसीह हर मरल में ले जी उठीस, त ओहर फेर कभों नई मरही। अऊ ओके मिरतु हर अपन अधीन में नई कएर सके।

¹⁰ काबरकि मसीह जेहर मरीस, ओहर पाप कर सक्ति ला टोरे बर एकेच दाएर मएर गईस, बकिन अब ओहर जीवित होए के, परमेस्वर बर जीयथे।

¹¹ एही कस तुहूंच मन अपन आप ला, पाप कती ले मरल समझा, बकिन मसीह ईसू कर द्वारा परमेस्वर बर जीयत समझा।

¹² तेकर ले अपन देंह, जेहर नास होए जाही, ओकर ऊपरे पाप ला राएज करे बर झईन देआ, ताकि तुमन ओकर ईछा ला झईन माना।

¹³ तुमन अपन देंह कर अंग मन ला, बुराई कर जरिया बने बर पाप ला झईन सोंपा, बकिन मरल में ले जीयत जाएन के, अपन-आप ला परमेस्वर के अरपन कर देआ। अऊ तुमन अपन देंह कर अंग मन ला सही काम कर जरिया बने बर परमेस्वर ला सोंएप देआ।

¹⁴ तब पाप तुमन कर ऊपरे राएज नई करही, काबरकि तुमन कानहूंन कर अधीन में नई जीयथा, बलकि परमेस्वर कर किरपा कर अधीन में जीयथा।

पाप कर गुलामी ले छुटकारा

¹⁵ त का करी? अब तो हमरे मूसा कर कानहूंन कर अधीन में नई हवन, बलकि किरपा कर अधीन में हवन? त का हमरे पाप करतेच रही? कभों नहीं!

¹⁶ का तुमन नई जाना कि जब तुमन अपन आप ला, ककरो अगियां माने बर सोंएप देथा, त तुमन ओकर गुलाम बएन जाथा, अगर तुमन पाप कर अगियां मनोईया एगोट गुलाम बएन सकथा, जेकर अंत मिरतु हवे, एही कस अगर तुमन परमेस्वर कर अगियां ला मनोईया एगोट गुलाम बएन सकथा, जेकर अंत ओकर नजर में बेकसूर होए बर हवे।

¹⁷ बकिन परमेस्वर कर धनबाद होए, कि पहिले तो तुमन पाप कर गुलाम रहा, अब तो तुमन अपन पूरा हिरदय ले, परमेस्वर कर उपदेस कर मनोईया होए गए हवा, जेहर तुमन के सोंपल गईस हवे।

¹⁸ अऊ तुमन पाप ले छुटकारा पाए के परमेस्वर कर नजर में, बेकसूर जिनगी जीए कर गुलाम होए गए हवा।

¹⁹ एहर तुमन ला समझे बर कठिन हवे, तेकर ले मंए तुमन ला सधारन गोएठ में समझाथों। तुमन तो पहिले अपन अंग मन ला असुध काम अऊ कुकरम बर सोंएप देहे रहा, जेकर चलते अऊ बगरा कुकरम करत रहा, अब तुमन अपन अंग मन ला परमेस्वर कर नजर में सही काम करे बर, गुलाम कर रूप में सोंएप देआ, ताकि तुमन पबितर होए जईहा।

²⁰ काबरकि जब तुमन पाप कर गुलाम रहा, त तुमन के परमेस्वर कर नजर में, सही काम करे कर, सोंच भी नई रहीस।

²¹ जे काम मन ले तुमन अब लजावत हा, ओ काम मन ले तुमन के का फयदा होईस? काबरकि ओ काम मन कर अंत मिरतु हवे।

²² बकिन अब तुमन पाप ले छुईट के, परमेस्वर कर गुलाम बएन गए हवा। एकरे ले जे फयदा तुमन ला मिलत रथे, ओहर पबितरता लागे, अऊ एकर अंत परमेस्वर कर संगे अमर जिनगी लागे।

²³ काबरकि पाप कर मजदूरी तो मिरतु लागे, बकिन परमेस्वर कर बरदान, हमर परभू मसीह ईसू कर जरिए अमर जिनगी लागे।