रोमियो 5 - Surgujia Bible

परमेस्वर कर संगे हमर मेल-मिलाप

¹ एकरे बर, जब हमरे बिस्वास कर चलते, परमेस्वर कर नजर में बेकसूर ठहराल गए हन, त हमर परभू ईसू मसीह कर जरिए परमेस्वर कर संगे हमर मेल-मिलाप होए गईसे।

² हमर परभू ईसू मसीह कर जरिए बिस्वास कर कारन, हमरे ए किरपा ला पाए हवन, जेमें हमरे बने रथन। परमेस्वर कर महिमा कर भागी होए बर हमरे ढेरेच खुसी कर संगे अगुरत रथी।

³ सिरीप एतनेच भर नहीं, बकिन हमरे अपन दुख-पीरोच में आनंद मनाथी, काबरकि हमरे जानथी कि दुख पीरा हर धीरज पैदा करथे,

⁴ अऊ धीरज हर बढियां सुभाव पैदा करथे अऊ बढियां सुभाव ले भरोसा पैदा होथे।

⁵ अऊ ए भरोसा हर हमके निरास नई करे, काबरकि परमेस्वर हर हमके पबितर आत्मा देहीसे अऊ ए पबितर आत्मा कर जरिए, ओहर अपन मया ला हमर हिरदय में रीकोईस हवे।

⁶ जब हमर बर पाप ले छुटकारा पाए कर कोई डगर नई रहीस, त मसीह हर ठीक समय में, हमरे जेमन पापी रहेन हमर बर मरीस।

⁷ एहर बड़ा मुसकिल हवे कि कोनो हर, कानहूंन कर पालन करोईया, मईनसे बरीक मरे, सायद ए होए सकथे कि एगोट बढ़िहां मईनसे बरीक, कोनो हर मरे कर हिमेत करे।

⁸ बकिन जब हमरे पापी ही रहेन, तब मसीह हर हमर बर मरीस। एकर द्वारा परमेस्वर हर अपन मया ला हमर ऊपरे देखाईस।

⁹ अगर हमरे मसीह कर लहू कर कारन, परमेस्वर कर नजर में बेकसूर ठहराए गए हन, त फेर मसीह कर द्वारा परमेस्वर हर, हमके अपन कोरोध ले जरूर बचाही।

¹⁰ काबरकि जब हमरे परमेस्वर कर बईरी रहेन, त ओकर बेटा कर मिरतु कर द्वारा परमेस्वर कर संगे हमर मेल-मिलाप होईस, त फेर मेल-मिलाप होए कर पाछू, ओकर बेटा कर जिनगी कर द्वारा हमरे उद्धार जरूर पाबो।

¹¹ सिरीप एहीच नहीं, हमरे अपन परभू ईसू मसीह कर जरिए, परमेस्वर में आनंद मनाथी। एही परभू ईसू मसीह कर द्वारा, हमर मेल-मिलाप होईस हवे।

आदम कर द्वारा मिरतु अऊ मसीह कर द्वारा जिनगी

¹² जेकस कि आदम नांव कर, एगोट मईनसे कर द्वारा पाप हर संसार में ढुकिस अऊ पाप कर द्वारा मिरतु हर ढुकिस। ओही कस मिरुतु हर सब मईनसे मन में बगेर गईस, काबरकि सब झेमन पाप करीन।

¹³ परमेस्वर हर मूसा ला कानहूंन देहीस ओकर आगू ले, संसार कर सब मईनसे मन पाप करीन, बकिन जिहां कानहूंन नईए, उहां परमेस्वर हर पाप कर लेखा नई ले।

¹⁴ तबो ले आदम ले लेके अगमजानी मूसा तक मिरतु हर, सब मईनसे मन कर ऊपरे राएज करतेच रहीस, जेमन आदम कस परमेस्वर कर अगियां ला, टोरे कर द्वारा पाप नई करे रहीन, ओमनोच कर ऊपरे मिरतु हर राएज करतेच रहीस। आदम हर तो ओ उद्धार देवईया मसीह कर परछाई रहीस, जेहर अवईया रहीस।

¹⁵ बकिन परमेस्वर कर बरदान अऊ ओकर अगियां ला टोरे में कोई मेल नईए। काबरकि परमेस्वर कर अगियां ला एक झन मईनसे हर टोरीस, ओकर चलते नगदेच झेमन मरीन, त एक झन मईनसे कर जरिए, मनेकि ईसू मसीह कर किरपा कर द्वारा, परमेस्वर कर किरपा अऊ बरदान हर, नगदेच मईनसे मन कर ऊपरे ढेरेच बगरा होईस।

¹⁶ परमेस्वर कर बरदान कर फल अऊ एगोट मईनसे, मनेकि आदम हर पाप करीस, तेकर फल ए दुनों मन एके नियर नईएं। काबरकि एगोट मईनसे हर पाप करीस, तेकरे चलते परमेस्वर कर दंड कर अगियां कर फईसला आईस, बकिन मईनसे मन पाप करतेच रहीन, तबो ले परमेस्वर कर बरदान हर मईनसे मन ला ओकर नजर में बेकसूर ठहराईस।

¹⁷ काबरकि अगर एक झन मईनसे, मनेकि आदम कर अगियां टोरे कर चलते, मिरतु हर सब मईनसे मन कर ऊपरे राएज करीस, त जेमन ला परमेस्वर हर, अपन नजर में बेकसूर ठहराईस हवे अऊ ओकर किरपा ला पाईन हवें, ओमन एगोट मईनसे, मनेकि ईसू मसीह कर जरिए, अमर जिनगी में अऊ केतना बगरा राएज करहीं।

¹⁸ जेकस कि एगोट मईनसे हर, परमेस्वर कर अगियां टोरे कर चलते, सब मईनसे मन बर दंड कर कारन बनीस, ओहीच कस ईसू कर एक धरम कर काम, मनेकि ओकर मिरतु कर चलते, सब झेमन ला परमेस्वर हर अपन नजर में बेकसूर ठहराईस अऊ ओमन ला अमर जिनगी मिलीस।

¹⁹ जेकस कि एगोट मईनसे हर परमेस्वर कर अगियां नई मानीस, तेकर चलते, नगदेच मईनसे मन पापी ठहरीन, ओही कस एगोट मईनसे हर परमेस्वर कर अगियां मानीस, तेकर चलते नगदेच मईनसे मन ओकर नजर में बेकसूर ठहरीन।

²⁰ मूसा कर कानहूंन तो पाछू देहल गईस अऊ एकरले पाप बएढ़ गईस। बकिन जिहां पाप ढेर होईस, उहां किरपा हर ओकरो ले ढेर होईस।

²¹ ताकि जेकस पाप हर मईनसे मन कर ऊपरे राएज करीस, अऊ ओमन कर जीवन में मिरतु आईस, ठीक ओही कस परमेस्वर कर किरपा हर, हमर ऊपरे राएज करत हवे अऊ हमरे ओकर नजर में, बेकसूर ठहरेन कि हमर परभू ईसू मसीह कर द्वारा अमर जिनगी मिले।