रोमियो 4 - Surgujia Bible

अबराहम कर बिस्वास

¹ तब हमरे का कही? हमर पूरखा अबराहम हर परमेस्वर कर नजर में कईसे बेकसूर ठहरथे, ओकर बारे में का ओ जानत रहीस?

² अगर अबराहम हर अपन काम कर चलते, परमेस्वर कर नजर में बेकसूर ठहराल जातीस, त ओ जरूर घमंड कएर सकत रहीस, बकिन परमेस्वर कर आगू में ओ घमंड नई कएर सके।

³ पबितर किताब हर, का कथे? “अबराहम हर परमेस्वर कर ऊपरे बिस्वास करीस, एकरले परमेस्वर हर, ओके ला अपन नजर में बेकसूर ठहराईस।”

⁴ जब कोई मईनसे हर बूता करथे, त ओके बनी मिलथे, ओ बनी हर दान नहीं, बलकि एला ओकर हक समझल जाथे।

⁵ परमेस्वर हर पापी मईनसे ला बेकसूर ठहराथे, ओ परमेस्वर कर ऊपरे बिस्वास करोईया मईनसे ला अपन काम कर चलते नहीं, बकिन बिस्वास कर चलते ओहर बेकसूर ठहराथे।

⁶ जे मईनसे ला परमेस्वर हर बिगर करम कर, अपन नजर में बेकसूर ठहराथे, ओके दाऊद राजोच हर धन्य कथे।

⁷ “धन्य हवें ओमन, जेमन कर अपराध छमा होईसे, अऊ जेमन कर पाप हर ढांकल गईसे।

⁸ धन्य हवे ओ मईनसे, जेकर पाप कर हिसाब, परभू हर कभों नई करे।”

⁹ ए धन्य आसीस हर, का सिरीप खतना करोईया मन बर हवे, आखिर बिगर खतना करोईयोच मन बर हवे? हमरे ए कथन, “अबराहम हर परमेस्वर कर ऊपरे बिस्वास करीस अऊ तेकर ले परमेस्वर हर ओके ला, अपन नजर में बेकसूर ठहराईस।”

¹⁰ त ओहर कब बेकसूर गनल गईस? जब खतना होईस तब, आखिर बिगर खतना कर रहीस तब? खतना होईस ते घनी नहीं, बकिन बिगर खतना कर रहीस तब।

¹¹ खतना करे ले आगू परमेस्वर हर ओकर बिस्वास कर चलते अबराहम ला अपन नजर में बेकसूर ठहराईस अऊ फेर एगोट चिन्हा कर रूप में ओहर खतना करीस, एकरले अबराहम हर ओमन कर आत्मिक पूरखा लागे, जेमन बिगर खतना कर दसा में रथें, तबो ले परमेस्वर कर ऊपरे बिस्वास करथें। ओमन अपन बिस्वास कर द्वारा ही बेकसूर ठहराल जाथें।

¹² अऊ ओहर ओ खतना करोईयोच मन कर पूरखा लागे, जेमन सिरीप खतना नई करीन हवें, बकिन ओ बिस्वास कर डगर में चलथें, जेमें हमर पूरखा अबराहम हर खतना करे ले आगू चले रहीस।

¹³ परमेस्वर हर अबराहम अऊ ओकर बंस ला, बात जबान करीस कि ओमन ए संसार कर हकदार होहीं, त ए बात जबान हर मूसा कर कानहूंन ला, पालन करे कर द्वारा पूरा नई होईस, बकिन ओमन परमेस्वर कर ऊपरे बिस्वास करीन अऊ ओकर नजर में बेकसूर ठहरिन, तब ए बात जबान हर पूरा होईस।

¹⁴ अगर कानहूंन कर अधीन में रहोईया हर हकदार बनथे, त बिस्वास हर अनभनिया हवे अऊ बात जबान हर बिगर काम कर हवे।

¹⁵ काबरकि कानहूंन हर तो परमेस्वर कर कोरोध ला लानथे। अऊ जिहां कानहूंन नईए, उहां कानहूंन ला माने कर सवालेच नईए।

¹⁶ एकरे चलते बात जबान हर, बिस्वास कर ऊपरे टिकीस हवे, ताकि अबराहम कर सब संतान मन, परमेस्वर कर किरपा ले एला जरूर पाए जाएं। अऊ ए बात जबान हर सिरीप ओमन बर ना लागे, जेमन कानहूंन कर पालन करथें, बकिन ए बात जबान कर ओहू मन हकदार लागें, जेमन अबराहम कस बिस्वास करथें, ओहर तो हमर सब झन कर पूरखा लागे।

¹⁷ जेकस कि पबितर किताब में लिखल हवे, “मंए तोके ढेरेच जाति कर मईनसे मन कर पूरखा ठहराए हवों।” परमेस्वर कर नजर में अबराहम हर हमर पूरखा लागे। अबराहम हर ओ परमेस्वर कर ऊपरे बिस्वास करीस, जेहर मरल मन ला जीयाथे अऊ ओ चीज मन ला सिरजथे, जेमन हलेच नईएं।

¹⁸ अबराहम कर जिनगी में लईका होए कर तनिकोच आसा नई रहीस, तबोले ओहर ए निरासा कर दसा में भी आसा राएख के, परमेस्वर कर ऊपरे बिस्वास करीस, तेकर ले ढेरेच जाति कर मईनसे मन कर पूरखा बएन गईस। जेकस पबितर किताब में ओकर बारे में कहल गईस हवे, “तोर संतान मन एही कस अनगिनत होहीं।”

¹⁹ अबराहम हर करीबन एक सौ बछर कर रहीस। ओकर सरीर हर मरल सहींक रहीस अऊ ओकर परानी सारा कर कोख हर, लईका होए कर दसा में नई रहीस, तबोले ओहर बिस्वास में कमजोर नई होईस।

²⁰ अऊ ओकर बिस्वास हर नई डोलिस अऊ परमेस्वर कर बात जबान में ओहर संका नई करीस, बलकि बिस्वास में बजर होए के परमेस्वर कर महिमा करीस।

²¹ अऊ ओके पका भरोसा होए गए रहीस कि जे बात कर परमेस्वर हर जबान करीसे, ओला पूरा करोच में ओहर सामर्थी हवे।

²² एही बिस्वास कर चलते, “परमेस्वर हर अबराहम ला, अपन नजर में बेकसूर मानीस।”

²³ बकिन जब परमेस्वर हर ओके “अपन नजर में बेकसूर मानीस,” ए गोएठ हर सिरीप अबराहम बर नई लिखल गईसे,

²⁴ बकिन हमरोच बर लिखल हवे। परमेस्वर हर हमूच मन ला अपन नजर में बेकसूर मानही, अगर हमरे ओकर ऊपरे बिस्वास करथी, जेहर हमर परभू ईसू ला मरल में ले जियाईस।

²⁵ ईसू ला हमर पाप कर चलते पकड़वाल गईस अऊ परमेस्वर कर नजर में हमके ला, बेकसूर ठहराए बर ओके मरल में ले जियाल भी गईस।