रोमियो 3 - Surgujia Bible

परमेस्वर बिस्वास कर लाएक हवे

¹ तब यहूदी होए कर का फयदा हवे? आखिर खतना करुवाए कर का मतलब हवे?

² हां, जरूर ढेरेच फयदा हवे। सबले आगू तो, यहूदी मन ला परमेस्वर कर बचन सोंपल गईस।

³ अगर यहूदी मन ले तनीक झेमन तो, बिस्वास नई करीन, त का होईस? का एकर मतलब ए हवे कि परमेस्वर हर बिस्वास कर लाएक नईए?

⁴ कभों नहीं, अगर सब मईनसे मन झूठा हवें, तबो ले परमेस्वर हर सचा ठहरही, जेकस पबितर किताब में लिखल हवे, “जे बात ला तंए कहथस ओ बात में, तंए परमेस्वर कर नजर में बेकसूर ठहरबे अऊ नियाओ करत घरी तोके जीत मिलही।”

⁵ अगर हमर अनियाए हर परमेस्वर कर नियाओ ला देखाथे, त हमरे का कहबो? का ए कहबो कि परमेस्वर हर हमर ऊपरे कोरोध करके दंड देथे, त का ओहर अनियाए करथे? (मंए एला मईनसे कर सोंच कर अनुसार कहत हवों)

⁶ कभों नहीं! अगर परमेस्वर हर अनियाए करथे, त ओहर संसार कर नियाओ कईसे कएर सकही?

⁷ कोई मोके एकस पूछ सकथे “अगर मोर झूठ बोले कर कारन परमेस्वर कर सचाई हर ओकर महिमा बर बढ़थे, त परमेस्वर काबर मोके दोसी ठहराथे?”

⁸ तनीक झेमन हमर ऊपरे दोस लगाए के कथें कि हमरे एही कस सिखाथन, “त आवा हमरे बुराई करी, ताकि भलाई परगट होए जाए” अईसना मईनसे मन दोसी ठहराए जाए कर लाएक हवें।

कोनो हर परमेस्वर कर नजर में बेकसूर नईए

⁹ त फेर का कही? का हमरे यहूदी मन, गैर यहूदी मन ले बढियां हवन? बिलकुल नहीं! काबरकि हमरे आगूवेच ले, ए दोस लगाए चुके हन कि यहूदी अऊ गैर यहूदी सब झेमन एकेच सहींक पाप कर अधीन में हवें।

¹⁰ जेकस कि पबितर किताब में लिखल हवे, “कोई परमेस्वर कर नजर में बेकसूर नईए, एकोच झन नईएं।

¹¹ कोई समझदार नईएं, कोई परमेस्वर कर खोज नई करें।

¹² सबो झन भटेक गईन हवें, सब कोई एक संगे बेकार होए गईन हवें। कोई भलाई नई करे, एकोच झन नहीं।”

¹³ “ओमन कर ढेंटू हर उघरा मरघेटिया लागे, ओमन अपन जीभ ले छल-कपट कर बात करथें” “ओमन कर ओंठ में करांएत सांप कर जहर हवे।”

¹⁴ “ओमन कर मूंह हर सराप अऊ करूवाहट ले भरीस हवे।”

¹⁵ “ओमन कर गोड़ हर लहू बहाए बर कूदथे,

¹⁶ ओमन कर डगर में नास अऊ बिपेत हवे,

¹⁷ अऊ ओमन सांती कर डगर ला नई जानें।”

¹⁸ “ओमन कर आंएख में परमेस्वर कर डर नईए।”

¹⁹ हमरे जानथी कि मूसा कर कानहूंन हर जे कुछ कथे, ओहर ओमन ला कथे, जेमन कानहूंन कर अधीन में हवें, ताकि सबेच मूंह हर बंद होए जाए अऊ जमो संसार हर परमेस्वर कर दंड कर लाएक ठहरे।

²⁰ काबरकि मूसा कर कानहूंन ला माने कर द्वारा, कोनो मईनसे हर परमेस्वर कर नजर में बेकसूर नई ठहरही, काबरकि कानहूंन कर जरिए, मईनसे हर सिरीप पाप कर पहिचान करथे।

बिस्वास कर द्वारा पाप ले छुटकारा

²¹ बकिन अब परमेस्वर हर एला परगट करीस हवे कि बिगर कानहूंन कर पालन करे, मईनसे मन ओकर नजर में कईसे बेकसूर होए सकथें, ए वायदा कर बारे में ढेरेच पहिले मूसा कर कानहूंन अऊ अगमजानी मन लिखीन हवें।

²² परमेस्वर हर हमरे सब झन ला ईसू मसीह कर ऊपरे बिस्वास करे कर द्वारा, ओकर आगू में बेकसूर बनाईसे, ए छुटकारा हर ओ सब झन बर हवे, जेमन बिस्वास करथें, अब एमें कांही भेद-भाव नईए।

²³ काबरकि सब झेमन पाप करीन हवें, अऊ परमेस्वर कर महिमा ले दुरिहां होए गईन हवें।

²⁴ बकिन परमेस्वर हर अपन किरपा ले हमके ला, ईसू मसीह कर द्वारा हमर पाप ले छुटकारा देहीस हवे, ए छुटकारा कर चलते, ओहर सेंथिया में हमके अपन नजर में बेकसूर ठहराईस हवे।

²⁵ परमेस्वर हर ईसू मसीह ला पाप कर छमा बरीक, बलिदान कर रूप में देहीस। जब मईनसे मन बिस्वास करथें कि ईसू हर अपन लहू बहाए के, अपन जीवन कर बलिदान देहीस हवे, त परमेस्वर हर ओमन ला अपन नजर में बेकसूर ठहराथे, ईसू कर बलिदान हर, एला परगट करथे कि परमेस्वर हर अपन धीरज धरे कर चलते, तईहा जुग कर पाप मन ला अनदेखा कएर देहीस।

²⁶ परमेस्वर हर एही जुग में, ए साबित करे बर चाहीस कि ओहर खुद नियाओ ले सब कुछ करथे अऊ ओ मईनसे मन ला, अपन नजर में बेकसूर ठहराथे, जेमन ईसू कर ऊपरे बिस्वास करथें।

²⁷ तब घमंड कराई कहां रहीस? एकर बर तो जघा हलेच नईए। का हमरे कोनो कानहूंन ला माने ले, परमेस्वर कर नजर में बेकसूर ठहरबो? कभों नहीं, बलकि सिरीप बिस्वासेच कर द्वारा बेकसूर ठहरबो।

²⁸ काबरकि हमरे ए मानथी कि मईनसे हर सिरीप, कानहूंन कर काम मन ला पालन करे कर चलते, परमेस्वर कर नजर में बेकसूर नई ठहरे, बकिन ईसू मसीह कर ऊपरे बिस्वास करे कर चलते, परमेस्वर कर नजर में बेकसूर ठहरथे।

²⁹ का परमेस्वर हर सिरीप यहूदी मन कर परमेस्वर लागे? का ओहर गैर यहूदीयोच मन कर परमेस्वर ना लागे? हां, ओहर तो गैर यहूदीयोच मन कर परमेस्वर लागे।

³⁰ काबरकि सिरीप एकेच ठन परमेस्वर हवे, जेहर खतना करोईया यहूदी मन ला, ओमन कर बिस्वास कर चलते अऊ बिगर खतना करोईया गैर यहूदी मन ला ओहीच बिस्वास कर चलते अपन नजर में बेकसूर ठहराही।

³¹ त का हमरे ए बिस्वास कर चलते, मूसा कर कानहूंन ला अनभनिया ठहराथी? कभों नहीं! बलकि हमरे कानहूंन ला बजर बनाए के राखथी।