रोमियो 16 - Surgujia Bible

परेरीत पौलुस कर जोहार

¹ मंए हमर बहिन फीबे बर तुमन जग बिनती करत हों, जेहर किंखिरीया सहर कर कलीसिया में सेवकाईन हवे।

² जेकस पबितर मईनसे मन ला चाही, ओही कस तुमन परभू में ओकर सवागत करा, अऊ अगर ओके कोई चीज कर जरूरत हवे, त ओकर मदेत करा, काबरकि ओहर ढेरेच झेमन कर मदेत करीसे अऊ ओकर संगे मोरोच मदेत करीसे।

³ पिरिसकिला बहिन अऊ अकविला भाई ला मोर जोहार। ओमन ईसू मसीह कर सेवा में मोर संगे सेवा करोईया लागें।

⁴ ओमन मोर परान ला बचाए बर अपनेच जान ला जोखीम में डाएल देहे रहीन, अऊ ओमन ला सिरीप महीच नहीं, बकिन गैर यहूदी मन कर सब कलीसियोच मन धनबाद देहत हवें।

⁵ ओहूच कलीसिया ला मोर जोहार, जेहर ओमन कर घरे जुटथे। मोर दुलरुवा संगता इपैनितुस ला मोर जोहार, जेहर एसिया परदेस में सबले आगू मसीह कर ऊपरे बिस्वास करीस।

⁶ बहिन मरियम ला मोर जोहार देआ, जेहर तुमन बर कठिन मेहनत करीस हवे।

⁷ अन्द्रुनिकुस भाई अऊ यूनियास भाई ला मोर जोहार करा। ओमन मोर रिस्तेदार लागें अऊ ओमन मोर संगे जेहल में रहीन। परेरीत मन में ओमन नामी लागें अऊ ओमन मोर ले आगू मसीह में बिस्वास करीन।

⁸ अम्पलियातुस भाई ला मोर जोहार कईहा, जेहर परभू में मोर मयारू संगता लागे।

⁹ उरबानुस भाई ला मोर जोहार करा, जेहर मसीह कर सेवा में मोर संगे सेवा करोईया लागे अऊ मोर मयारू संगता इस्तखुस ला मोर जोहार करा।

¹⁰ अपिल्‍लेस भाई ला मोर जोहार, जेकर बिस्वास हर मसीह में साबित होए गईसे। अरिस्तुबुलुस भाई कर घराना ला मोर जोहार करा।

¹¹ मोर रिस्तेदार हेरोदियास भाई ला मोर जोहार। नरकिस्सुस भाई कर घराना में, जेमन परभू कर ऊपरे बिस्वास करथें, ओमन ला जोहार।

¹² त्रुफेना बहिन अऊ त्रुफोसा बहिन ला मोर जोहार। ए सवांगीन मन, परभू बरिक कठिन मेहनत करथें। आने सवांगीन पिरसिस बहिन ला मोर जोहार। ओहर मोर मयारू संगी लागे, जेहर परभू में ढेरेच मेहनत करीस हवे।

¹³ रूफुस भाई ला मोर जोहार, जेके ला परभू हर चुनीस हवे। ओकर दाई जेहर मोरोच दाई कस हवे।

¹⁴ असुक्रितुस, फिलगोन, हिरमेस, पत्रुबास, हिरमास अऊ जे भाई-बहिन मन, ए भाई मन कर संगे हवें, ओ सबो झन ला मोर जोहार।

¹⁵ फिलुलुगुस अऊ यूलिया अऊ नेरयुस अऊ ओकर बहिन अऊ अलुम्पास अऊ जमो परमेस्वर कर मईनसे मन, जेमन एमन कर संगे हवें, ओमन ला जोहार।

¹⁶ मसीही मया कर संगे एक दूसर के जोहार करा। इहां मसीह कर जमो कलीसिया मन तुमन के जोहार करथें।

¹⁷ ए मोर भाई-बहिन मन! मंए तुमन ले बिनती करत हों, कि तुमन ओ मईनसे मन ले सवाचेती रईहा, जेमन तुमन कर मझार में फूट डालथें अऊ तुमन कर बिस्वास ला बिगाड़थें। एहर ओ सिक्छा ले मेल नई खाए, जेहर तुमन के मिलीसे। अईसना मईनसे मन ले दुरिहां रईहा।

¹⁸ काबरकि अईसना मईनसे मन, हमर परभू मसीह कर सेवा नई करें, बकिन एमन अपन पेट बर सेवा करथें। एमन चिकन-चिकन गोठीयाए के अऊ चापलूसी करके सीधा साधा मईनसे मन ला बहकाए देथें।

¹⁹ तुमन परभू कर बात ला केतना बढियां ले मानथा, ओकर चरचा सबो मईनसे मन में बगेर गईसे, तेकर ले मंए तुमन कर बारे में ढेरेच खुस हों। बकिन मंए ए चाहत हों कि तुमन बुईधमानी कर संगे, एक दूसर कर भलाई करा अऊ अपन आप ला बुराई ले दुरिहां राखा।

²⁰ सांती देवईया परमेस्वर हर, हालुच के सैतान ला तुमन कर गोड़ तरी कूईच देही। हमर परभू ईसू मसीह कर किरपा तुमन ऊपरे होवत रहे।

²¹ मोर संगे सेवा करोईया तीमुथियुस हर तुमन ला जोहार कहत हवे अऊ ओही कस मोर रिस्तेदार लूकियुस, आसोन अऊ सोसिपतरुस भाई मन, तुमन ला जोहार कहत हवें।

²² मंए तिरतियुस ए चिट्ठी कर लिखोईया, तुमन ला परभू में जोहार कहत हों।

²³ गयुस, जेहर मोर अऊ सब कलीसिया कर पहुनाई करोईया लागे, ओहर तुमन ला जोहार कहत हवे। इरास्तुस जेहर सहर कर मुंसी लागे अऊ हमर भाई कारतुसोच हर, तुमन ला जोहार कहत हवे।

²⁴ हमर परभू ईसू मसीह कर किरपा, तुमन सब झन कर ऊपरे होवत रहे। आमीन।

²⁵ ओ परमेस्वर कर इस्तुती होए, जेहर मोर सुघर खभेर मनेकि ईसू मसीह कर सुघर खभेर कर परचार कर अनुसार, तुमन ला बिस्वास में बजर कएर सकथे। एहर सुघर खभेर कर भेद कर परकासन लागे, जेहर जुग-जुग ले छिपे रहीस।

²⁶ अब हमेसा जीयत परमेस्वर कर अगियां कर अनुसार अऊ अगमजानी मन कर लिखल बचन कर जरिए, ए उद्धार कर योजना हर परगट होईस अऊ एला संसार कर सब जाति कर मईनसे मन ला बताल जात हवे, ताकि ओमन मसीह कर ऊपरे बिस्वास करें, अऊ ओकर अगियां ला मानें।

²⁷ सच-मूच में बूईधमान सिरीप परमेस्वर हवे, ओकर महिमा ईसू मसीह कर जरिए जुग-जुग ले होवत रहे। आमीन।