रोमियो 15 - Surgujia Bible

दूसर झन कर बोझ ऊठाए बर हवे

¹ तेकर ले हमरे जेमन बिस्वास में बजर हवन, सिरीप अपन भलाई बर नहीं, बकिन जेमन बिस्वास में कमजोर हवें, ओमनोच कर कमजोरी मन ला धियान देहे बर चाही।

² हमर में ले हर एक झन ला दूसर के ओकर भलाई बर खुस करे, ताकि ओहर बिस्वास में बढ़े।

³ काबरकि मसीहोच हर अपन आप ला खुस नई करीस, बकिन जेकस कि पबितर किताब में लिखल हवे, “ए परमेस्वर, जेमन तोर बेजती करीन ओ बेजती हर मोर ऊपरे आए गईस।”

⁴ पबितर किताब में जे बात मन आगू ले लिखल गईन हवें, ओमन हमर सिक्छा बर लिखल गईन हवें, ताकि हमके जे धीरज अऊ उत्साह ओ पबितर किताब ले मिलथे, हमरे ओमें ले आसा पाबो।

⁵ परमेस्वर जेहर हमके ला धीरज अऊ उत्साह देथे, तुमन ला अईसन बरदान दे, कि तुमन मसीह ईसू कर अनुसार आपस में मेल-मिलाप कर संगे रहा।

⁶ ताकि तुमन एक मन अऊ एक सूर में, हमर परभू ईसू मसीह कर दाऊ परमेस्वर कर आदर करते रहा।

⁷ जेकस मसीह हर तुमन ला अपनाईस, ओही कस तुहूंच मन एक दूसर के अपनावा, ताकि परमेस्वर कर महिमा होए।

⁸ तेकर ले मंए तुमन के बतावत हों, कि मसीह हर परमेस्वर कर सचाई कर चलते यहूदी मन कर सेवक बनीस, ताकि परमेस्वर हर जे बात जबान मन ला, हमर पूरखा मन ला देहीसे ओमन ला पका करे।

⁹ ओहर एकरोच ले आईस ताकि जे दया परमेस्वर हर गैर यहूदी मन कर ऊपरे करीस, एकर चलते ओमन ओकर महिमा करें, जेकस दाऊद राजा हर पबितर किताब में परमेस्वर ले गोठियाथे, “एकरे बर मंए गैर यहूदी मन कर मंझारे में तोर महिमा करहूं, अऊ तोर नांव कर भजन गाहूं।”

¹⁰ पबितर किताब में एहुच कस कहल गईसे, “ए गैर यहूदी मन, परमेस्वर कर चुनल मईनसे मन कर संगे तुमन आनंद मनावा।”

¹¹ अऊ एहू कस कहल गईसे, “ए गैर यहूदी कर सब मईनसे मन, परभू कर महिमा करा, अऊ सबो जाति कर मईनसे मन, ओकर बड़ाई करा।”

¹² अऊ फेर यसायाह अगमजानी हर कहीस हे, “ईसे कर बंस में ले एक झन आही, अऊ ओहर सब गैर यहूदी मईनसे मन कर ऊपरे राएज करे बर ऊठही, अऊ गैर यहूदी मन, ओकर ऊपरे अपन भरोसा ला राखहीं।”

¹³ परमेस्वर जेहर भरोसा देथे, बिस्वास करे कर चलते तुमन ला सब मधे कर, आनंद अऊ सांती ले भएर दे, ताकि पबितर आत्मा कर सामर्थ कर द्वारा, मसीह में तुमन कर भरोसा हर अऊ बढ़ते जाए।

पौलुस हर गैर यहूदी मन कर मझारे सेवकाई करथे

¹⁴ ए मोर भाई-बहिन मन, मंए खुद तुमन कर बारे में पका जानथों कि, तुमन भलाई कर बात ले भरे हवा अऊ तुमन ठन परमेस्वर कर बारे में सबो गियान हवे, अऊ तुमन एक दूसर ला सिक्छा दे सकथा।

¹⁵ तबोले मंए तनीक बात मन ला तुमन के सुरता करुवाए बर, ढेरेच हिमेत कएर के लिखे हों। एहर ओ किरपा कर कारन होईसे, जेला परमेस्वर हर मोके देहीस हे।

¹⁶ मंए गैर यहूदी मन बर मसीह ईसू कर सेवक लागों। मंए एगोट याजक कर रूप में तुमन जग, परमेस्वर कर सुघर खभेर कर सेवा करथों, ताकि गैर यहूदी मन, पबितर आत्मा कर द्वारा पबितर होए के, परमेस्वर कर अपनाए लाएक, बलिदान बएन जाएं।

¹⁷ एकरे बर मंए मसीह ईसू कर कारन, परमेस्वर कर बात में घमंड करथों।

¹⁸ मसीह हर मोर बचन अऊ काम कर द्वारा गैर यहूदी मन ला, परमेस्वर कर अगियां ला माने बर लानीस। ओकर छोंएड़ अऊ कोनो बिसय में गोठियाए कर मंए हिमेत नई करों।

¹⁹ परमेस्वर हर मोर द्वारा जे चिन्ह चमत्कार मन ला करीसे, ओमन ला अपन आत्मा कर सामर्थ ले करीस हे। एही कस मंए यरूसलेम सहर ले लेके इल्‍लुरिकुम परदेस तक, मसीह कर सुघर खभेर कर पूरा परचार करे हों।

²⁰ ए मोर ढेरे ईछा हवे कि, मंए सुघर खभेर कर परचार उहां करों, जिहां कर मईनसे मन मसीह कर बारे में नई सुनीन हवें। मंए चाहत हों, कि जिहां सुघर खभेर कर परचार होए गईसे, उहां मंए जाए के दूसर कर नेंव में काम नई करों।

²¹ बकिन, जेकस कि पबितर किताब में लिखल हवे, “जेमन जग ओकर बारे में परचार नई करल गईस, ओमन ओके देखहीं, अऊ जेमन नई सुनीन हें, ओमन समझहीं।”

²² एकरे चलते तुमन जग भेंट करे में केतनो दाएर अड़ंगा होईस अऊ मंए तुमन जग नई आए सकें।

रोम देस जाए बर पौलुस कर योजना

²³ बकिन अब ए इलाका मन में मोर काम करे कर, कोई जघा नई बांचीसे। ढेरेच बछर ले मोके तुमन जग आए कर ईछा रहीस।

²⁴ तेकर ले जब मंए इसपेन देस जाहूं, त तुमन इहां ले, होवत जाहूं। काबरकि मोके आसा हवे कि तुमन कर संगे चटिक समय बिताए के मोके आनंद मिलही, अऊ तुमन मोर आगू कर यात्रा बर मदेत करीहा।

²⁵ बकिन अझर तो मंए परमेस्वर कर मईनसे मन कर, सेवा करे बर यरूसलेम सहर में जाथों।

²⁶ काबरकि मकिदुनिया अऊ आखया इलाका कर मईनसे मन, यरूसलेम कर गरीब संत मन बर, ढेरे खुसी ले तनिक दान भेजें।

²⁷ ओमन दान भेजे में खुस हवें, अऊ फुरोंच में ओमन, यरूसलेम कर संत मन कर करजदार लागें। काबरकि जब गैर यहूदी मन यहूदी मन कर आत्मिक आसीस में भागीदार होईन हवें, त गैर यहूदी मन ला उचित हवे, कि ओमन सारीरिक बात मन में यहूदी मन कर मदेत करें।

²⁸ एला पूरा कएर के अऊ ए दान ला ओ गरीब संत मन ला देके, उहां ले इसपेन देस जाहूं अऊ जात घरी डगर में तुमन जग आहूं।

²⁹ मंए जानथों कि जब मंए तुमन जग आहूं, त मसीह कर पूरा आसीस कर संगे आहूं।

³⁰ ए भाई-बहिन मन, हमर परभू ईसू मसीह अऊ पबितर आत्मा कर मया कर सुरता कराए के, मंए तुमन ठे बिनती करत हों, कि मोर बर परमेस्वर ले पराथना करे में उत्साह कर संगे मोर साथ देआ।

³¹ कि मंए एहूदिया परदेस कर ओ अबिस्वासी मईनसे मन ले बांचे रहों, जेमन परमेस्वर ला नई अपनाईन, अऊ जे सेवा मंए यरूसलेम में करहूं, ओकर ले उहां कर संत मन खुस रहें।

³² अऊ मंए परमेस्वर कर ईछा कर अनुसार, तुमन जग खुसी कर संगे आए सकों, अऊ तुमन कर संगती ले तरो ताजा होए जाओं।

³³ सांती देवईया परमेस्वर तुमन सबो झन कर संगे रहे। आमीन।