रोमियो 13 - Surgujia Bible

अधिकारी मन कर अधीन में रईहा

¹ हर एक मईनसे सासन करोईया अधिकारी मन कर अधीन में रहे, काबरकि सब अधिकार ला परमेस्वर देथे, अऊ अधिकारी मन ला ओहर ठहराथे।

² एकरे बर जे कोनो हर अधिकारी मन कर बिरोध करथे, ओहर परमेस्वर कर नियम कर बिरोध करथे, अऊ बिरोध करोईया हर अपन ऊपरे दंड लानथे।

³ जेहर सही काम करथे, ओकर ऊपरे अधिकारी कर डर नई रहे, बकिन जेहर गलत काम करथे, ओकर डर बनल रथे। का तुमन अधिकारी कर डर ले छुटकारा पाए बर चाहथा? त सही काम करा अऊ अधिकारी हर तुमन कर बड़ाई करही।

⁴ काबरकि ओ अधिकारी हर तुमन कर भलाई बरीक परमेस्वर कर सेवक लागे। बकिन अगर तुमन गलत करथा, त ओकर ले डरावा, काबरकि गलती करोईया मन ला, दंड देहे कर अधिकार ओके देहल गईसे। ओहर तो परमेस्वर कर सेवक लागे अऊ बुरा काम करोईया मन ला दंड देथे।

⁵ तेकर ले अधिकारी कर दंड ले सिरीप बांचे बर नहीं, बकिन अपन बिवेक कर चलते भी अधिकारी मन कर अधीन में रहा।

⁶ तेकर ले तुमन लगानोच ला चुकावा, काबरकि अधिकारी मन परमेस्वर कर सेवक लागें, अऊ ओमन अपन काम ला पूरा करे में लगे रथें।

⁷ एकरले जेके ला, तोके देहे बर हवे, ओकर चुकता कर देआ, जेके ला लगान पटाए बर हवे, ओके लगान पटावा, जेके ला मलगुजारी देहे बर हवे, ओके मलगुजारी देआ, जेकर मान मरजाद करे बर चाही, ओकर मान मरजाद करा, अऊ जेकर आदर करे बर चाही, ओकर आदर करा।

एक दूसर कर जिमेदारी

⁸ आपस में मया कर छोंएड़ अऊ कोनो बात में ककरो करजदार झईन बना। काबरकि जेहर दूसर झन ला मया करथे, ओही हर मूसा कर कानहूंन कर पालन करीस हे।

⁹ काबरकि कानहूंन हर एकस कथे, “छिनारी झईन करीहा, हतिया झईन करीहा, चोरी झईन करीहा, लालच झईन करीहा।” ए अगियां कर छोंएड़ अऊ कोनोच अगियां होही त सब कर मुख बात एही हर लागे, “अपन परोसी ले अपने कस मया कर।”

¹⁰ जेहर मया करथे ओहर अपन परोसी कर कुछ बुराई नई करे, एकरले जेहर मया करथे, ओहर मूसा कर कानहूंन ला पूरा करथे।

¹¹ अभीन कर समय ला जाएन के एहीच कस करा, तुमन ला नींद ले जागे कर घरी आए गईसे। काबरकि जे घनी हमरे परभू कर ऊपरे बिस्वास करे रहेन, ओ समय कर हिसाब ले तो हमर उद्धार ठांवे हवे।

¹² राएत करीबन बीत गईसे, अऊ दिन हर निकलोईया हवे। तेकर ले आवा हमरे अंधार कर गलत काम ला छोंएड़ के इंजोर कर हथियार ला पहिर लेई।

¹³ एकरले जेकस हमरे दिन कर समय में रथी, ओही कस हमरे सही चाल चली अऊ तुमन रंग-रेली अऊ खाए पीके माएत झईन जावा, छिनारी अऊ दुराचार में झईन पड़ा, लड़ाई-झगरा, अऊ इसगा डाह ले दुरिहां रहा।

¹⁴ बकिन तुमन परभू ईसू मसीह ला पहिर लेआ, अऊ मन कर बुरा ईछा ला, पूरा करे कर बिचार झईन करा।