रोमियो 11 - Surgujia Bible

परमेस्वर हर इसराएली मन ला नई छोंड़ही

¹ तेकर ले मंए ए पूछत हों, का परमेस्वर हर अपन मईनसे इसराएली मन ला छोएड़ देहीस? कभों नहीं! महुंच तो खुद इसराएली लागों, अऊ मंए अबराहम कर बंस अऊ बिनयामीन कर गोती कर लागों।

² परमेस्वर हर अपन मईनसे मन ला, जेमन ला ओहर सुरू ले चुनीस ओमन ला नई छोंड़ीस। तुमन तो बढ़ियां ले जानथा कि पबितर किताब हर एलीयाह अगमजानी कर बारे में का कथे। ओहर इसराएली मन कर बिरोध में परमेस्वर ले बिनती कएर के अईसना कहीस:

³ “ए परभू, ओमन तोर अगमजानी मन ला माएर दारीन, अऊ तोर बेदी मन ला गिराए देहींन हवें, अऊ मंए अकेला बांचे हवों, अऊ ओमन महूंच के माएर दारे कर कोसिस में हवें।”

⁴ बकिन परमेस्वर हर ओके का जबाब देहीस? ओहर कहीस, “मंए अपन बर सात हजार मईनसे मन ला बचाए के राखे हवों, जेमन बाल देवता कर आगू में गोड़े नई गिरीन हवें।”

⁵ एही कस एहूच समय में थोरहें अकन मईनसे मन बांचीन हवें, जेमन ला परमेस्वर हर अपन किरपा ले चुनीस हवे।

⁶ अगर एहर परमेस्वर कर किरपा ले होईसे, त फेर एहर मईनसे कर करम कर आधार में नई होईसे। अगर एहर मईनसे कर करम कर आधार में होतीस त, किरपा हर फेर किरपा नई रएह जातीस।

⁷ त एकर का मतलब होईस? ढेरेच अकन इसराएली मन परमेस्वर ला खुस करे कर खोज में रहीन, तबोले ओमन खुस नई करे पाईन, बकिन तनिक चुनल मईनसे मन परमेस्वर ला खुस करीन, अऊ बांचल मईनसे मन कर हिरदय हर कठोर बएन गईस।

⁸ जेकस कि पबितर किताब में लिखल हवे, “परमेस्वर हर ओमन कर बुद्धि ला बिगर काम कर बनाए देहीसे, अऊ ओमन ला अईसना आंखी देहीसे, जेहर नई देखे, अऊ अईसना कान देहीस हे, जेहर नई सुने, ओमन कर आजीयोच ले एही दसा हवे।”

⁹ अऊ दाऊद राजा हर कथे, “ओमन कर भोजन हर ओमन बर जाल अऊ फंदा बएन जाए, अऊ ओहर ओमन बर ठोकर अऊ सजा कर कारन बएन जाए।

¹⁰ ओमन कर आंखी में अंधार छाए जाए, ताकि ओमन देख झईन सकें, अऊ तंए हमेसा ओमन कर कनिहां ला, दुख-पीरा में झुकाए के राख।”

परमेस्वर हर गैर यहूदी मन ला बचाही

¹¹ का इसराएली मन मसीह कर ऊपरे बिस्वास नई कएर के ठोकर खाईन, अऊ ओमन हमेसा बरीक नास होए गईन? कभों नहीं! बलकि इसराएली मन कर अपराध कर कारन गैर यहूदी मन ला उद्धार मिलीस, ताकि इसराएली मन ला जलन होए।

¹² अगर इसराएली मन कर अपराध हर संसार बरीक आसीस लानथे, अऊ ओमन कर भटेक जवाई हर, गैर यहूदी मन बर आसीस कर कारन बनथे, त फेर जब सबो इसराएली मन परमेस्वर जग फिर के आहीं, त गैर यहूदी मन ला, अऊ केतना बगरा आसीस मिलही?

¹³ अब मंए तुमन गैर यहूदी मन ले गोठियात हवों; मंए तुमन कर मझार में सुघर खभेर कर परचार करे बर भेजल गए हवों, तेकर ले मंए अपन सेवा कर बड़ाई करथों।

¹⁴ ताकि मंए कोई कस कएर के अपन यहूदी भाई-बहिन मन में जलन पैदा करों, अऊ ओमन में ले तनिक झेमन ला बिस्वास में लानों, कि ओमन कर उद्धार होए जाए।

¹⁵ काबरकि इसराएली मन कर तियाएग देहल जवाई हर, परमेस्वर कर संगे संसार कर आने मईनसे मन कर मेल-मिलाप कर कारन बनीस, त ओमन कर परमेस्वर ला अपनावल जवाई हर, मरल में ले जी ऊठल मन कस जरूर होही।

¹⁶ अगर परमेस्वर ला चघाल सानल पिसान कर एक भाग हर पबितर हवे, त फेर पूरा सानल पिसान हर पबितर हवे, अगर रूख कर जएर हर पबितर हवे, त फेर रूख कर डारोच मन पबितर हवें।

¹⁷ ए गैर यहूदी मन, तुमन जंगली जैतून कर डार कस हवा। तुमन सही जैतून, जेमन यहूदी लागें, ओमें सांटल गए हवा। जिहां ले तनिक डार मन ला टोएर देहल गईसे। अब तुमन ओ सही जैतून रूख कर जएर कर अंग होए कर कारन, तुमन कर पालन पोसन होवथे, तेकर ले तुमन ओकर आसीस में भागीदार होए गए हवा।

¹⁸ त तुमन ओ टोरल डार मन ले बढ़ियां हवन, कहिके घमंड झईन करीहा, अगर तुमन घमंड करथा, त ए बात कर सुरता राखिहा कि तुमन जएर ला नई समहारे हवा, बकिन जएर हर तुमन के समहारीस हवे।

¹⁹ फेर तंए कहबे, “ओ डार मन ला एकरे बर टोरल गईन, ताकि मंए ओमन कर जघा में सांटल जाओं।”

²⁰ एहर सही लागे ओमन तो अपन अबिस्वास कर कारन टोरल गईन, बकिन तंए सिरीप बिस्वास कर चलते ओमें बने हस। एकरले घमंड झईन कर बलकि सवाचेती रह।

²¹ काबरकि अगर परमेस्वर हर यहूदी मन ला नई छोंड़ीस, जेमन सही डार लागें, त ओहर तहूंच के नई छोंड़ही।

²² एकरे बर परमेस्वर कर दया अऊ ओकर कठोरता कर बारे में सोंच। जेमन गिर गईन ओमन ऊपरे ओहर कठोरता देखाईस, बकिन तोर ऊपरे ओहर दया देखाईस, अगर तंए ओकर दया कर लाएक नई बने रहबे, त तहूंच के काएट के अलगे कएर देही।

²³ अगर ओ यहूदी मन अपन अबिस्वास ला छोंएड़ देहीं, त ओहूच मन सांटल जाहीं, काबरकि परमेस्वर जग ओमन ला फेर से सांटे कर सामर्थ हवे।

²⁴ ए गैर यहूदी मन, तुमन सुभाव ले जंगली जैतून कर डार कस हवा। तबोले सुभाव कर उलटा, तुमन ला काएट के सही जैतून कर रूख में सांटल गईस हवे। त फेर यहूदी जेमन सुभाविक डार लागें, अपनेच जैतून कर रूख में काबर अऊ बढ़ियां ले सांटल नई जाहीं?

सबो इसराएली मन बचाल जाहीं

²⁵ ए भाई-बहिन मन, मंए नई चाहत हवों कि तुमन अपन आप ला, बूईधमान समेझ के ए भेद ले अनजान रहा, कि जब तक गैर यहूदी मन ले चुनल सब मईनसे मन परमेस्वर जग नई आए जाहीं, तब तक इसराएली मन कर एक भाग हर अईसने अपन हिरदय ला, बजर बनाए के राखही।

²⁶ अऊ एही नियर सबेच इसराएली मन उद्धार पाहीं। जेकस कि पबितर किताब में लिखल हवे, “मुकती देवईया हर सियोन ले आही, अऊ ओहर अधरम ला याकूब कर बंस ले दुरिहां कएर देही।

²⁷ जब मंए ओमन कर पाप ला दुरिहां करहुं। तब ओमन कर संगे मोर ए करार होही”

²⁸ यहूदी मन सुघर खभेर ला नई अपनाईन, एकरे बर ओमन परमेस्वर कर बईरी लागें, अऊ एहर तुमन बर बढ़ियां होईस। बकिन ओमन अझरो ले चुनल हवें अऊ ओमन अपन पूरखा मन कर कारन परमेस्वर कर मयारू लागें।

²⁹ काबरकि जब परमेस्वर हर कोई के बरदान देथे अऊ चुईन लेथे, त फेर ओला वापस नई लेहे।

³⁰ तुमन तो पहिले परमेस्वर कर अगियां ला नई मानत रहा, बकिन जईसना यहूदी मन परमेस्वर कर अगियां ला नई मानीन, त तुमन कर ऊपरे परमेस्वर कर दया होईस।

³¹ ओही कस अब यहूदी मन परमेस्वर कर अगियां ला नई मानीन, तेकर ले जेकस तुमन कर ऊपरे दया होईस, ओही कस यहूदी मन कर ऊपरे भी परमेस्वर कर दया होही।

³² सब मईनसे मन परमेस्वर कर अगियां ला नई मानीन, एकरे बर ओहर ओमन ला कएदी कस मानथे, बकिन ओहर एकस एकरले करीस, ताकि ओहर सब झन कर ऊपरे दया देखाए सके।

परमेस्वर कर इस्तुती

³³ अरे! परमेस्वर कर धन, बुद्धि अऊ गियान हर केतना अथाह हवे! ओकर नियाओ हर हमर सोंच ले बाहरी हवे अऊ ओकर डगर हर केतना अगम हवे।

³⁴ पबितर किताबोच हर एकस कथे, “परभू कर मन ला कोन जाएन सकथे? आखिर ओकर सलाओ देवईया कोन हवे?

³⁵ का कोनो हर, परमेस्वर ला कभों कांही जाएत देहीसे, कि परमेस्वर हर ओके वापिस देही?”

³⁶ काबरकि सब जाएत हर परमेस्वर कती ले आईस हवे, अऊ ओकरे द्वारा बनाल हवे, अऊ ओकरे बर बनाल हवे। ओकर महिमा जुग-जुग ले होवत रहे: आमीन।