रोमियो 10 - Surgujia Bible

¹ ए भाई-बहिन मन, मोर मन कर बड़ा ईछा अऊ परमेस्वर ले मोर ए पराथना हवे कि इसराएली मन उद्धार पाएं।

² मंए सही में जानथों कि ओमन कर हिरदय में परमेस्वर बरीक रिझ हवे, बकिन ओमन कर रिझ हर, सही गियान कर अनुसार नईए।

³ परमेस्वर हर कईसे मईनसे मन ला, अपन आगू में बेकसूर बनाथे, ओकर बारे में ओमन अनजान रहीन, ओमन परमेस्वर कर नजर में बेकसूर बने कर डगर ला, खुद अपन बर खोजथें अऊ परमेस्वर कर डगर कर अधीन में नई रहथें।

⁴ काबरकि मसीह हर मूसा कर कानहूंन कर अंत लागे, ताकि जे कोई ओकर ऊपरे बिस्वास करथे, ओहर परमेस्वर कर नजर में बेकसूर ठहरथे।

परमेस्वर जमो झन कर उद्धार करथे

⁵ कानहूंन ला माने ले परमेस्वर कर नजर में कईसे बेकसूर होथें, ओकर बारे में मूसा हर लिखीस हे, “जे मईनसे हर कानहूंन कर पालन करथे, ओहर एकर द्वारा जीयत रही।”

⁶ बकिन बिस्वास कर द्वारा, परमेस्वर कर नजर में बेकसूर बने कर बारे में ए कहल गईसे, “तुमन अपन हिरदय में ए झईन कईहा कि [मसीह ला धरती में उताएर लाने बर सरग में कोन जाही?]”

⁷ आखिर ए झईन कईहा; [“मसीह ला मरल में ले जीयाए के ऊपरे लाने बर पताल लोक में कोन उतरही?”]

⁸ बकिन पबितर किताब हर कथे, “परमेस्वर कर बचन हर तोर लिघे हवे, एहर तोर मूंह में अऊ तोर हिरदय में हवे।” एहर ओही बिस्वास कर बचन लागे, जेकर हमरे परचार करथी।

⁹ अगर तंए अपन मूंह ले कबूल करथस कि ईसू हर मोर परभू लागे अऊ अपन मन में बिस्वास करथस कि परमेस्वर हर ओके मरल में ले जियाईस, त तंए फुरोंच में उद्धार पाबे।

¹⁰ काबरकि जे कोई हर अपन हिरदय में बिस्वास करथे, ओहर परमेस्वर कर नजर में बेकसूर बनथे अऊ अपन मूंह ले, बिस्वास ला कबूल करे कर चलते उद्धार पाथे।

¹¹ पबितर किताब हर एकस कथे, “जे कोई ओकर ऊपरे बिस्वास करही, ओहर लज्जित नई होही।”

¹² यहूदी अऊ गैर यहूदी में कोई फरक नईए। काबरकि सब कर परभू एकेच ठन हवे अऊ ओहर ओमन ला ढेरेच बगरा आसीरबाद देथे, जेमन ओकर नांव लेथें।

¹³ काबरकि, “जे कोई परभू कर नांव लेही, ओहर उद्धार पाही।”

¹⁴ बकिन जब ओमन, ओकर ऊपरे बिस्वास नई करीन, त ओमन ओकर नांव कईसे ले सकथें? अऊ ओमन ओकर ऊपरे कईसे बिस्वास कएर सकथें, जेकर बारे में कभों नई सुनीन हवें? अऊ ओमन ओकर बारे में कईसे सुईन सकथें, जब तक कोई परचार करोईया नई रही?

¹⁵ अऊ ओमन ओकर परचार कईसे कएर सकथें, जब तक ओमन ला भेजल नई जाही? जेकस कि पबितर किताब में लिखल हवे, “ओमन कर पांव हर केतना सुघर हवे, जेमन सुघर खभेर सुनाथें।”

¹⁶ बकिन सब झेमन सुघर खभेर ला नई मानीन। यसायाह अगमजानी हर कथे, “ए परभू, कोन हर हमर सुघर खभेर कर ऊपरे बिस्वास करीस?”

¹⁷ तेकर ले बिस्वास सुने ले अऊ सुनाई मसीह कर बचन ले होथे।

¹⁸ बकिन मंए पूछथों, का ओमन नई सुनिन? ओमन तो जरूर सुनीन, काबरकि परमेस्वर कर किताब में लिखल हवे, “ओमन कर अवाज हर पूरा धरती में अऊ ओमन कर बचन हर संसार कर आखरी तक पहुंच गईसे।”

¹⁹ मंए फेर पूछत हों, का इसराएली मन एला नई समझीन? पहिले तो मूसा कर द्वारा परमेस्वर हर कहीस, “जेमन समूह नईएं, ओमन कर द्वारा मंए तुमन में जलन पैदा करहुं अऊ एक मुरुख समूह कर द्वारा मंए तुमन के रीस देवाहुं।”

²⁰ फेर यसायाह अगमजानी हर बड़ा हिमेत कएर के, परमेस्वर कर ए बचन ला सुनाईस, “जेमन मोके नई खोजत रहीन, ओमन मोके पाए गईन अऊ जेमन मोर बारे में पूछतोच नई रहीन, ओमन ऊपरे मंए अपन-आप ला परगट करे हों।”

²¹ बकिन इसराएली मन कर बारे में परमेस्वर हर कथे, “मंए दिन भर अपन हाथ ला अईसना मईनसे मन कती पसारे रहें, जेमन मोर अगियां ला नई मानें अऊ जिदहा हवें।”