परकासितवाक्य 6 - Surgujia Bible

सात ठे सील मोहर ला खोलल जाथे

¹ फेर मंए देखें कि भेंड़ी छउआ हर ओ सातो सील मोहर में ले एक ठन ला खोलीस। ओही घरी मंए ओ चाएरो जीव में ले एक झन कर गरजे कस अवाज ला एकस कहत सुने, “आओ!”

² मंए नजर ऊठाए के देखें, त उहां मोर आगू में एगोट उजर घोड़ा दिखत रहीस। ओकर ऊपरे बईठोईया हर, एगोट धनहूं ला धरे रहीस; अऊ ओके एगोट मुकुट देहल गईस, ओहर जीत पावत निकलीस, ताकि ओहर अऊरेच जीत पाए।

³ जब ओ मेम्ना हर दूसरा सील मोहर ला खोलीस, त मंए दूसर जीव ला एकस कहत सुने, “आओ!”

⁴ फेर एगोट दूसरा घोड़ा निकलीस, जेहर आगी कस लाल रहीस; ओकर ऊपरे बईठोईया ला धरती में ले सांती ला उठाए लेहे कर अधिकार देहल गईस, ताकि मईनसे मन एक दूसर झन ला माएर डारें। ओके एगोट बड़खा तलवाएर देहल गईस।

⁵ जब ओ भेंड़ी छउआ हर तीसर सील मोहर ला खोलीस, त मंए तीसर जीव ला एकस कहत सुने, “आओ!” त मंए एगोट करिया घोड़ा ला देखें अऊ ओकर ऊपरे बईठोईया कर हाथ में एगोट तराजू रहीस।

⁶ तेकर मंए ओ चाएरो जीव मन कर मझार में ले एगोट अवाज ला एकस कहत सुने, “एक दिन कर बनी ले एक किलो गंहू अऊ एक दिन कर बनी ले तीन किलो जांवा, बकिन जैतून कर तेल अऊ अंगूर रस कर नुकसान झईन करीहा।”

⁷ जब ओ मेम्ना हर चौथा सील मोहर ला खोलीस, त मंए चौथा जीव कर अवाज ला एकस कहत सुने, “आओ!”

⁸ मंए नजर ऊठाए के देखें, त मोर आगू में एगोट पियर घोड़ा दिखीस; ओकर ऊपरे बईठोईया कर नांव “मिरतु” रहीस, पताल लोक हर ओकर पाछू-पाछू आवत रहीस; ओके ला धरती कर एक चौथाई भाग में, एकस अधिकार देहल गईस कि तलवाएर अऊ अकाल अऊ महामारी अऊ धरती कर जंगल कर जानवर मन कर द्वारा, मईनसे मन ला माएर दारे।

⁹ जब ओ मेम्ना हर पाचवां सील मोहर ला खोलीस, त मंए बेदी कर खालहे, ओमन कर जीव मन ला देखें, जेमन ला मारल गए रहीन। परमेस्वर कर बचन कर कारन अऊ अपन गवाही ला बनाए राखे कर कारन ओमन ला सताए के माएर देहल गईस।

¹⁰ ओमन ढेरे रोसे चिकेर के कहीन: “ए सबले सक्तिदार परभू, तंए पबितर अऊ सत लागस; तंए कब तक धरती में रहोईया मन कर नियाओ नई करबे? अऊ ओमन ले हमर लहू कर पलटा कब तक नई लेबे?”

¹¹ ओमन में ले हर एक झन ला उजर ओढ़ना देहल गईस अऊ ओमन ला तनिक जुआर बर बिसोए बर कहल गईस, जब तक कि ओमन कर संगी सेवक मन अऊ भाई बहिन मन कर गिनती हर पूरा नई हो जाही, जेमन कर बध ओमने कस होवईया हवे।

¹² जब ओ मेम्ना हर छठवां सील मोहर ला खोलीस, त मंए देखें कि एक ठे बड़खा भूईडोल होईस। बेर हर कंबल सहींक करिया अऊ पूरा जोन हर लहू सहींक लाल होए गईस।

¹³ अगास कर तरईया मन धरती में एकस गिर परीन, जेकस की बड़खा गररा-घांटा कर बईहर ले हील के, अंजीर कर रूख में ले कंचा फर मन झरथें।

¹⁴ अगास हर फाएट के चटाई कस लपेटल गईस अऊ हर एक पहार अऊ टिकरा अपन-अपन जघा ले कगराए गईन।

¹⁵ तब धरती कर राजा अऊ मुखिया अऊ सरदार अऊ धनी अऊ सक्तिदार मईनसे मन अऊ सब गुलाम, सब अजाद करल मईनसे मन, पहार कर माड़ा में अऊ बड़खा चटाएन कर तरी जाए के लुकाए गईन।

¹⁶ ओमन पहार अऊ चटाएन मन ले कहे लागीन, “हमर ऊपरे गिर परा; अऊ हमके ला सिंहासन में बईठोईया कर नजेर ले अऊ ओ भेंड़ी छउआ कर कोरोध ले लुकाए लेआ।

¹⁷ काबरकि ओ दुनो झन कर कोरोध कर भयानक दिन हर आए पहुंचीस हवे अऊ ओ दिन में अब कोन टीक सकत हवे?”