परकासितवाक्य 4 - Surgujia Bible

सरग में अराधना होथे

¹ ए बात मन कर पाछू मंए देखें कि सरग में एक ठे दुरा उघरल हवे। तब ओ तुरही कर अवाज कस जेला मंए आगू सुने रहें, ओही हर कहीस, “इहां ऊपरे आए जा; अऊ मंए तोके देखाहूं कि ए बात मन कर पाछू का होवईया हवे।”

² मंए तुरतेंच पबितर आत्मा कर काबू में आए गयें, त मंए देखें कि एगोट सिंहासन सरग में मढ़ावल हवे अऊ ओ सिंहासन में कोई बईठे रहीस।

³ ओ सिंहासन में बईठोईया हर यसब अऊ मानिकय नांव कर किमती पखना कस दिखत रहीस अऊ ओ सिंहासन कर चाएरो कती, मरकत नांव कर किमती पखना कस एगोट सोखाबोरा दिखत रहीस।

⁴ ओ सिंहासन कर चाएरो कती चोबीस ठन सिंहासन रहीस अऊ ए सिंहासन मन में, चौबीस झन अगुवा मन उजर ओढ़ना पहिर के, बईठे रहीन अऊ ओमन कर मूड़ी में सोना कर मुकुट रहीस।

⁵ ओ सिंहासन में ले बिजली अऊ बदरी घटके कर अवाज निकलत हवे अऊ सिंहासन कर आगू में आगी कर सात ठे मसाल बरत रहीस; एमन परमेस्वर कर सातो आत्मा मन लागें।

⁶ ओ सिंहासन कर आगू में बिलौर कस एगोट कांच कर समुंदर रहीस; सिंहासन कर मझार में अऊ सिंहासन कर चाएरो कती चाएर ठन जीव रहीन, जेमन कर आगू कती अऊ पाछू कती आंएखेच-आंएख हवे।

⁷ पहिला जीव हर सिंह कस रहीस अऊ दूसर जीव हर बईला कस रहीस, तीसरा जीव कर मूंह हर मईनसे कस रहीस अऊ चौथा जीव हर उड़ावत गिदहा चराई कस रहीस।

⁸ ए चाएरो जीव कर छवो-छवो ठे डेना रहीस अऊ ओमन कर चाएरो कती अऊ डेना कर भीतरी आंएख ही आंएख रहीस; अऊ ओमन राएत दिन बिगर बिसोए एकस कहत रहीन, “पबितर, पबितर, पबितर! परभू परमेस्वर, सबले सक्तीदार, जेहर रहीस अऊ जेहर हवे अऊ जेहर अवईया हवे।”

⁹ जब-जब ओ जीव मन, सिंहासन में बईठोईया ला अऊ जुग-जुग जिवईया ला, महिमा अऊ आदर अऊ धनबाद करहीं;

¹⁰ तब-तब चौबीस झन अगुवो मन, सिंहासन में बईठोईया कर आगू में गिर परहीं अऊ ओके ला जेहर जुग-जुग जीयत हवे, ओकर अराधना करहीं; अऊ ओमन अपन-अपन मुकुट ला सिंहासन कर आगू में एकस कहत डाएल देहीं,

¹¹ “ए हमर परभू अऊ परमेस्वर, तहींच महिमा अऊ आदर अऊ सामर्थ कर लाएक हवस काबरकि तहींच सब चीज ला बनाए हस अऊ तोरेच ईछा ले ओमन कर रचना होईस अऊ ओमन अझर ले बनल हवें।”