परकासितवाक्य 3 - Surgujia Bible

सरदीस सहर कर कलीसिया बर खभेर

¹ सरदीस सहर कर कलीसिया कर खभरीहा बर ए लिख ले: “जेकर जग परमेस्वर कर सात ठे आतमा मन अऊ सात ठे तरईया मन हवे, ओहर एकस कहत हवे कि मंए तोर काम मन ला जानथों; सब कोनो तोके जीयत जानथें, बकिन फुरोंच में तंए मरल हवस।

² एकरले जागत रह! अऊ तोर में जे चीज मन बांचीन हवें अऊ खतम होवईया हवे, ओमन ला बजर कर, काबरकि मंए तोर कोनो काम ला अपन परमेस्वर कर नजर में सही नई पाएं।

³ तेकर ले सूरता कर कि तंए कईसना सिक्छा पाए रहे अऊ सुने रहे; ओमें बने रह अऊ पाप ले मन फिराए के मोर कती आओ। अगर तंए जागत नई रहबे, त मंए चोर कस आए जाहूं अऊ तंए नई जानबे कि मंए कोन घरी तोर जग आए जाहूं।

⁴ सरदीस सहर में तोर इहां तनिक अईसना मईनसे मन हवें, जेमन अपन-अपन ओढ़ना ला पाप ले असुध नई करीन हवें, ओमन उजर ओढ़ना पहिरल मोर संगे चलहीं, काबरकि ओमन एकर लाएक हवें।

⁵ जेहर जीत पाही, ओके ला एमने कस उजर ओढ़ना पहिराल जाही अऊ मंए ओकर नांव ला जीवन कर किताब में ले कभों नई मेटाहूं; बलकि ओकर नांव ला अपन दाऊ अऊ ओकर सरगदूत मन कर आगू में माएन लेहूं।

⁶ जेकर सुने कर ईछा हवे, ओहर सुईन ले कि पबितर आत्मा हर कलीसिया मन ले का कहत हवे।”

फिलदिलफिया सहर कर कलीसिया बर खभेर

⁷ फिलदिलफिया सहर कर कलीसिया कर खभरीहा बर ए लिख ले: “जेहर पबितर अऊ सत हवे अऊ दाऊद राजा कर चाभी ला राखथे, जेला ओहर खोलथे ओला कोई बंद करे नई सके अऊ जेला ओहर बंद करथे, ओला कोई खोले नई सके, ओहर ए कथे

⁸ मंए तोर काम मन ला जानथों, देख, मंए तोर आगू में एक ठन केंवारी ला उघाएर के राखे हवों, जेला कोई हूरके नई सके। तोर सक्ती हर तो दम अकन हवे, तबोले तंए मोर बचन कर पालन करथस अऊ मोर नांव ला कभों नई नकारे।

⁹ देख, मंए सैतान कर सभा कर ओ मईनसे मन ला तोर बस में कएर देहूं, जेमन अपन-आप ला यहूदी होए कर देखावा करथें, अऊ ओमन झूठ बोलथें। देख, मंए ओमन ला तोर गोड़ कर तरी गिराहूं अऊ तंए जाएन जाबे कि मंए तोर ठन मया करथों।

¹⁰ धीरज कर संगे सब सएह के, आगू बढ़े कर बारे में मोर सिक्छा ला तंए माने हस, तेकर ले जब धरती में रहोईया मईनसे मन ला, परखे बर संसार में परीछा आही, तब मंए तोके ओमें ले बचाए के राखहूं।

¹¹ मंए हालूच अवईया हवों, जे सिक्छा तोके मिलीस हवे, ओमें मजबूत बने रह, ताकि तोर मुकुट ला कोई लूईट झईन ले।

¹² जेहर जीत पाही, ओके मंए अपन परमेस्वर कर मंदिर में एगोट खंभा बनाहूं। ओहर फेर कभों बाहरी नई जाही। मंए अपन परमेस्वर कर नांव अऊ अपन परमेस्वर कर सहर, मनेकि नांवा यरूसलेम कर नांव, जेहर मोर परमेस्वर जग ले, सरग में ले उतरईया हवे अऊ मंए अपन नांवा नांव ला भी ओमे लिखहूं।

¹³ जेकर सुने कर ईछा हवे, ओहर सुईन ले कि पबितर आत्मा हर कलीसिया मन ले का कथे।”

लौदीकिया कर कलीसिया बर खभेर

¹⁴ “लौदीकिया कलीसिया कर खभरीहा बर एकस लिख कि; परमेस्वर कर सब वायदा मन ला अऊ योजना मन ला पका करोईया मंए (आमीन) जेहर बिस्वास लाएक अऊ सचा गवाह अऊ परमेस्वर कर सिरिस्टी कर सुरूवात कर कारन लागों, ए कहत हों।

¹⁵ मंए तोर काम मन ला जानथों कि न तो तंए ठंडा हवस अऊ न गरम; केतना बढ़िहां होतीस कि तंए ठंडा चाहे गरम होते!

¹⁶ एकरले कि तंए कुनकुना हवस अऊ न ठंडा हवस न गरम; मंए तोके ला अपन मूंह में ले उलगोईया हवों।

¹⁷ तंए कथस कि मंए धनी हों, मोर जग सब जाएत हवे अऊ मोके ला कांही जाएत कर कमी नईए, बकिन तंए एला नई समझस कि तंए अभागा, तुच्छ, गरीब, अंधा अऊ नंगा हवस।

¹⁸ एकरले मंए तोके बढ़िहां सलाव देहत हवों कि आगी में तावल सोना ला मोर जग ले बेसाए ले, ताकि तंए धनी होए जा तंए मोर जग ले उजर ओढ़ना ले ले, ताकि पहिर के तोर अपन नंगापन कर लाज ला ढांएक ले अऊ अपन आंएख में लगाए बर काजर ले ले कि तंए देखे लाग।

¹⁹ मंए जेमन ठन मया करथों ओ सबो झन ला समझाथों अऊ डाटथों; एकरले इमानदार बएन जा अऊ अपन पाप ले मन फिराए के मोर कती आओ।

²⁰ देख, मंए दुरा में ठड़होए के केंवारी ला ठोंकत हवों, अगर कोई मोर अवाज ला सुईन के केंवारी ला उघारही, त मंए ओकर जग भीतरी आए के, ओकर संगे खाना खाहूं अऊ ओहर मोर संगे खाही।

²¹ जेहर जीत पाही, ओके मंए मोर संगे सिंहासन में बईठाहूं, जेकस की मंहू जीत पाए के, अपन दाऊ कर संगे ओकर सिंहासन में बईठ गए हों।

²² जेकर सुने कर ईछा हवे, ओहर सुईन ले कि पबितर आत्मा हर कलीसिया मन ला का कहथे।”