परकासितवाक्य 20 - Surgujia Bible

ईसू कर एक हजार बछर कर राएज कराई

¹ तेकर मंए एक झन सरगदूत ला सरग ले उतरत देखें। ओकर हाथ में अथाह-थाह कुंड कर चाभी अऊ एगोट बड़खा संकरी रहीस।

² ओ सरगदूत हर ओ अजगर ला धएर लेहीस, ओ अजगर हर जुनहा सांप हवे, जेहर ईबलीस अऊ सैतान हवे, ओ सरगदूत हर ओके ला एक हजार बछर बर बाएंध देहीस;

³ ओके अथाह-थाह कुंड में डाएल के हुरेक देहीस। सरगदूत हर ओकर ऊपरे सील मोहर लगाए देहीस कि ओहर एक हजार बछर कर पूरा होवत ले, जाति-जाति कर मईनसे मन ला फेर झईन भरमाए। एकर पाछू ओला तनिक समय बर छोड़े बर जरूरी हवे।

⁴ तेकर मंए सिंहासन ला देखें अऊ ओमें बठोईया मन ला, नियाओ करे कर अधिकार देहल गईस। मंए ओ मईनसे मन कर आत्मा मन ला भी देखें, जेमन कर मूड़ी मन ईसू कर गवाही देहे कर चलते, अऊ परमेस्वर कर बचन कर चलते पूजल गए रहीस। ओमन ओ जानवर कर अऊ ओकर मूरती कर पूजा नई करे रहीन। ओमन ओकर छाप ला अपन कपार अऊ अपन हाथ में नई लेहे रहीन। ओमन फेर जी उईठ के, मसीह कर संगे एक हजार बछर तक राएज करत रहीन।

⁵ जब ले एक हजार बछर हर पूरा नई होईस, तब ले बांचल मरल बिस्वासी मन जी नई उठीन। एहर तो पहिला समय हवे, जब परमेस्वर हर मईनसे मन ला मिरतु ले फेर जियाथे।

⁶ धन्य अऊ पबितर हवें ओ मईनसे मन, जेमन ए पहिलो जी उठाई में भागीदार हवें। एमन ऊपरे दूसर मिरतु कर कोनो अधिकार नईए, बकिन ओमन परमेस्वर अऊ मसीह कर याजक होहीं अऊ ओकर संगे एक हजार बछर तक राएज करहीं।

सैतान कर बिनास

⁷ जब एक हजार बछर हर पूरा होए जाही, तब सैतान ला कैद ले छोएड़ देहल जाही।

⁸ ओहर धरती कर चाएरो कती कर, जाति कर मईनसे मन ला, मनेकि गोग अऊ मागोग कर सेना मन ला भरमाए के, लड़ाई बर एक जग जुटाए बर निकलही। ओमन कर गिनती हर समूंदर कर बालू कस होही, जेला गिन नई सकी।

⁹ ओमन सब धरती में बगेर के, परमेस्वर कर मईनसे मन कर छावनी अऊ दुलरुवा सहर ला छेंक लेहीं। बकिन आगी हर सरग ले उतेर के, ओमन ला भसम कएर देही।

¹⁰ ओमन कर भरमोईया सैतान ला आगी अऊ गंधक कर ओ दह में डाएल देहल जाही, जेमे जानवर अऊ झूठा अगमजानीयो ला भी डाएल देहल गए रहीस। ओमन राएत दिन जुग-जुग पीरा में कलपत रहीं।

बड़खा उजर सिंहासन अऊ आखरी नियाओ

¹¹ तब मंए एगोट बड़खा उजर सिंहासन अऊ ओकर उपरे बईठोईया एक झन ला देखें। ओकर आगू ले अगास अऊ धरती हर भाएग गईन अऊ ओमन ला फेर कभों नई देख पाएं।

¹² तेकर मंए छोटे ले बड़े तक सब मरल मईनसे मन ला, सिंहासन कर आगू में ठड़होवल देखें। किताब मन ला खोलल गईस, फेर एगोट अऊ किताब मनेकि जीवन कर किताब ला खोलल गईस। ओ किताब मन में लिखल बात मन कर आधार में ओ मरल मईनसे मन कर काम कर अनुसार नियाओ करल गईस।

¹³ समूंदर हर ओ मरल मन ला दे देहीस, जेमन ओमे रहीन। तब मिरतु अऊ पताल-लोक हर, ओ मरल मईनसे मन ला दे देहीस जेमन ओमे रहीन। हर एक झन कर काम कर अनुसार ओमन कर नियाओ करल गईस।

¹⁴ मिरतु अऊ पताल-लोक ला आगी कर दह में डालल गईस। ए आगी कर दह हर दूसर मिरतु हवे।

¹⁵ जेकर नांव जीवन कर किताब में लिखल नई मिलीस, ओके ला आगी कर दह में डालल गईस।