परकासितवाक्य 19 - Surgujia Bible

जय कर गीत

¹ एकर पाछू मंए सरग में एगोट बड़खा भीड़ ला, रोसे अवाज ले एकस कहत सुने, “हालेलूयाह! उद्धार अऊ महिमा अऊ सामर्थ हमर परमेस्वर कर ही हवे।

² काबरकि ओकर फईसला हर सचा अऊ ठीक हवे। ओहर ओ बड़खा बेसीया कर नियाओ करीस, जेहर अपन छिनारी ले धरती ला भरमाए रहीस। परमेस्वर हर ओके सजा देहीस, काबरकि ओहर परमेस्वर कर दास मन कर हतिया करे रहीस।”

³ फेर दूसर दाएर ओमन कहीन, “हालेलूयाह! ओकर जरे कर कुहिरा हर, जुग-जुग ले उठत रही।”

⁴ तब चौबीसो अगुवा अऊ चाएरो जीव मन गिर के, सिंहासन कर ऊपरे बईठोईया परमेस्वर कर अराधना करीन अऊ कहीन; “आमीन! हालेलूयाह!”

मेम्ना कर बिहाओ

⁵ तेकर सिंहासन में ले एगोट अवाज निकलीस, “ए हमर परमेस्वर कर दास मन, चाहे छोटे चाहे बड़े, जेमन परमेस्वर कर आदर करथा, तुमन सब कोई ओकर इस्तुती करा।”

⁶ तेकर मंए बड़खा भीड़ कस अऊ जेहर ढेरेच तेज ले बहत पानी कर, खललावत अवाज कस अऊ बड़खा बदरी घटके कर अवाज कस ए कहत सुने, “हालेलूयाह! काबरकि हमर सबले सक्तीदार, परभू परमेस्वर हर राएज करत हवे।

⁷ आवा, हमरे आनंद अऊ खुसी मनाई अऊ परमेस्वर कर महिमा करी, काबरकि भेंड़ी छउआ कर बिहाओ कर समय हर आए पहुंचीस हवे। ओकर दुलही हर अपन आप ला तियार कएर लेहीस हवे।

⁸ ओके ला सुदध अऊ इंजोर चमकेदार, बढ़िहां मलमल कर ओढ़ना पहिरे कर अधिकार देहल गईस” काबरकि ए बढ़िहां मलमल कर मतलब, पबितर मईनसे मन कर बढ़िहां काम हवे।

⁹ तब सरगदूत हर मोके ला कहीस: “ए लिख ले, कि धन्य हवें ओमन, जेमन भेंड़ी छउआ कर बिहाओ कर भोज में बलाल गईन हवें।” तेकर ओहर मोर जग कहीस, “ए बचन हर परमेस्वर कर सत बचन लागे।”

¹⁰ तब मंए अराधना करे बर, ओ सरगदूत कर गोड़ तरी गिर परें। बकिन ओहर मोर जग कहीस: “देख; एकस कभों झईन करबे, मंए तोर अऊ तोर ददा मन कर संगी सेवक लागों, जेमन ईसू कर गवाही देहे बर माढ़ीन हवें। परमेस्वर कर ही अराधना कर।” काबरकि जेमन ईसू कर गवाही देथें, ओमन कर उपरे अगमबानी करे कर आत्मा हवे।

उजर घोड़ा कर सवारी

¹¹ तब मंए देखें कि सरग हर उघरल हवे, उहां मोर आगू में एगोट उजर घोड़ा रहीस अऊ ओकर ऊपरे एक झन सवार रहीस। ओहर बिस्वास लाएक अऊ सत कहाथे। ओहर नियाओ कर संगे फईसला अऊ लड़ाई करथे।

¹² ओकर आंएख हर आगी कस धधकत हवे अऊ ओकर मूड़ी में ढेरेच राएज मुकुट हवे। ओकर ऊपरे एगोट नांव लिखल हवे, जेला ओकर छोएड़ अऊ कोई नई जाने।

¹³ ओहर लहू में बोथल ओढ़ना ला पहिरीस हवे अऊ ओकर नांव “परमेस्वर कर बचन” हवे।

¹⁴ सरग कर सेना मन सुदध बढ़िहां मलमल कर ओढ़ना पहिर के, उजर घोड़ा में सवार होए के ओकर पाछू-पाछू जाथें।

¹⁵ जाति-जाति कर मईनसे मन ला मारे बर, ओकर मूंह ले एगोट चोंख तलवाएर निकलथे। ओहर लोहा कर राएज दंड ला लेके, ओमन कर ऊपरे राएज करही। ओहर अपन बैरी मन ला ओही कस कुचही, जेकस एक झन मईनसे हर, अंगूर कर रस कुंड में अंगूर ला कुचथे। ओकर चलते अपन बैरी मन ला सबले सक्तीदार परमेस्वर हर सजा देही, जेहर ओमन कर पाप मन कर चलते ढेरेच गुसाईस हे।

¹⁶ ओकर ओढ़ना अऊ जांघ में ए नांव लिखल हवे, “राजा मन कर राजा अऊ परभू मन कर परभू।”

¹⁷ तब मंए एक झन सरगदूत ला बेर कर ऊपरे ठड़होवल देखें। ओहर ढेरे रोसे किरलाए के अगास कर मझार में ले, उड़ईया सब चराई मन ला कहीस: “आवा, परमेस्वर कर बड़खा भोज बर जुईट जावा,

¹⁸ ए भोज में तुमन राजा, सेनापती, सक्तिदार सवांग, घोड़ा अऊ ओकर सवार मन कर मांस अऊ अजाद, चाहे गुलाम, छोटे चाहे बड़े, सब झन कर मांस ला खावा।”

¹⁹ तेकर मंए ओ जानवर मन ला अऊ धरती कर राजा मन ला अऊ ओमन कर सेना मन ला, ओ घोड़ा कर सवारी जग अऊ ओकर सेना जग लड़े बर जूटल देखें।

²⁰ ओ जानवर अऊ ओकर संगे ओ झूठा अगमजानी ला धरल गईस। झूठा अगमजानी हर ओ जानवर कर आगू में चिन्हा देखाए के, ओ मईनसे मन ला भरमाईस, जेमन कर ऊपरे ओ जानवर कर छाप रहीस अऊ जेमन ओकर मूरती कर पूजा करत रहीन। ए दुनो झन ला मनेकि ओ जानवर अऊ झूठा अगमजानी ला जीते जीयत ओ आगी कर बड़खा कुंड में, जेहर गंधक ले जरत हवे, ओमे फेंक देहल गईस।

²¹ बांचल मईनसे मन, ओ घोड़ा कर सवारी कर मूंह ले निकलोईया तलवाएर ले माएर देहल गईन अऊ सब चराई मन ओमन कर मांस ला खाए के अघाए गईन।