परकासितवाक्य 18 - Surgujia Bible

बेबीलोन सहर हर गिर जाथे

¹ एकर पाछू मंए एक झन दूसर सरगदूत ला, सरग ले उतरत देखें। ओके ला ढेरे अधिकार मिले रहीस अऊ धरती हर ओकर तेज ले चमेक उठीस।

² ओहर ढेरे रोसे किरलाए के कहीस: “गिर गईस, गिर गईस, ढेरे बड़खा बेबीलोन सहर हर गिर गईस! ओहर दुस्टआत्मा मन कर अऊ हर एक असुद्ध आत्मा मन कर अऊ हर एक मधे कर असुद्ध चराई अऊ घिनक जानवर मन कर डेरा बएन गईस हवे।

³ काबरकि सब जाति कर मईनसे मन, ओ बड़खा सहर कर छिनारी कर भयंकर दारू ला पी लेहीन हवें। धरती कर राजा मन ओकर संगे छिनारी करीन हवें अऊ धरती कर बेपारी मन ओकर ढेरेच भोग-बिलास कर चलते, धनवान होए गईन हवें।”

⁴ तेकर मंए सरग ले एगोट अऊ अवाज ला सुने, “ए मोर मईनसे मन, ओ बड़खा सहर में ले निकेल आवा कि तुमन ओकर पाप मन में भागी झईन होवा, ताकि ओकर बिपती में ले कोनो हर तुमन कर ऊपरे आए झईन परे।

⁵ काबरकि ओकर पाप मन कर गघरी हर भएर के, सरग तक पहुंच गईस हवे अऊ परमेस्वर हर ओकर अधरम ला सुरता करीस हवे।

⁶ जईसने ओ बड़खा सहर हर तुमन कर संगे करीस हवे, वइसने ओकर संगे करा। ओकर काम मन कर अनुसार ओके ला दुई गुना पलटा देआ, जे कटोरा में ओहर भएर देहे रहीस, ओही में ओकर बर दुई गुना भएर देआ।

⁷ ओहर जेतना डींग मारीस अऊ भोग-बिलास करीस, ओतनेच ओके ला दरद अऊ दुख देआ, काबरकि ओहर अपन मन में कथे, ‘मंए रानी बएन के बईठे हवों, मंए अदावेंन नई हवों; अऊ कभों दुख में नई परों।’

⁸ एकर चलते एकेच दिन में ओकर ऊपरे बिपेत मन आए जाहीं, मनेकि मिरतु अऊ दुख अऊ अकाल। ओके ला आगी ले भसम कएर देहल जाही; काबरकि ओकर नियाओ करोईया, परभू परमेस्वर हर सक्तिदार हवे।”

⁹ धरती कर राजा, जेमन ओकर संगे छिनारी अऊ भोग-बिलास करीन, ओकर लेसे कर कुहिरा ला देखहीं, त ओकर बर रोहीं अऊ छाती पिटहीं।

¹⁰ ओकर दुखान कर डर कर मारे, ओमन ढेरेच दुरिहां ले ठड़होए के कहीं, “ए बड़खा सहर बेबीलोन, ए बजर सहर बेबीलोन, हाय! हाय! तोके ला एकेच घरी में दंड मिल गईस हवे।”

¹¹ “धरती कर बेपारी मन ओकर बर रोहीं अऊ कलपहीं; काबरकि अब ले कोनो ओकर समान ला नई बेसाहीं;

¹² मनेकि सोना, चांदी, किमती पखना अऊ मोती मन अऊ मलमल कर ओढ़ना अऊ भंटा रंग, रेसमी अऊ लाल रंग कर ओढ़ना मन अऊ हर मधे कर महकत कठवा मन अऊ हाथी दांत कर हर मधे कर चीज मन अऊ किमती कठवा अऊ पीतल अऊ लोहा अऊ संगमरमर कर हर मधे कर चीज मन,

¹³ अऊ दालचीनी, मसाला, धूप, महकेदार तेल, लोबान, दारू, तेल, मैदा, गंहू, गाय, बईला, भेंड़ी, छेरी, घोड़ा, रथ अऊ सेवक अऊ मईनसे मन कर परान।”

¹⁴ बेपारी मन ओला कहीं, “जे फर ला तंए पाए कर ढेरे ईछा करे रहे, अब ओहर तोर ले दुरिहां होए गईसे। तोर सब मिठास अऊ तड़क-भड़क चीज मन तोर ले दुरिहां होए गईन हें। तंए ए सब ला फेर कभों नई देखबे।”

¹⁵ ए चीज मन कर बेपारी मन जेमन, ओ बड़खा सहर कर चलते धनी होए गए रहीन, ओकर दुखान कर डर कर मारे, दुरिहां ठड़होहीं अऊ रोवत अऊ कलपत कहीं,

¹⁶ हाय! हाय! ए बड़खा सहर, जे मलमल अऊ भंटा रंग कर अऊ लाल रंग कर ओढ़ना मन ला पहिरे रहीस अऊ सोना अऊ किमती पखना अऊ मोती ले सपरे रहीस,

¹⁷ तुरतेंच ओकर अईसना ढेरे धन हर नास होए गईस। सब कोनो जहाज कर चलोईया अऊ पानी में यातरा करोईया अऊ डोंगा कर देख-रेख करोईया अऊ हर एक ओ मईनसे मन जेमन समूंदर ले अपन जिनगी चलाथें, ए सब झन दुरिहां ही ठड़होए रहीन;

¹⁸ अऊ ओकर जरे कर कुहिरा ला देखहीं, त किरलाए के कहीं; “कोन सहर हर ए बड़खा सहर कस हवे?”

¹⁹ ओमन अपन-अपन मूड़ी में बालू ला डालहीं अऊ रोहीं अऊ कलपत किरलाए-किरलाए के कहीं; “हाय! हाय! ए बड़खा सहर हर एकेच घरी नास होए गईस, जेकर धन कर चलते, समूंदर कर सब जहाज कर मालिक मन धनी होए गए रहीन।”

²⁰ “ए सरग अऊ ए परमेस्वर कर मईनसे मन अऊ परेरीत मन अऊ अगमजानी मन, ओकर बिनास कर ऊपरे खूस होवा; काबरकि परमेस्वर हर नियाओ कएर के, ओकर जग तुमन बर पलटा लेहीस हवे।”

²¹ फेर एक झन सक्तिदार सरगदूत हर, बड़खा एगोट जनता कर पखना कस एगोट पखना ला उठाईस अऊ एकस कएह के समूंदर में फेंक देहीस “बड़खा सहर बेबीलोन हर, अईसनेच ढेरेच जोर से फेंक देहल जाही अऊ फेर ओकर कभों पता नई चलही।

²² ए बेबीलोन, बीड़ा बजोईया अऊ गवईया अऊ बसरी बजोईया अऊ तुरही फूंकोईया मन कर अवाज, फेर कभों तोर में नई सूनाही अऊ कोनो काम कर कारीगर मन, फेर तोर में कभों नई मिलहीं अऊ जनता कर चले कर अवाज हर, फेर तोर में कभों नई सुनाही।

²³ अऊ ढेबरी कर इंजोर हर फेर कभों तोर में नई चमकही, अऊ दूलहा-दूलही कर अवाज हर फेर कभों तोर में नई सूनाही; काबरकि तोर बेपारी मन धरती कर मुखिया रहीन अऊ तोर जादू टोना ले, सब जाति कर मईनसे मन ला भरमाल गए रहीस।

²⁴ ए सब सजा हर तोर उपरे आए परीस हवे, काबरकि परमेस्वर कर मईनसे मन अऊ अगमजानी मन अऊ धरती कर सब माएर दारल मईनसे मन कर हतिया कर दोस हर, तोर उपरे हवे।”