परकासितवाक्य 17 - Surgujia Bible

बड़खा बेसीया

¹ तब सात झन सरगदूत, जेमन जग सात ठे कटोरा रहीस, ओमन में ले एक झन हर आए के मोर जग एकस कहीस, “ए कती आ, मंए तोके ला ओ दुस्ट सहर ला जेहर ढेरेच पानी कर धरी में बसीस हवे, परमेस्वर हर कईसे दंड देहीस हवे, ओला देखाहूं; ए दुस्ट सहर हर एगोट बड़खा बेसीया ला देखाथे।

² ओ बेसीया कर संगे, धरती कर राजा मन छिनारी करीन अऊ धरती कर रहोईया मन, ओकर छिनारी कर दारू ला पीके मतवार होए गईन।”

³ तब ओ सरगदूत हर आत्मा में मोके ला सुनसान जघा में ले गईस। मंए उहां लाल रंग कर जानवर कर ऊपरे, एक झन सवांगीन ला बईठल देखें, ओ जानवर कर देंह कर उपरे परमेस्वर कर निंदा कर नांव लिखल रहीस अऊ ओकर सात ठन मूड़ी अऊ दस ठन सींग रहीस।

⁴ ए सवांगीन हर भंटा अऊ लाल रंग कर ओढ़ना ला पहिरे रहीस, अऊ सोना अऊ किमती पखना अऊ मोती मन ले सफरे रहीस। ओकर हाथ में एगोट सोना कर कटोरा रहीस, जेहर घिनक चीज अऊ ओकर छिनारी कर असुध चीज ले भरल रहीस।

⁵ ओकर कपार में एगोट नांव लिखल रहीस, ओ नांव कर मतलब कोनो नई जानत रहीन। ओहर एहर लागे “ढेरे बड़खा बेबीलोन, धरती कर बेसीया मन कर अऊ घिनक चीज मन कर दाई।”

⁶ मंए ओ सवांगीन ला परमेस्वर कर मईनसे मन कर लहू अऊ ईसू कर गवाह मन कर लहू ला पीके मातल देखें; मंए ओके ला देख के ढेरेच अचमहों होए गएं।

⁷ तेकर ओ सरगदूत हर मोर जग कहीस: “तंए काबर अचमहों होए? मंए ए सवांगीन कर अऊ ओ जानवर कर भी भेद ला बताहूं, जे जानवर कर उपरे ओहर बईठीस हवे अऊ जेकर सात ठन मूड़ी अऊ दस ठे सींग हवे।

⁸ जे जानवर ला तंए देखे हस, ओहर पहिले तो रहीस, अब नईए अऊ ओहर अथाह कुंड ले निकेल के नास होए जाही। धरती कर रहोईया मन, जेमन कर नांव संसार कर रचे कर समय ले जीवन कर किताब में नई लिखल गईस हवे, ओमन ए जानवर ला देख के अचमहों होहीं, काबरकि ओहर पहिले रहीस, अब नईए बकिन फेर आए जाही।

⁹ एला समझे बरीक तेज बुद्धि अऊ गियान कर जरूरत हवे। ओ सात ठन मूड़ी मन सातो पहार मन हवें, जेमन कर ऊपरे ओ सवांगीन हर बईठीस हवे।

¹⁰ ओ सात राजोच मन हवें, पांच झन तो गिर गईन हवें अऊ एक झन हर अझेर राएज करत हवे अऊ एक झन हर अझेर ले नई आईस हवे। जब ओहर आही, त तनिक दिन बर राएज करही।

¹¹ जे जानवर हर पहिले रहीस अऊ अब नईए; ओहर आठवां राजा लागे। ओहर सातो में ले पैदा होईस अऊ बिनास में पएर जाही।

¹² जे दस ठन सींग ला तंए देखे; ओमन दस झन राजा लागें। ओमन अब ले राएज नई पाईन, बकिन ओमन ला ओ जानवर कर संगे, एक घंटा बर राजा मन कस अधिकार मिलही।

¹³ एमन सब एक मन कर होहीं, एकर चलते ओमन अपन-अपन सामर्थ अऊ अधिकार ला ओ जानवर ला देहीं।

¹⁴ ओमन भेंड़ी छउआ जग लड़हीं अऊ भेंड़ी छउआ हर ओमन कर ऊपरे जय पाही, काबरकि ओहर परभू मन कर परभू अऊ राजा मन कर राजा लागे। भेंड़ी छउआ कर संगे ओहूच मन जय पाहीं, जेमन बलाल गईन हवें अऊ चुनल गईन हवें अऊ बिस्वास में बनल हवें।”

¹⁵ तेकर सरगदूत हर मोर जग कहीस, “जे पानी ला तंए देखे, जेकर उपरे बेसीया हर बईठीस हवे, ओमन तो मईनसे मन कर भीड़ अऊ जाति अऊ भासा मन हवें।

¹⁶ ओ जानवर अऊ दस ठन सींग ला तंए देखे; ओमन ओ बेसीया जग दुसमनी राखहीं। ओमन ओके अकेला छोंड़ही अऊ उघरा कएर देहीं। ओमन ओकर मांस ला खाए देहीं अऊ ओके ला आगी में लेस देहीं।

¹⁷ काबरकि परमेस्वर ओमन कर मन में एकस डाएल देही कि ओमन ओकर ईछा ला पूरा करहीं अऊ जब तक परमेस्वर कर बचन हर पूरा नई होए जाही, तब तक ओमन एक मन होए के, अपन-अपन राएज ला ओ जानवर ला दे देहीं।

¹⁸ ओ सवांगीन जेला तंए देखे हस, ओहर ओ बड़खा सहर लागे, जेहर धरती कर राजा मन कर ऊपरे राएज करथे।”