मरकुस 2 - Surgujia Bible

लकवा मारल रोगीया ला चंगा करथे

¹ ढेरे दिन कर पाछू ईसू फेर कफरनहूम सहर में आईस, त मईनसे मन सुनीन कि ईसू घरे हवे।

² ओ घरे जिहां ईसू हर रुके रहीस, एतना झेमन झूमेट गईन कि ओ घरे एको झन बर जघा नई रहीस अऊ दुरोच में जघा नई रहीस, ईसू हर ओमन ला बचन सुनात रहीस।

³ त उहां एगोट लकवा मारल रोगीया ला, चाएर झन मईनसे मन ईसू जग ऊठाए के लानीन।

⁴ बकिन भीड़ कर चलते ओमन ओकर लिघे जाए नई सकीन, तेकर ले घर कर छानी ला जेकर तरी ईसू रहीस, उधेन के ओमन खटीया संगे, जेमें लकवा मारल रोगीया रहीस, ओके ओही जग डोरा में बाएंध के खालहे उताएर देहींन।

⁵ ईसू हर ओमन कर बिस्वास ला देख के, लकवा मारल रोगीया ला कहीस, “ए बेटा, तोर पाप हर छमा होईस।”

⁶ तब जेतना यहूदी कानहूंन कर सिखोईया मन ओजग बईठे रहीन, ओमन अपन मने-मन में सोंचत रहीन,

⁷ “ए मईनसे हर काबर एकस कथे? एहर तो परमेस्वर कर निंदा करत हवे, परमेस्वर कर छोंएड़, अऊ कोन पाप ला छमा कएर सकथे?”

⁸ ईसू हर तुरतेंच अपन आत्मा में जाएन गईस कि ओमन अपन-अपन मन में एकस सोंचत हवें, एकरले ओमन ला कहीस, “तुमन अपन-अपन मन में एकस काबर सोंचत हवा?

⁹ लिखरी काहर हवे? का लकवा कर रोगीया ला एकस कहे बर कि तोर पाप हर छमा होईस, आखिर एकस कहे बर कि उठ, अपन खटीया ला उठाए के रेंग बूल?

¹⁰ बकिन तुमन एला जाएन लेआ कि मईनसे कर बेटा ला, धरती में पाप ला छमा करे कर भी अधिकार हवे।” एकरले ईसू हर ओ लकवा मारल रोगीया ला कहीस,

¹¹ “मंए तोके कहत हों, उठ, अपन खटीया ला उठाए के घरे चले जा।”

¹² ओहर उठीस, अऊ तुरतेंच खटीया ला उठाए के सब झन कर आगू ले निकेल के चएल देहीस, ओला देख के सब झन अकबकाए गईन अऊ परमेस्वर कर बड़ाई कएर के कहे लागीन, “हमरे एकस कभों नई देखे रहेन।”

ईसू लेवी ला अपन चेला बनाथे

¹³ ईसू फेर निकेल के बड़खा दह कर धरी में गईस अऊ सब मईनसे मन ओकर जग आईन अऊ ओहर ओमन ला उपदेस देहे लागीस।

¹⁴ जात घनी ओहर हलफई कर बेटा लेवी ला, लगान लेहे कर चंउकी में बईठल देखीस अऊ ओके ला कहीस, “मोर पाछू होए ले अऊ मोर चेला बएन जा।” त ओहर उईठ के ईसू कर पाछू होए लेहीस।

¹⁵ तेकर पाछू ईसू हर लेवी कर घरे खाए बर गईस, त ढेरेच लगान लेवईया अऊ दूसर पापीयोच मन, ईसू अऊ ओकर चेला मन कर संगे खाए बर बईठीन, काबरकि ओमन ढेरेच झन रहीन, जेमन ओकर पाछू होए लेहे रहीन।

¹⁶ यहूदी कानहूंन कर सिखोईया अऊ फरिसीयो मन, ओला देखीन कि ओहर लगान लेवईया अऊ दूसर पापीयो मन कर संगे खात हवे, तेकर ओकर चेला मन ला पूछीन, “ओहर लगान लेवईया अऊ दूसर पापी मन कर संगे काबर खाथे-पीथे?”

¹⁷ ईसू हर एला सुईन के ओमन ला जबाब देहीस, “सुघर अऊ बढ़िहां मन ला बईध कर जरूरत नईए, बकिन बेमरीहा मन बर जरूरी हवे। जेमन अपन आप ला धरमी समझथें ओमन ला नहीं, बलकि जेमन अपन आप ला पापी मानथें ओमन ला बलाए बर आए हों।”

उपास कर बारे में सवाल

¹⁸ यूहन्ना कर चेला अऊ फरीसी मन उपास करत रहीन, तेकर ओमन आए के ईसू ला एकस कहीन, “यूहन्ना कर चेला अऊ फरीसी मन कर चेला मन काबर उपास करथें, बकिन तोर चेला मन उपास नई करें?”

¹⁹ ईसू हर ओमन ला कहीस, “जब दुलहा हर बरतीया मन कर संगे हवे, त का ओमन उपास कएर सकत हवें? नहीं, जब ले दुलहा ओमन कर संगे हवे तब ले ओमन उपास नई कएर सकें।

²⁰ बकिन अईसना समय आही, जब दुलहा ला ओमन जग ले अलगे कएर देहल जाही, तब ओ दिन ओमन उपास करहीं।”

²¹ “नांवा कपड़ा कर खाप, जूनहा कपड़ा में कोनो नई लगाए, काबरकि कोनो एकस करथे, त ओ खाप हर जूनहा कपड़ा ला, खींच के ओला अऊ बगरा चीर देथे।

²² अऊ कोनो हर नांवा अंगूर कर रस ला, जूनहा चाम कर झोला में नई भरे, नहीं तो ओ अंगूर कर रस हर, ओ झोला ला चीर के बईह जाही अऊ ओ अंगूर कर रस अऊ झोला दुनों हर नास होए जाही। बकिन नांवा अंगूर कर रस ला, नांवा चाम कर झोलेच में भरेक चाही।”

पबितर दिन कर परभू

²³ ईसू हर पबितर दिन में खेत कती ले जात रहीस अऊ ओकर चेला मन रेंगत-रेंगत अनाज कर बाएल ला सुरले लागीन।

²⁴ तब फरीसी मन ईसू ला कहीन, “देख, तोर चेला मन ए पबितर दिन में एकस काबर करत हवें, जेहर यहूदी कानहूंन कर अनुसार करे बर मना करल गईसे?”

²⁵ ईसू हर ओमन ला कहीस, “का तुमन एला कभों नई पढ़े हवा कि दाऊद राजा अऊ ओकर संगता मन ला भूख लागीस, त ओहर का करे रहीस?

²⁶ अबियातार महायाजक कर घरी में दाऊद हर कईसे, परमेस्वर कर मंदिर में गईस अऊ परमेस्वर बर चघावल भेंट कर रोटी जेला याजक मन कर छोंएड़ दूसर झेमन नई खाए सकत रहीन, ओला लेके खाईस अऊ अपन संगतोच मन ला देहीस?”

²⁷ तब ईसू हर ओमन जग कहीस, “पबितर दिन हर मईनसे मन बर बनाल गईसे, मईनसे हर पबितर दिन बर नई बनाल गईसे।

²⁸ एकरे बर मंए मईनसे कर बेटा, पबितर दिनोच कर मालीक लागों।”