मरकुस 16 - Surgujia Bible

ईसू हर जी उठथे

¹ जब पबितर दिन हर बीत गईस, तब मगदलीनी कर रहोईया मरियम, याकूब कर दाई मरियम अऊ सलोमी गमकेदार तेल ला बेसाईन कि जाए के ईसू कर लास में चुपराई।

² हप्ता कर पहिलो दिन, बड़े बिहाने जब बेर हर उईग गए रहीस, त ओमन मठ जग गईन।

³ अऊ एक दूसर ले कहत रहीन, “हमर बर मरघट कर दुरा कर ढापल पखना ला कोन हर हटाए देही?”

⁴ बकिन जब ओमन देखीन, त ओ बड़खा पखना ला जेहर मठ कर दुरा में रहीस, कगरावल पाईन।

⁵ मठ कर भीतरी जाए के ओमन एगोट जवान ला उजर ओढ़ना ला पहिरल अऊ ओकर जवनी कती बईठल देखीन त ढेरे अकबकाए गईन।

⁶ त ओहर ओमन जग कहीस, “तुमन झईन अकबकावा, ईसू नासरी जेके ला कुरूस ऊपरे चघाल गए रहीस, ओके खोजत हवा। ओहर जी उठीस हवे, ओहर एजग नईए। देखा, एहर ओही जघा लागे, जिहां ओमन ईसू ला राखे रहीन।

⁷ बकिन तुमन जावा, पतरस अऊ ओकर दूसर चेला मन जग कहा कि ओहर तुमन ले आगू गलील जिला में जाही; जईसने ओहर तुमन जग आगू कहे रहीस, तुमन ओके उहें देखीहा।”

⁸ अऊ ओमन मठ ले निकेल के भाएग गईन, काबरकि ओमन डर कर मारे कांपत अऊ घबराए गए रहीन। ओमन ककरो जग कांही नई कहीन, काबरकि ढेरेच डराए गए रहीन।

ईसू हर मरियम मगदलीनी ला देखार देथे

⁹ हप्ता कर आगू दिन बड़े बिहाने, ईसू हर जी उईठ के सबले आगू मगदलीनी कर रहोईया मरियम के दिखीस, जेमे ले सात गोट दुस्टआत्मा मन ला निकाले रहीस।

¹⁰ ओहर जाए के ईसू कर संगता मन ला खभेर देहीस, जेमन रोवत अऊ दुख में कलपत रहीन।

¹¹ बकिन जब चेला मन एला सुनीन कि ईसू हर जी उठीस हवे अऊ मरियम हर ओके देखीस हवे, त ओमन बिस्वास नई करीन।

ईसू हर दुई झन चेला मन के देखार देथे

¹² तेकर पाछू ईसू हर दूसर रूप में अपन चेला में ले दुई झन ला देखार देहीस, जब ओमन गांव कती जात रहीन।

¹³ ओहू मन जाए के दूसर झन ला खभेर देहीन, बकिन ओमन, ओमन कर गोएठोच कर बिस्वास नई करीन।

ईसू हर गियारहो चेला मन ला देखार देथे

¹⁴ तेकर पाछू ईसू गियारहो चेला मन ला देखार देहीस, जब ओमन खाए बर बईठे रहीन अऊ ओहर ओमन कर अबिस्वास अऊ मन कर ढींट कर चलते, ओमन ला घुड़काईस। काबरकि ओमन जी उठे कर पाछू ओके देखीन, तबो ले बिस्वास नई करे रहीन।

¹⁵ ईसू हर कहीस, “तुमन पूरा दुनिया में जाए के सबेच मईनसे मन ला सुघर खभेर ला सूनावा।

¹⁶ जेहर बिस्वास करही अऊ बतिस्मा लेही ओकरे उद्धार होही, बकिन जेहर बिस्वास नई करही, ओहर दोसी ठहराल जाही।

¹⁷ बिस्वास करोईया मन में ए चिन्हा होही कि ओमन मोर नांव ले दुस्टआत्मा मन ला निकालहीं अऊ नांवा-नांवा भासा गोठियाहीं,

¹⁸ ओमन सांप मन ला धरहीं, अऊ जहरो ला पी जाहीं तबो ले ओमन के कांहीच नई होही, ओमन बेमरीहा मईनसे मन कर उपरे हाथ ला राखहीं अऊ ओमन ठीक होए जाहीं।”

¹⁹ परभू ईसू ओमन जग ए सब गोएठ ला गोठियाए कर पाछू, सरग में उठाए लेहल गईस अऊ परमेस्वर कर जवनी कती बईठ गईस।

²⁰ फेर चेला मन जाए के सबेच जघा में परचार करे लागीन अऊ परभू हर ओमन कर संगे काम करत रहीस अऊ जे चिन चमत्कार ला ओमन कर मझारे करत रहीस, ओकर चलते अपन बचन ला पका करत रहीस। आमीन।